【讀者分享✈️】 「鍾意嚟就嚟，鍾意走就走」：這是回應港人移民潮的態度嗎？ (Patreon)

政府統計處公布年中人口數字，一年間有89,200人移出。經民聯立法會議員梁美芬回應時稱，不屑有關數字，但尊重不同人的選擇：「鍾意嚟就嚟，鍾意走就走。」梁批評，將把離港人數增加歸咎於《港區國安法》的落實為「膚淺」、「為己所用」。她認為，移民不分政治光譜，「黃藍都會走」，認為不少人因為「驚咗2019年嘅暴力事件」，選擇移民到中國內地（？！）尋求較安全的生活，故不能把現況歸咎於單一原因。

而新民黨立法會議員葉劉淑儀則認為，很多人不清楚外國清況，「帶幾百萬過去，就以為夠生活」。她更指，香港向來人來人往，有人想離開香港是很平常的事，「個歷史就係咁，一啲都唔出奇。」她強調，不應對只有一年的數據過度解讀和擔心，估計香港環境再次回復正常後，離開的人會回港。  

首先，我要高度讚揚兩位女士嘅政治正確態度，同時亦都好希望佢兩個唔好放棄治療。活喺自high嘅平衡時空當然感覺良好，也需要面對現實，老實評價。  

一年走九萬人係一個咩概念？即係佔咗全香港人口1.2%左右，而且呢個移民潮只係啱啱開始。根據聯合國移民處《世界移民報告2020》數據，全球嘅移民人口比例大約係4%，香港一年已經有1.2%人走，數字正在節節上升，移居全球香港人口已經超過一百萬，若只選於香港出生者，加拿大籍香港人超過二十萬，美國也超過二十萬人，英國大概十萬左右，澳洲亦都接近十萬人。（Wikipedia，Canadian census，Australian census）呢度加埋都已經六十萬。  

其實喺加拿大，第二代第三代甚至第四代香港人加埋嘅總人口已經超過六十萬，英國大約十五萬，而美國亦都已經超過三十萬，澳洲相信亦都會高達十五至二十萬。再加上散落在其他地區嘅香港人，海外香港人應該已經超過一百五十萬。  

香港嘅人口接近八百萬，移民人口超過一百五十萬嘅概念，就即係每5個人當中就會有一個選擇離開，全球最高嘅移民人口國家係中國，移民人口佔總人口7%，而香港就已經上到19%，兩個數字都比起聯合國嘅4%高得誇張，我估原因唔使再解釋吧，唔知兩位女士有冇做足功課先講嘢嘅呢？  

喂喂，咁咪即係好似葉太所講嘅「香港不嬲人來人往好平常啫」！如果統計條數真係咁容易俾你解釋，就唔會成為一門學科年中肥咁多人啦。去年已經有九萬人走咗，過去咁多年嘅移民人數大概一百萬（不計算移民第二代），咁多年嘅意思係由1984年中英聯合聲明開始到現在，這37年。37年走咗一百萬人，即係每年平均25,500左右，而家舊年就已經90,000，即係3.5倍有凸，當年大約1990年到94年移民高峰期間每年嘅移民人數都只係60,000，呢啲係公開嘅數據，speak for itself。  

香港喺90年代人口大概只有六百萬，即係走的人數佔總人口1％。過去一年走嘅人係已經超過人口1％，點講點兜，呢一波嘅移民潮的確嚟得更加激烈。芬姐更加話移民返內地？國與國之間嘅人口流動先至叫移民呀，你幾時聽過人話由廣州移民去北京㗎？犯國安法分裂國土喎，係咪捉得㗎。  

講到底，有邊個真係願意離開自己嘅家鄉，去到別國重新開始？尤其是離開嘅人數咁龐大，走嘅更要係一班精英階層，必定係發生咗一啲不堪回首嘅事，先至會出現移民潮。香港人擁有國際視野，四處去闖，並不代表喜歡旅居他方，離鄉別井。文首兩位女士的如斯說法，不但否認離港者曾對香港所作出的貢獻，那種鄙視，中間卻隱約散發出一種酸溜溜的感覺。  

幫唔到手嘅豬隊友，就是這樣。