【突發時空🇭🇰】邏輯矛盾重重的新香港「防疫Clean Zone制」：這是蒙古帝國的階級制度嗎？ (Patreon)

【按：以下分享不少來自一位香港公立醫院的醫生朋友，因為安全原因，只在這裏供同路人分享】

噚日南深圳市政府宣佈新一輪嘅防疫措施，鑑於第四波疫情有明顯受控跡象，將會採取新嘅政策方向包括「疫苗氣泡」，當中包括「飲食處所」喺員工同顧客打左疫苗同強迫顧客使用「安心出行」嘅前題下，有限度放寛營養時間及每枱人數， 四、六、八、十二人不等，處所營養時間去到十點、十二點、兩點不等。

呢類用已接種疫苗嘅status，將餐廳同處所劃分，邏輯上，同蒙古人建立「大元帝國」（中國歷史稱之為「元朝」）嘅階級制度，有異曲同工之妙，總結如下：

呢種用疫苗 status ，直接將市民同餐廳以接種疫苗嘅狀態，公然劃分等級同特權嘅方法，自然係香港步入「習近平新時代特色社會主義」嘅又一力作，「明張目膽」地分而治之，再以疫情之名分化社會。

16 – 30 歲人士，因為未有開放接種疫苗，直接成為第四等種性，年輕就等同天生係「南人 」一樣，與林鄭一貫而嚟 「no stake in the society 」嘅方針一脈相承，對年輕人嘅仇視表露無遺。 除左對年輕人嘅歧視，我哋仲可以從科學性、可行性、執行性、一致性，對分析新一輪「疫苗氣泡」政策嘅荒謬。

科學性

科興疫苗一直缺乏第三期臨床數據，直至近日先補交數據，已接種兩劑的保護率，僅僅只達 50.7%，剛好過半。 50.7%係咩概念？即係打哂兩針之後，免受肺炎感染嘅機會只得一半，同擲公字、買「大細」一樣。一枱  12 人，根據或然率，仍然有一半機會嘅同枱人士或會受到感染。更加令人憂慮嘅係，只打第一針科興疫苗嘅保護率，只有 3%，換句話講，同無保護差唔多。

呢個偏低嘅保護率，正正係智利廣泛打科興疫苗（超過九成屬科興），即使接種率已達 34%，疫情仍然持續上升得到印證。既然係咁，咁又點樣能夠 justify 只接種一劑疫苗的員工與顧客，可以放鬆放疫措施呢？成個政策，根本無科學根據去支持，就算要放寛，都只係因為疫情下降，而同有無接種疫苗全然無關。 當然，6、8、12人呢啲數字點得嚟，10點、12 點、2 點關門又有咩根據，好明顯就係無任何根據，不值一提。

可行性

「 第一等」餐廳可以開到 2 點，每枱最高可坐12人， 但係一個 12嘅 party 所有人都打哂兩針後14日嘅機會，會有幾大？現今社會對疫苗存在嚴重質疑，即使係同一個家庭成員之間，都有唔同嘅諗法，試問佢哋一齊出去食飯，去唔去到「clean zone」？若果顧客因為本身有長期病患，或曾有嚴重過敏反應，而根據政府指引「不建議」接種疫苗呢？同樣要如南深圳市長所講要承擔「後果」，政府可以歧視年輕人同長期病患者 ，但係佢哋嘅屋企人唔會，更加唔會因為佢哋打唔到針，而割蓆分開同佢哋食飯。

而個啲特登劃分左 clean zone 嘅餐廳，究竟係得定係失，會唔會 clean zone 個區只會空置？會多左客定係少左客？可以分到clean zone 出嚟嘅一定係大酒樓、大餐廳，大部份「黃店」 店面細到根本無可能再分割，呢一招，唔知會益左佢哋，定係害左班一直支持政府「嚴正執法」嘅飲食界。

再講，邏輯上一間餐廳有「Clean Zone」，就一定有 「Dirty Zone」，即係個啲第四等南人用膳區。個班人無接種疫苗，被視為「 Dirty」，但係呢班咁Dirty  嘅客，係由同一班員工serve。頭先都講過，即使係接種左兩針科興嘅員工同顧客，都仍然有一半有機會受到感染，咁會唔會 Clean 嘅人其實唔 Clean ，Clean zone 同  Dirty zone 之間，會有交叉感染機會？

足夠誘引？

南深圳市長一直強調，因為市民對疫苗反應欠佳，所以要為疫苗接種提供誘因，放寛餐廳處所限制，就係其中一個誘因。經過一年以嚟嘅「防疫措施」，香港人同餐廳經已習慣哂點樣係呢啲咁荒謬嘅防疫措施下生活同營商，出名靈活走位嘅香港人，一早已經識得係將八人枱中間隔塊膠板，去「依法」地容許 4  x 2 人一同用餐；外賣大行其道，家庭式聚會已經成為社交新常態 。試問，香港人又點會因為想唔要塊膠板同枱食飯，而冒生命危險去打缺乏足夠保護能力嘅疫苗？所謂嘅誘因，係咪真係有任何吸引力 ？

再者，第一等人同餐廳宴會可放鬆至100 人，有無可能一個宴會入面嘅賓客，會全數都已經接種疫苗後 14日先去赴宴？再親嘅親戚朋友，都唔會因為要去飲宴而打針。放寛宴會最高人數，最多只能提供誘因俾餐廳去迫使員工接種疫苗，如果一張請帖要求所有賓客赴宴嘅前設，係要係婚宴前 14 日完成兩針疫苗接種方可赴宴，我敢肯定當日宴會必定門可羅雀，慘不忍睹。

呢啲真係屬於「誘因 」？

執行性

越複雜嘅法例執行越困難，以上嘅四等分類，將本身現有嘅政策再架床疊屋，將複雜變成更複雜，無論對餐廳定係對執法部門而言都係一大挑戰。執法部門相對簡單，越複雜嘅法例，前線手上嘅「斟情權」越大，最終淪為南深圳新常態：「我說了算」。

但餐廳處所則不一樣，要甄別顧客有無打針，打左一針定兩針，打左兩針後夠 14日未係一大挑戰。宜家打針後有張「針紙」，寫低每人接種疫苗嘅日期同時間，要入 clean zone ，係咪每位市民日後要日日袋住將針紙，向餐廳出示？咁麻煩嘅嘢，有無人去做？一枱 12 人有一兩個唔記得帶針紙，係咪要分開枱坐？個兩位麻煩去番 dirty zone 食自己？如果係咁，呢種放寛又有咩意思？ 推行嘅人有無諗過執行細節？根本並不可行。最終，無論餐廳定係顧客，都會基於以上種種原因，自願淪為第四等南人，一切如常。

一致性

如果 「疫苗氣泡」 係抗疫新方針，往後所有政策都根據疫苗接種狀態去放寛、調節政策，餐廳處所、探訪醫院、院舍、放寛旅遊限制，政策方有一致性。但係係同一日，南深圳政府宣佈「回港易」與「 來港易」兩個計劃擴展至其他內地省市，毋須強制檢疫來港，亦無任何疫苗接種要求。相比起本地嘅餐廳，處所針對性嘅疫苗安排明顯有不對稱性，對於急於向北獻媚開關迎北水嘅南深圳政府，當然係重中之重，但係政策嘅不一致性，大大削弱左市民接種疫苗嘅誘因。

關於遊旅限制亦都係一樣。 若果台灣係「中國自古以來不可分割嘅一部份」，點解擴展內地省市免檢疫通關安排，並無提及台灣？若果只係考慮疫情同科學分析， 點解對「低風險地區」回港人士縮短強制檢疫安排至七日，包括新加坡、澳洲、紐西蘭，但係對一個比上述地方疫情控制得更好嘅台灣不發一言？

箇中原因，大家心照不宣。當局越強調一切均無政治考慮，香港市民更加心領神會，一切都係政治考慮。開關如是，疫苗如是，大家心照不宣。

呢種政策錯配同離地，同政府一直以來「家教式」由上而下嘅管治思維一脈相承，背後嘅理念係「天下之大，莫非王土；率土之濱，莫非王臣」。但係香港人從來都係理性，有獨立思考，應變力強，由下而上嘅群體。過去兩年，南深圳政府自己將僅餘嘅公信力一一摧毁，廣泛公眾對政府完全失去信心，先至疫苗計劃未如理想的根本原因，無論係疫苗定係封關，無論係民生定係選舉，一切考量均有政治考慮。

呢種public scepticism 係跨界別、跨年齡、跨顏色，亦都係香港現時最大共識。一日南深圳政府繼續以高高在上嘅「母親」心態推出政策，一日都唔會接到地，事倍功半，無論如何威迫利誘，疫苗計劃只會失敗，最終淪為北京眼中「忠誠的廢物」。