【讀者分享🇬🇧🇭🇰】也談中英夾雜 (Patreon)

講嘢嘅時候中英夾雜，可以話係香港人嘅一大特色。有啲更加成為典型香港人嘅經典詞彙。如此獨特嘅語言文化，絕對係香港一個重要嘅Identity。哎吔，就講就用咗。呢啲獨有嘅文化，當然需要記錄落嚟，尤其是今日香港嘅光速墮落，如果唔將呢啲文化保存，就分分鐘從此消失。

新一代對某啲嘅詞彙可能比較陌生，同時點都應該聽過吓。經典例如「people mountain people sea」、「dead boy bun」、「go eat rice」、「Long time no see」，「so many people die no see you die」等等⋯⋯ 基礎上係英文，又唔係英文。係直接由廣東話翻譯，完全不理會文法，卻又如此過癮，「真．香港人」完全能夠有琅琅上口。

我哋講嘢嘅時候亦都好鍾意中英夾雜，例如你會叫個同事print份report出嚟、scan咗份document、出嚟食個lunch、book場、去shopping，出trip等等⋯⋯對於香港人，呢類型嘅表達方式正常不過，一聽就明，對於冇喺香港生活過嘅人，就真係可能拗晒頭，而「真．香港人」卻會經常不自覺咁樣用咗呢個類型嘅說話模式都不自知，毫不造作，是真性情嘅表達。

除咗中英並重以外，我哋更加鍾意自創詞彙，有冇聽過「un頂able」，「con乜鬼sider」，「time明唔啱」，「in緊」，「grad咗未」等。呢啲基礎上係亂咁嚟，卻又毫違和感。  就係過去百多年，香港呢一個華洋雜處，中西薈萃的城市，才能孕育如此文化，那種獨特性，是特色，是身份的認同，也值得自豪。