【讀者分享⛪️】回應王礽福傳道：海外香港教會有出路嗎？ (Patreon)

對於王傳道嘅分享，小弟也有一些看法。

外地華人教會，的確存在圍爐取暖的功能。這個不是近年的事，一直以來都是這樣。我參加的教會在澳洲悉尼已經超過38年歷史，迎接每一個移民潮，很多來的，一開始都是上述原因參加聚會。尤其是在九十年代尾千禧年初，面對九七問題，除了移民外還有大量香港留學生，而教會就成為了他們的落腳地。難聽啲講，家長寧願佢哋嘅子女參加教會團契，都好過晚晚落Bar卡拉OK，兼且必定有一大班人會願意幫忙照顧。

呈論最後他們信不信耶穌，就如聖經所說，種子是播下了，最後還是上帝讓他生長發芽。所以老實說，服侍才是根本，社會見證才是教會的目標，當本分做好，信定唔信就不由得信徒決定，只是上帝在那人的心中動工。

當然，相信基督教嘅一班人都有共同目的，所以比較容易溝通以及產生共同話題。而基礎上，華人教會於外地建立，正如王傳道所講，的確是希望能夠協助新移民人士能夠盡快融入社區，適應新生活，同時間亦有一班「手足」互相幫忙。可惜的是，就自己觀察，甚至我自己，都是那種希望能夠在教會群體中找到同聲同氣的人。久而久之，教會建立了根基，在信仰上也沒有什麼走歪，經濟開始上軌道，便開始對世事不聞不問，繼續睇CCTVB，每年有錢就返香港或者去吓旅行，奉獻俾足，落力事奉。不知不覺中，這班人開始與世界脫軌，對香港嘅印象當然係留喺佢哋移民前嘅經驗；當而家個個講緊姜濤，佢哋可能仍然係停留喺鍾鎮濤；香港全民睇Mirror，老移民們仍然唱緊火熱動感跨啦啦。

喺咁樣嘅情況之下，面對新一波的移民潮衝擊，教會有可能被殺個措手不及。我所返的教會，已經可以算是悉尼其中一間人數最大的華人教會，聚會人數超過400人，兩個廣東話堂加起來已經佔了聚會人數的一半。近幾個月的確多咗香港嘅家庭嚟到，而且光譜亦都係偏黃。我哋亦都曾經討論過牧養問題，當中亦發現會出現上述大家所以認識嘅香港觀念有所不同的情況。若果係一班有跟開香港新聞嘅，就會比較容易同佢哋溝通，否則好多都係用緊佢哋對舊香港嘅認知，認為政府並唔會如此濫權，警察並唔會隨便拘捕，仍然認為所有事情只需要坐下來好好傾就能夠解決。  個Discrepancy就響呢度。

莫講話融入外國文化，現今自己人溝通都出現困難，點樣牧養。甚至曾經有朋友表示，去了一間以前在悉尼讀書時期所參與的教會，講道時候談及香港，竟然仍然用緊「要聽當權者話」呢種嘅教導方法去講道，認為抗爭是對當權者的不尊重，不應鼓勵。朋友嚇到面都青埋，喳喳臨轉會，為免荼毒下一代。  因此王傳道嘅工作顯得格外重要。

除咗真理嘅詮釋，對公義嘅看法，福音嘅傳遞以外，正確嘅社會觀念及社會意識，對時事嘅敏感等等，顯得格外重要。這個並非要在政治上take side，面對現實，來了這群可以話差不多係單一政治光譜的人，你唔做定功課，了解佢哋嘅心路歷程，點樣可以協助佢哋安定落嚟？王傳道嘅先見，也實在令人敬佩。

對於移民二代甚至三代對華人教會嘅影響，在此暫且不談，因為這是一個十分大的題目，我們自己的教會也正在努力處理中。  整體來講，希望有更加多嘅牧者能夠與王傳道般，有這樣的遠像，本着基督關懷世人的心，服侍社群，也能為一班因為過去兩年而離鄉別井的香港人帶來安慰。

(By James Lo)