多謝你和我DRINK｜有下集🤔❓ (Patreon)

《記心》

今次再喺 Here is a Pub 搞《和你DRINK》，感覺既真實又夢幻。首先，pub 揸 fit 人原來已移居海外。未來，佢話會兩邊走走。活動日前，佢先至返到香港。活動完咗嗰晚成11點，手提電話震～～～ signal 傳嚟來一張自拍一刻嘅相。佢話：take care。我覆：未來見✊。

圖二就係自拍嘅相 —— 六不散群組。

咁多年我都唔明一樣嘢，就係點解大家想要我簽名🤡。影相我明，但簽名？WTF，who am I to 簽🤣❓當然，我係有禮貌嘅，所以你叫得我簽，我通常都唔問原因，然後唔簽...... 不過會提個字：「丹」，加一句話，最後寫個日期。嗰日就係寫：9.31。

我係帶咗幾份小禮物去現場，本來想老土咁問問題答答案送禮。然後我發現咁樣唔好，應該要喺吹水過程尋找有緣人，尋找真係鍾意老舒嘅人、真係鍾意四萬嘅人、真係鍾意Senna嘅人。咁佢哋又搵到頭好人家，有緣人又會珍惜，perfect。當處女座話 perfect 嘅時候，就真係 perfect 㗎喇😂。最 surprise 嘅係，我都有禮物收，仲要係手足牌美酒同咖啡。

最後，一圖紀錄三點必露群組，多謝中間到過、但不留倩影嘅 #StandWithAndy，多謝一班 spectrum 好闊嘅你哋：有自80年代已經睇車、有因為哥桑火球先開始睇車、有因為我講所以睇車、有只聽Crofty同Martin講車但又追睇賽後《吹水站》、有打算出年睇車「三連擊」嘅女子、有密密收風嘅電視台CS、有淨係鍾意食花生、又有鍾意Lauda、Prost、Schumy、Senna、Hakkinen、Albon、Norris、Ricciardo 嘅你你你你你你妳妳妳你你你你你你你你你你你你你你你你你你你。

丹尼爾愛您😘。

P.S. 最新發展，下星期尾喺觀塘某小書局應該有個小小嘅 talk，詳情稍後公佈。大家到時僞文青🙏。