【國際運動場：網友分享🇭🇰🇵🇰】「新香港電台」為何忽然推出「奧運烏都語廣播」？巴基斯坦人覺得水準如何？ (Patreon)

【按：以下分享來自一位懂烏都語的網友，授權這裏和有心人分享。】

話說，李百全會同九男女委員會自運作以嚟，陰質事做盡，唔知係咪想強調自己其實有積陰德，五個月嚟，頻頻利用弱勢社群。

阿馬生話要做幫助弱勢社群節目，李百全在立法會罕有回應正面嘅，係手語翻譯節目。然後，港台東京奧運節目嘅賣點係「共融睇」，點睇？居然係提供烏都語（Urdu）版…..

先唔講佢點樣如夢初醒突然關注呢個語群，我較好奇嘅係點樣做到翻譯。

眾所周知，香港本身合規格嘅英文-少數族裔語言翻譯嘅人少之又少，特別係最重要嘅法律同醫療服務翻譯。有新聞報道都報過，曾經試過有翻譯將「膝蓋痛」譯咗做「子宮痛」畀病人個醫生聽，可想而知有幾咁恐怖。

然後，呢個Urdu 版節目，係將前一日嘅中文節目翻譯出嚟。連英譯Urdu 嘅翻譯都咁稀少，香港地有無、又或有幾多可以中譯Urdu嘅翻譯呢？（And，體育翻譯其實係另一專業來的）

在無法fact check 下，我先斗膽假設，係先將中文內容譯英文再譯Urdu ，雙重翻譯，準繩度先不談，都叫好有誠意啦可？

自問對native Urdu 頂多只明七成，姑且嘗試聽下。赫然發現，配音者該如我，肯肯定個language level 只係屬其second or third language ，皆因佢地一講就勁口窒（感同身受，但呢個係我嘅forth language ）。

細聽內容，基本上每一段內容都無譯中文嘅一半，Urdu 嘅內容，其實大多是原節目中的寒暄對話，真正重要嘅體育資訊內容係miss 咗，明明係預錄節目，但Urdu 配音似即時傳譯咁，甩碌勁多。作為觀眾，會覺得自己聽咗一大堆廢話。

特此為記，係因為我知真正需要嘅群體，係唔知道呢個節目存在；就算有睇，亦唔會有人知喺有配音版節目之下，佢哋同應有資訊嘅距離依然係超遠（心諗我係佢哋，睇英文體育節目好過）。

咁呢個節目整嚟做乜？係畀魑魅魍魎不斷消費再消費。

完。