【我的香港回憶 575】讀者分享：戰前皇仁舊生的戰後生活，最終章 (Patreon)

//可能我最大嘅遺憾係我無俾你三哥打甲組，佢喺大球場踢波我應該要去睇，我總係覺得欠咗佢咁，我唔應該同你老媽子一樣婦人之見。

其實就算你老媽子當年周圍放數俾雀友呃，我都冇咩所謂，雖然嗰啲錢可以買層樓，唔需要靠做二房東咁辛苦咁麻煩。

你哋小學試考唔到，得二哥過到，中學畢業佢可以去大東電報局嗰度做，但其實你哋個個都應該有書讀。

講開錢，我知道你哋老實，但我希望我啲孫都可以咁樣。當年你二哥入大東電報局要俾半個月糧同埋送洋酒，但我做主任二十幾年，都冇收過人哋半枝酒一分錢。每次你見到人哋偷偷送禮俾我哋，我都親自送返俾人。

喺戰爭結束前一個月，梁昌周圍搵人收港幣，國民黨嘅朋友叫我一齊出去收，因為我身份比較方便，而且傭金好豐厚。

但我哋作為中山先生真真正正嘅信奉者係唔會咁樣做。

如果要剝削同胞，偷呃拐騙，倒不如一開始做漢奸。

唔需要做中又做保，攪到兩頭唔到岸！

做人雖則要有宗旨有原則，但可惜又要食飯呢！

「人在屋簷下，又哪能不低頭。」

記得日本仔啱啱投降嘅時候，我搭電車返工，見到有個漢奸俾人捉到，拉落車打，我起一起身望，大家都認得我，停晒手，但之後我坐返低。

個漢奸應該俾人監生打死左，當然呢啲事好快就冇再發生。

戰後我去咗太平洋行嗰度做會計主任。

當時戰後無幾耐，入職嘅過程非常簡單，用英文講返我喺日治時期嘅經歷，嗰位英國經理就請咗我，負責管理歐洲進口電器同家品。我亦都不負所托，將日本公司廉潔嘅風氣繼承，到我退休為止，我手下都冇人貪過一蚊雞。最後一位記得嘅同事係鐘錶部孫秉樞，呢個改名專家青出於藍，做左新一代華人買辦，唔做瑞士錶，走咗去代理星辰錶，成為我哋公司嘅一時佳話，果一年我已經退咗休。

而我呢份工最記得嘅就係，你每次放學過嚟搵我，問我拎糖。

我喺袋口拎緊糖嘅時候，你個笑容相當得意。

香港社員主人翁「熾垣」敍述完結。

經過埋呢次探訪，老頭子斷斷續續咁講咗一生經歷出嚟，好多嘢我都係第一次聽。

或者我哋中國人父子，要去到最後相處嘅時光，先會見得咁頻密。

大家庭裏面父子獨處嘅時光，往往就係最後病床嘅時刻。

之後你阿爺決定改BB果名做國希。

呢個「國」字輩嘅「國」字 ，我細個成日聽老頭子講：

「過兩年我哋成家番中國！」

但喺四九年之後，就冇再提過。

你就喺四個月之後出世，個名最後冇跟足你阿爺嘅吩咐去改，但同之前三個男孫一樣，都係用「國」字輩。//

▶️ 吳力波：「兩航投共」謎團解密（上）港英政府如何在國共兩黨之間周旋？
https://www.youtube.com/watch?v=bEf_vwCFhIs