【讀者分享】港版粉紅育成記 (Patreon)

睇完網友分享她的深藍男友思想，也想回應一下。

自己也曾經在某網聚中有朋友提到「香港嘅情況不樂觀」，即刻有人回應「背靠祖國點會有事」，「我哋應該為自己係中國人驕傲」等回應。要成為呢類港版小粉紅，具備啲咩條件，等我哋一齊討論一下。  

有啲認為自己係好理性嘅老一輩，覺得世界秩序重構係不能避免嘅歷史事實，在呢個時代大洪流，既然係走緊呢個方向就應該持有開放嘅態度，接受呢個世界除咗西方民主體制以外，有另外一個龐大勢力正在崛起，與其對峙。佢哋覺得無需過分解讀，只需隨着個 flow而行，「順其自然」，總之於自己嘅層面無風無浪便當贏。反正已屆花甲，都冇幾多年可以睇，冇眼屎乾淨盲，卻忘記歷世歴代嘅暴政，影響的，是自己的下一代。  

有人大愛先行，對家蠻不講理，我方以愛包容，出少句聲輸少當贏，甚至認為在信仰上當年也看不到有這些對着幹的反抗歷史，個個都乖乖受罰，最後以大愛成全，顛覆整個羅馬帝國，所以應該好好學習，做個順民聽聽話話，什麼不公義、什麼打壓欺凌都要逆來順受，上帝自然會執行拯救，在位當權者就要好好尊重。這種想法基礎上意識形態會慢慢被蠶食，最後完全忘記上帝教導要為軟弱受壓迫嘅人申冤，要為公義發聲這些教導。  

亦有人話反正你做咩都改變不了現實，只係得個噏字，有種便返香港甚至到內地發聲維權，才叫做勇敢走出去，躲在鍵盤後面打打字，叫做懦弱，只係得閒冇嘢做，吹水唔抹嘴而已。他們可能看不起這些以文會友的人，認為只係廢噏當秘笈，卻忘記了兄弟爬山各自努力，文字表達也是捍衛自由的一個方法，能夠匯水成河。  

另外也有人表示睇唔到香港有幾亂，反正日日生活如常，樓價繼續升，錢繼續搵，繼續營營役役，表面上一切平靜。那些工會解散，報館執笠，晨早六點國安拘捕，冇乜所謂，反正都唔關我事，什麼黃色經濟圈，冇咗咪幫襯第二個囉。總之對我平時日常生活冇乜影響，就叫做冇問題。之前搞到咁大火候，而家調低咗，大家慢慢 feeling comfortable，做回港豬，super！  

那些什麼權益什麼民主自由，通通廢話，冇錢冇得傾，錢搵錢至上，有錢使得鬼推磨，驚死到時冇得走咩。總之咩都唔好諗刮得就刮，死都唔係我行先，選擇性失明，間竭性失聰地 ignore 過去兩年所發生的事。總之銀行戶口繼續飽滿就咩事都冇。喂，馬雲同馬化騰，夠有錢喇啩，有冇得走呀？海航董事，死咗都唔知咩事。  

也有人認為大國崛起，背靠祖國應該深感驕傲。現在國內先進發達，「有規有矩」，科技亦進步，甚至比起好多西方國家都要先進，疫情亦都「控制良好」，是全球最快復原國家，應該值得自豪。從外國所收到嘅一切負面資訊，全屬毁謗，誣蔑，是西方社會未能接受東升西降這現實所作出的無理指控，因此就算自己已經旅居海外，仍然心繫祖國，為其「崛起」而感到自豪，卻忘記國內豆腐渣工程，黑心食品等事件，國內民眾寧信外國貨也不願購買本土出產這個可悲現況。  

最後更有人話一定係「外國勢力」搞鬼，係都要搞亂香港。當然我哋唔排除有機會有一小撮人係咁，都係嗰句，若然少少人可以令到全香港有二百萬人行出嚟，政府都應該要反省下這一大班人點解咁容易可以被「煽動」，行得正企得正使乜驚。有啲講得出呢樣嘢嘅人，自己都生活係「外國勢力」嘅範圍，講到人哋咁乞人憎，你都係返歸大灣區與國家共榮罷啦。  

無論你去到世界任何一個地方，都梗會有一班以上諗法嘅香港人，同佢哋喺呢個範疇上，真係溝通都嘥氣。大灣區南深圳版小粉紅，就是這樣育成的。