【我的香港回憶 570】讀者分享：皇仁「親日」舊生的三年零八個月 (Patreon)

這是讀者黎先生分享家族回憶的最主要部份，講述他的皇仁舊生祖父，畢業後服務日本公司，然後在日佔香港三年零八個月的經歷：

//一九四一年十二月其實比想像中平靜…走嘅走，返鄉下嘅返鄉下，有舊同學過澳門。留低嘅都覺得只係日本人取代英國人，包括我哋日本嘅同事，冇諗過情況會咁壞，例如日本憲兵會大開殺戒。

不過香港島情況的確好好多，九龍新界冇必要就根本唔會過去。喺一月嘅時候我哋一家仲未感受到啲咩變化，尤其我哋灣仔道一帶，可能因為有我呢個日本公司社員喺度，幾句簡單嘅日文同埋心口上一枚三井嘅會社章，將我哋灣仔電車路一帶嘅勝利友（包括之後華裔同埋印度裔嘅稽查）都趕曬去第二度搵食。

我「高佬二叔」呢個名忽然之間俾街坊拎咗黎做擋箭牌，當時我都明白街坊嘅驚怕。但我哋生活真係冇乜分別，朝頭早飲茶，我都繼續搣半個大包俾阿仔你去返學。

新年後喺上班嘅電車上邊，開始多咗空位，街上面都變得少人。沿路舖頭嘅門面，基本上都改晒賣小食。

同時喺街上好多人自動自覺識得向日本軍人鞠躬敬禮，但我依然只係會見到憲兵或士官（即軍官）嘅時候先會點頭，用日文問好。

因為我喺公司都習慣咗每日早上向上司點頭鞠躬，所以對於我黎講，仲未感覺到侮辱。 可能我心中嘅屈辱，早已經喺知道廣州淪陷嘅時候心中一沉時出現咗，感覺好似比自己嘅信仰打咗一巴咁。

而屋企高掛嘅信仰，由中山先生嘅相片變咗做一尊佛像。去到四二年中，一切都係為左自保。

之後敬禮變左法律，每個人都要九十度鞠躬。隨住新嘅總督上任，軍官權力延伸到去街頭，無人性嘅日本憲兵同埋尤其為數不多嘅朝鮮士兵出現，迅速

港島西嘅氣氛變到同九龍一樣。好彩班稽查喺港島西都仲係好自律，唔敢亂來。

當時因為我哋會社掌管住進口糧食煤炭等生活物資，我哋好清楚香港呢一年少左差唔多成一百萬人口。

最明顯係每次去青山道附近做野嘅時候，都見到啲人一家大細咁逃難番鄉下。

最初見到啲人潮，我都有諗過返南海，但一家十個人得我一個男人，點走呀？

（更不幸嘅係四四年中，我哋變咗一家十二口。）//

（待續）

▶️ 日本文化協會榮休副校長侯清儀：被遺忘的早期日港關係：明治維新也是香港國際化起源
https://www.youtube.com/watch?v=KXz9RZJF5to