【我的香港回憶 573】讀者分享：被日軍槍斃的舅仔 (Patreon)

【按：讀者黎先生的皇仁舊生祖父回憶，最詳細的部分，就是以下關於舅仔被日軍槍斃的部份，可以和月前分享過的葉靈鳳被日軍囚禁而獲釋的經歷平衡閱讀。】

// 艱辛嘅生活喺四四年中，由我上司田中先生收到嘅一個電話開始，變得更加雪上加霜。我聽到上司喺電話嗰度向對方確認咗我嘅名，大約三分鐘之後我就收到個壞消息 -- 我舅仔（即係我老婆個細佬）比憲兵捉走咗，罪名係「游擊隊員」。

我得到嘅其實只係通知，因為舅仔佢有我呢個親人喺日本公司工作嘅關係，先可以得到一個電話。

之後上司不斷咁同我奔走、打電話同埋疏通，終於去到大約一個星期之後，憲兵部通知我可以去探我舅仔。

我哋都好努力用盡會社嘅人脈，我同上司下脆請求埋取替役幫手，唔單止之前上司嗰位中佐朋友，仲搵到一位少將幫手聯絡憲兵部。

但係得到嘅回覆就係：「憲兵部嘅事連佢都干預唔到。」

見舅仔嗰日，原本以為上司同我搭電車，只係去憲兵總部。但原來我哋去嘅中環法院，只係搵上司嘅軍官朋友拎文件。

去到舊法院入面係唔需要九十度鞠躬，我哋冇着軍服進入到憲兵司令部，代表我哋係有關係嘅日本人，或者喺法院入邊，大家都好似個人身處喺日本一樣，都好輕鬆自若，我一世都唔會忘記果種氣氛。或者只係因為同我嘅估計好唔同，我有一種錯覺，法院比我哋會社嗰度嘅日本人仲多一份自在。

之後我就同上司去咗上水警署，成個警署無咩稽查，反為日本憲兵好多，佢哋應該都係為咗捉游擊隊而駐守呢一度。呢度嘅氣氛就相當緊張，同半島酒店真係爭好遠，但好彩大家都識日文，而我亦好快見到我舅仔。

我記得當時舅仔只係不斷同我講：「我係冤枉！」同埋：「你同我求吓班日本人，放我出嚟！」

但我能夠回答佢嘅，只係遲啲有一個所謂公平但冇必要嘅審訊。

因為我上司同我講：「憲兵部起訴得嘅案件可以話係一定入罪，因為要證據證明你舅仔係清白，喺呢方面係冇可能滿足到佢哋憲兵部嘅要求。佢哋亦都唔會輕易放過一個中國人，甚至只要同游擊隊有聯繫嘅人，佢哋都唔會放過，而且游擊隊呢個罪名唔係用錢可以解決。」

負責嘅憲兵同我上司講，經過咁長時間嘅審問，我舅仔咩都冇講過出嚟，只係話冤枉，佢解釋唔到點解同游擊隊一齊出現，所以佢嘅死刑係無可能逆轉。

我應承咗舅仔：「照顧你老婆同個仔，我會當佢係我親生仔一樣咁供書教學，撫養到佢成人。」

雖然結果係所有人都估得到，但我真係唔知點樣返去面對屋企人。出發之前我都仲有一絲希望，估唔到呢個旅程真係一次探監咁簡單。

呢次係我成人之後第一次喊，但我後半程車沿路都保持平靜，因為返到屋企喊嘅就係我老婆，仲有舅仔嘅老婆。

就喺探監之後嗰幾日，舅仔就被槍決，而我哋喺再幾日之後先收到消息。

坦白講，去到今時今日，我都唔知佢係咪游擊隊。

但對於我來講，呢一點一啲都唔重要，重點係佢冇咗條命…... //

▶️ 日本文化協會榮休副校長侯清儀：英日同盟下的共治香港，日艦川流不息到訪（三）
https://www.youtube.com/watch?v=JApOITbU71s