Patrons限定|平治王朝「始祖鳥」W05十週年|一日一 F1|第三季(15/30) (Patreon)
Content
嚟緊二〇二四年上半季,唔知妳、你或者您仲記唔記得十年前,平治就係喺呢個半年、開始佢哋嘅 F1 車隊八連霸王朝。
有時,當你啊平治掙扎緊、迷失緊同尋找緊嘅時候,回望一吓當年嘅成敗因素、客觀環境同內在設定,話唔定可以搵返自己。「十年」可以係個藉口,點停竄動嘅意識,聚焦再出發。
十年前嘅上半季,平治 W05 Hybrid 戰車(下圖)明顯跑出。暑假前十一站,平治贏咗九場、兼單場包 Q 贏冠亞軍一共六次咁多。由於 F1 呢年轉用油電混能 V6 turbo 引擎,所以車隊已經轉返去重點研發「動力系統(power unit)」。當時嘅平治認為自己有乜優勢呢❓
時任 Mercedes AMG HPP managing director 嘅 Andy Cowell 係咁同《Race Engine Technology》講嘅:「我認為一如以往喺賽車世界,優勢嚟自一籃子因素 —— 包括我哋嘅引擎、即係整體 power unit 有優勢,同時 PU 戰車一體化(integration)都係主因。
「如果硬係要我揀樣嘅話,咁 shaft power 應該係最重要嘅一環。喺 Brixworth(英國/HPP)嘅手足同埋喺 Stuttgart(德國)嘅研究人員,佢哋都搵到非常靚仔嘅數字。
「然後,我哋唔止要搞好引擎佈局、將安裝 power unit 所需要嘅空間減到最少, 又要唔好令班 aerodynamicists(氣動力工程師)嬲豬,更加要將 PU 嘅工作溫度(operating temperatures)同埋散熱數值(要求)keep 到有咁低得咁低。」
要一次過搞好咁多嘢,關鍵係點有效協調、整合四個唔同地方嘅唔同 teams,一齊設計底盤同 PU 之餘,但係又可以夾到。Race team 同 engine team 分別喺英國嘅 Brackley 同 Brixworth,Daimler 總部嘅 input 就嚟自德國,再加埋馬來西亞嘅燃油同機油供應商 Petronas。平治可以比其他 F1 車隊更快、更有效、更完整咁整合四方力量,亦為十年前開始王朝奠定重要基石。二〇二六嘅紅牛、Red Bull Powertrains、Ford 同 ExxonMobil(Esso 同 Mobil1),可唔可以照辦煮碗呢❓
睇返二〇一三年嘅 F1 V8 引擎,嗰時嘅效能大約係百分之三十。二〇一四季初,威龍吹話全新 V6 引擎效能應該要超過百分之四十先有足夠競爭力。然後早喺二〇一七年,Mercedes AMG 已經講過話佢哋嘅內燃機引擎嘅 thermal efficiency 已經超過百分之五十。
即係點❓即係燃油裡面嘅化學能源,有超過百分之五十都被有效轉化為 crankshaft(曲軸)嘅 torque、繼而推郁架車。最後,平治 F1 車廠由二〇一四贏到二〇二一年,完成史無前例嘅車隊八連霸。今個上半季,將見證上個 F1 王朝初開嘅十週年。
完
第三季《一日一F1》都係 30 篇。如果有興趣重讀前兩季另外 60 篇嘅話,㩒下面個 tag 或者 content search:一日一F1。