【我的香港回憶 569】讀者分享：戰前皇仁畢業生的工作 (Patreon)

【按：繼續昨天讀者分享的家庭故事，他祖父在戰前皇仁書院畢業後，原來是進入了日本公司工作，捲入了風起雲湧的大時代。】

// 之後我就喺幾間小洋行輾轉做咗幾年，直至你爺爺過身。而喺之後工作最耐嘅日本公司，得到我最好嘅同事，即係外父嘅信任，將佢個女嫁俾我。但重點係，我終於可以去到一間我理想嘅公司《三井物產香港支店》工作。

喺日本公司我每日都好努力上班，希望將係之前跟英國人學到嘅嘢，加埋而家喺日本人身上學到嘅嘢，未來貢獻國家。就連日本人每日工作前嘅早操，我都會主動提早番工參與，因為優秀嘅日本人做到嘅嘢，我哋中國人一樣可以做到。

因為中山先生，我比較崇日。當時雖然啱啱成家立室但年紀仲輕，完全唔介意喺日式公司由社員做起。當時日本同事同我哋華人主要用國語溝通，少部份識講廣東話或者客家話。喺我哋嘅組織圖裏面，為咗區分佢哋由本部派過嚟嘅日本社員，佢哋會叫我哋呢班華人員工做《香港社員》。

當時我嘅課長係日本人田中先生，亦都係之後三年零八個月嘅恩人。佢嘅國語相當流利，所以我當時被迫更加要努力學習日文。每日午飯同埋放工時間都係我哋複習同上堂學習日文嘅好機會，主要由日本留學嘅同事梁先生義務負責教我哋。

雖然北伐戰事一路向好果方面發展，但隨住三零年你大哥，之後二哥大姐三哥四哥出世，我就一直安穩咁繼續工作，直至一九四一年夏天，即係你出世之後兩年，我終於擔任會計部課長，負責香港大部份嘅煤炭供應，當時同各大茶樓酒家食飯成為我日常嘅工作，但我堅持會社一貫嘅作風，唔會收任何禮。田中先生亦都相當喜歡香港，所以一直留喺度工作，佢當時係負責我嘅部長。之後秋天你六弟出世。//

▶️ 日本文化協會榮休副校長侯清儀：英日同盟下的共治香港，日艦川流不息到訪（三）
https://www.youtube.com/watch?v=JApOITbU71s