【讀者分享🇨🇳】朝陽群眾制度化：中國正式推行法家「什伍連坐法」 (Patreon)

大媽組織「朝陽群眾」篤灰李雲迪叫雞「立大功」，北京宣佈要系統性建立更多「朝陽群眾」組織，城市社區規定要「交數」有不少於15個、農村社區要不少於8個。

講到好新奇咁，無聽過什伍連坐法？

法家重點不只在於監控到你叫雞，重點係人人互相監察篤灰，破壞人與人之間嘅互信，咁就唔會形成團伙，唔會串連，就無公民社會，專制就先能夠成功駕馭。商鞅嘅幽靈從來無離開過。

有人仲以為商鞅叫人搬棍係信賞必罰，係誠信，其實根本就係強化馭民之術，當啲人係馬咁騎。即係只可以向上望，信賞必罰係統治者對人民嘅專利，得閒就丟舊胡蘿蔔俾你哋爭下，年年月月日日鬥，就唔得閒去串聯反統治者。

後嚟文明咗啲，就用禮教束縛，教你餓死事小，失節事大。其實即係話，你班hihi規規矩矩，先能夠永保政權穩定，我統治你，你唔好咁多聲氣。

其實我唔反對禮教，班hihi係的確需要有所節制。「人心惟危」，需要有規範制約。但係《尚書 · 大禹謨》後面仲有幾句，相對「人心惟危」嘅就係「道心惟微」。禮教如果只係馭民之術，在上位者唔能夠做到「惟精惟一，允執厥中」，而係以私心行馭民之術，道統失，又如何統治？康雍乾呢啲專制帝皇，尚且高懸匾額提醒自己，何況今日？

傳統儒家尚且崇尚「講信修睦」，即使只是儒表法裡，起碼表面上，不會鼓吹相互舉報篤灰，散播仇恨。

你覺得台灣是否可以做到新儒家的典範？雖然法統不再是「受命於天」的天子，傳承合法性也不再靠天子「人君之柄」，但是總體上，華夏文化千年傳承，從古儒學，到宋明理學及禮教，深入骨髓。

道統要改換成西方的個人主義和自由主義，在文化結構上並無根本，根本不固，就容易生亂，亂則野心家趁勢而起。