【讀者分享】當日private banker 咁樣講：恆大苦主是如何入局的 (Patreon)

你知，我知，單眼佬都知，全城邊個買咗最多恆大美金債。當然，福臨門個部長，或者Her mes個sales，係知得多過我哋。但响討論呢part之前，要先介紹返另一班苦主s。

Echo返上次所講，唔係個個都有緣參與恆大盛宴。林作未必有閑錢買（要打好多場冇比人KO），鍾培生唔會想買（香港電競之父喎），但佢哋嘅長輩親友，好難唔畀恆大嘅回報吸引。

要成為呢一班苦主，generally要有以下條件：

1）流動資產1億港銀以上，20億以下。但要2010年前要有呢條數。
2）發跡桶金可來自各行各業，但一定唔係高科技，房地產同金融
3）金融海嘯要輸過錢，又識少少股票
4）本身生意唔係好capital intensive

簡單嚟講，响2010年，閣下冇1億，係唔會有個自稱private banker，樣貌學歷都好似麥明詩嘅𡃁妹approach你，邀請你上去IFC個會客室開個PB戶口。（如果你係女士，sell你嗰個唔會係姜濤咁嘅樣，你唔會放心畀錢佢管，信我，通常係沈博士咁嘅樣）

當你上到去IFC，望住維港壯麗嘅景色，開戶嗰part你係冇問題嘅，因為呢個係身份嘅象徵。你同自己講，由今日開始，發誓唔會再响樓下間HSBC嘅premier banking㩒飛仔，等成粒鐘先見到個RM嚟sell自己保險。當你自high完畢，你會發覺間房突然多咗個男人，佢係麥明詩嘅同事，做investment consultant，佢會同你傾吓風險與回報。帶著戒心，你會話高過定期就得嘞，唔要kill u later，唔炒股票，最緊要穩陣。嗰個男人笑一笑，會同你講，可以試吓債券，但頂級嘅債券回報唔高，得兩三厘。你心諗，挑，我夠知，我識債券係乜㗎阿consultant，但基於禮貌，你會話，咁我返去諗諗。

幾個月後，麥明詩突然call你，話有隻新bond 出，issuer係新世界中國，有7厘息。你正疑惑呢間係咪就彤叔嗰間新世界集團，麥明詩答你係，不過母公司唔guarantee。然後你就心諗，彤叔嘅嘢試吓無妨，有成7厘息，姑且玩吓，結果你落咗一球美金，派咗三十萬美金allotment。你攞咗擺响戶口到冇乜再理，麥明詩亦冇再call你。

半年後，你借check戶口之名打畀麥明詩，佢同你講，你隻bond依家升咗4%。你心諗，咁我咪成11%回報？再過多半年，你再check，隻bond個價升咗9%，而你戶口亦派咗7%息，你會諗，呢條𡃁妹有d料到，private banker果然同HSBC唔同。你同麥明詩講，以後有咩新債出都一定要call你。

又再過一段時間，隨著量化寬鬆不斷印銀紙，你揸緊嘅bond價會一直上升，但企業融資所派嘅息口就越嚟越低。你終等到新世界中國再出新bond，你諗住all in，但得返4厘。你掛住每年派7厘嗰隻bond，你問麥明詩有咩計，佢提議你借少少錢，買碧桂園嘅bond。what？碧桂園？五星級的家？聽落好似高風險嘢嚟，但麥明詩借錢畀你買係1厘半，你收成7厘息，息差5厘幾，又姑且試吓。結果又賺。

嚟到2020年，你自覺成為投資債券專家，你已經將你所有嘅錢leverage盡晒all in入內房債，你1億本揸住3億內房債。今時今日，碧桂園都已經滿足唔到你，連佢都係得返4厘。所以，你重倉恆大，得佢仲派到8厘。你知道係有風險，但你心諗，已經發現咗除買樓以外，必賺嘅方程式，況且超級富豪甘比都係一樣all in啫。只要美國繼續印銀紙，恆大唔執笠，你係會一路賺落去，直到永遠，永不改變。雖然，麥明詩舊年已經嫁咗畀佢大客個仔，上咗岸，依家住响白加道間屋仔，只剩低嗰個IC serve你。

然後，到咗2021年，我想講，嗰個過程好快，但恆大bond由100蚊隊到落嚟去今日25蚊，係有兩個幾月。兩個月以來，每一個交易日，都係有機會沽清離場。你過去嗰十年不停咁响心中預演，一出事就清倉。但結果，你高估咗自己cut loss嘅絕情，低估咗自己堅持嘅韌力。你最後咩都無做。

2022年春，你來到樓下間匯豐，㩒咗張飛仔......