F1經典神器「風繼續吹 diffuser」（下）｜一日一 F1｜第三季（13/30）｜年費85折限時優惠｜只此三日 (Patreon)

Off-throttle exhaust-blown diffuser 喺二〇一〇年再次成為潮流，之但係 F1 車隊好快就學識點樣進一步改良成個系統。

二〇一一年前，F1 工程師已經明白要從呢件神器攞到最大下壓（downforce），並唔可以齋靠喺「死氣喉」排出多啲生風到 diffuser 附近控制氣流，而係要 make sure 啲風係熱嘅 —— 即係「熱吹」。

「熱吹」嘅最好方法，就係燒油。咁就矛盾嘞！即刻車手「收油」、想慢啲嗰陣，引擎又燒多啲油，令架車又快返❓Yes and no。係會燒多啲啲燃油，但妙就妙在唔會多咗馬力輸出。

關鍵係：你喺死氣喉燒油、而唔喺引擎嘅內燃室（combustion chamber）燒，咁就得嘞。做法係唧少少油入 chamber，但唔點火。然後，內燃室裡面有油/氣混合物由「排氣衝程（exhaust stroke）」從死氣喉排出。油/氣混合物遇到接近攝氏九〇〇度嘅超熱死氣喉就著火、加熱「廢氣」、增加氣體動量（momentum），從而製造更大下壓。

所以，二〇一一年 F1 戰車識玩嘅話，入彎嗰陣引擎都有怪聲。現任 F1 CTO Pat Symonds（下圖）同年七月跟《F1 Racing》話：「呢個係一個幾爆嘅過程，而且仲要喺排氣主喉管（primary exhaust pipes）爆，所以特別嘈。」

Symonds 引述同年摩納哥站咸美頓（Lewis Hamilton，下圖）嘅說法：「除咗比賽起步之外，排位應該係而家成個週末最刺激嘅部份。之前嘅排位，我哋只係㨂最快嘅 engine setting；而家係㨂最快、同最大下壓嘅引擎設定，which is very、very neat。

「（有呢件事 F1 神器之後）你可以用大攻角嘅大頭剷，架車係咪都好咬地 —— and you can throw the car around like crazy。」

咁件神器咪用多好多油❓如果會嘅話，似乎得不償失喎❓

其實係用多咗油嘅，不過只係多咗少少。F1 神器「風繼續吹 diffuser」嘅效能制限，笨唔係額外燒幾多油，而係「熱吹 diffuser」溫度太高、過熱。過熱，就唔可以喺排氣主喉管「爆」更多油/氣混合物、繼而無得吹更多熱風去 diffuser。完。

完

第三季《一日一F1》都係 30 篇。如果有興趣重讀前兩季嗰 60 篇嘅話，㩒下面個 tag 或者 content search：一日一F1。