【讀者分享🇭🇰】親歷五百年前的苦難：國安教育陰影下的家長自白 (Patreon)

【以下分享來自一位讀者，共勉。】

又再次同老婆談到即將/已經殺到埋身嘅國民教育問題。

由於孩子年幼，整個運動，我們一直採取「溫室主義」，即儘量避免接觸任何資訊，封鎖真相。所以對孩子而言，那次被困路上，只是前面有「交通意外」；而那班荷鎗實彈經過車邊的防暴警，只是指揮交通；在街道上火光熊熊及濃煙，只是燒衣。

要一個年幼的小孩接觸/接受2019年的真相，太殘酷了，完全違反三觀。而藍絲長輩也共同接受「溫室主義」路線，並未灌輸愛國教育。2019年，對我家孩子而言，是突然間有一兩日因「交通擠塞」而唔駛返學，2020年的疫症長期放假，先係佢realize到嘅嘢。

誰知一復課，便面對4月15日國家安全教育日，學校的黃絲家長聯盟便找有空的家長陪上課，以刺探的學校的「程度」，而且向更高年級的家長詢問當日會否課程「太艱深」，得出尚算可接受，才鬆了一口氣。只是，「溫室主義」避得一時，避唔到一世。唔通真係眼白白畀學校教佢政府想佢知嘅資訊？

走，是最簡單的做法。只要一離開南深圳，就播youtube，畀個真相佢知，其實唔難。

難就難在，未走之前知道了真相，佢上國民教育課時同老師拗，又或者街上遇到執法人員時問係咪黑警，會遇上極大危險。除了讓孩子認識真相，避免孩子陷入險境，也是父母之責吧。

結果，我選擇了講一段歷史給孩子聽。

大約五百年前，有一個人，叫哥白尼，佢發現咗地球原來係圍繞太陽轉（日心說），而唔係太陽圍繞地球轉（地心說）。但當時學校嘅老師同教科書，都係話太陽圍住地球轉，冇人肯信佢。佢不斷同人講，所有人都叫佢收聲，佢唔肯，最後D人捉咗佢，逼佢講太陽係圍繞地球轉，仲困住咗佢，直到佢死咗。响好多年後，D人先知佢講嘅嘢係啱㗎。呢個故事，說明學校教嘅嘢未必一定啱，老師同其他人都唔知自己唔啱㗎。

聽到這裏，孩子竟然頓悟，「咁即係淨係要講畀明嘅人聽？」

係，我係教緊孩子潛藏，我係教緊佢真理在錯的時空未必越辯越明，我係教緊佢不立危牆之下。我係為咗錢、同埋想照顧吓藍絲長輩多幾年，冇立即帶佢遠走。雖然，我今晚好像達到了目的，但我好慚愧，因為在2021年，我竟然要佢受五百年前苦難。