「山士」將偶像變對手❓｜一日一 F1｜第三季（10/30） (Patreon)

眾所週知，F1 車手「山士」Carlos Sainz 嘅兒時偶像，就係兩屆世界冠軍兼西班牙同鄉艾朗素（Fernando Alonso）。

對「山士」嚟講，艾朗素嘅地位同冼拿（Ayrton Senna）、舒麥加（Michael Schumacher）係唔同嘅。冼拿同舒麥加係 Sainz 嘅榜樣，但艾朗素就從來都係佢嘅偶像。

Sainz 喺二〇一五年嘅 F1 新人賽季曾經咁講：「喺西班牙我哋會話『make your heros your rivals』，而今年我可以同佢鬥車，呢個係我自己嘅一個超大成就。

「我嘅賽車英雄從來都係艾朗素。我開始睇 Formula 1 嗰陣，就係佢開始贏嘅時候。我嗰陣鬥緊 kart 仔，追住艾朗素嚟睇，然後 F1 就變成我嘅 target。第一次見艾朗素係喺二〇〇五年 F1 西班牙站，我想好似佢咁。He was my hero, my idol。」

然後，「山士」將偶像變對手。

二〇一五年嘅新人賽季，Sainz 有「大佬」艾朗素照住，咁對佢行走江湖、對佢喺 paddock 企穩陣腳絕對有幫助。「你見我哋成日一齊，咁會令我有家嘅感覺」。二〇二一同二二年嘅 Mick Schumacher 同 Sebastian Vettel，其實都有類似感覺。Mick 同 Seb 嘅故仔又再 deep 少少，因為老舒當年算係「帶大」Seb 嘅。唔知「好人 Seb」對住 Mick，係咪都有問必答呢❓

另一邊箱，艾朗素就唔係 Sainz 問乜，佢就會答乜㗎噃。例如 Sainz 問佢入 T1 邊條線最好，艾朗素就未必會答。Sainz 話，所以佢哋唔多講實質賽車嘢；反而都係講吓日常訓練、九傾吓體育同笑吓，吹吓 paddock 入面唔同人嘅 gossip（暗笑）。

其實，呢啲好似 office pantry 嘅八卦嘢，可能先係 F1 新仔有得留低嘅「軟實力」，亦應該係防人暗算嘅關鍵防具。「山士」有呢位亦師亦友、集偶像與對手於一身嘅仁兄「傍身」，可以話係「先天有餘」。咁後天呢❓

二〇二一年，Sainz 簽約 Ferrari，成為自 Alfonso de Portago 同 Fernando Alonso 之後、僅僅第三位西班牙人法拉利 F1 車手。同年，佢嘅工程師團隊有一個美國人、一個蘇格蘭人、一個意大利人同埋一個西班牙人。有報導話，嗰年佢哋晚晚一齊食飯。

過去三季喺兵荒馬亂嘅比賽期間，佢比陸仔（Charles LecLerc）更識得帶領自己嘅工程團隊，並唔係無原因嘅。

二〇二四年，「山士」已經係 F1 嘅十年樹人。但原來二〇二四年，佢先至三十而立：「關鍵係揀時候。揀幾時保守，揀幾時冒險...... if I crash, I crash。」

完

第三季《一日一F1》都係 30 篇。如果有興趣重讀前兩季嗰 60 篇嘅話，㩒下面個 tag 或者 content search：一日一F1。