【Patron分享】究竟中資有托市嗎？ (Patreon)

承接連日討論，我這兩位金融業界網友就「中資有否托市」，各有不同的一手觀察。由於他們有名有姓，自然不便出名，切看大家傾向哪個觀點

【淡友】

關於中國人工托香港市之說，大家有很多不同理論，例如說人民幣先換美元再換港元之說，anonymous 外保外貸也是一說，A及B更吹到咩一萬億撐股市樓市。

但我嘅理論好簡單，第一，人仔兌港元根本有條金管局同人民銀行嘅line，人仔根本可以完全唔駛兌咗美元先兌港紙咁麻煩及間接，更加唔可能因多次港元觸及強方對兌保證而金管局要多次沽港元買美元。

第二，要掃高/頂住恆生指數，1998年金融風暴，咩試過囉，梗係掃成份股。咁點解成個市，唔係成份股嘅會升先? 美團小米中芯唔係成份股喎。仲有，掃成份股嘅最有效最直接嘅方法，咩就係用滬港通深港通條line，全人仔操作，用國內匿名資金買入即可，既方便又快捷，完全唔涉及匯率。我翻查滬港通深港通數據，條line冇日日爆喎，對比五月同六月數據，係，六月成交量利用滬深港通的確升了20%成交量，但係買升了20%，沽也同時升了20%，完全冇跡象托緊市。

第三，咁你要質低個市，或者依家個市唔值咁多，外資行嘅研究部最起碼要對股票價值重估。最影響大市嘅騰訊，點解d美歐資行分析員仲估到佢個價咁進取? 陰謀論者絕對可以話中美合謀推高股市畀美資撤退，但既然都陰謀到"中美合謀"，抗爭者應該更絕望吧。

好了，咁樓市又點，如果係中資買爆托住，點會在田土廳或銷售睇唔到。

所以，我都好想John Bolton講嘅係假，但要清醒判斷形勢。我係一d證據都睇唔到中資正在托市制造虛假繁榮。

【好友】

我唔知道人民幣對美元再換港元之説從何談起，亦都無留意有人有呢個講法。

中資早已在香港，未必一定要短期内調動北水落嚟香港先至可以短期内托市。香港股市每日成交先幾百億，喺市場未出現恐慌性抛售前，要托唔係好難。再加上實際上喺美國嘅錢，亦都真係有唔少係驚畀美國制裁，跟住啲回歸嘅中資股過咗嚟香港。制裁未開始之前，中資未需要開始撲外幣嘅時候，要托一下香港股市，唔需要勞師動衆喺大陸調動人民幣落嚟住。

其實我唔關心股市，亦都從來唔投資股票。我分析係從貨幣同埋成個金融制度出發。特朗普同佢班幕後嘅利益相關者（金主又好、大老又好，未必係集團，所以我只用相關者）在股票市場可以獲小利，但係最重要嘅戰略目標係人民幣。撬動咗人民幣嘅「調節/操控」匯率機制，先至能夠真正鞏固美元地位。

至於樓市，成交太少，加上各種印花稅壓抑成交，最近幾年一手主導，本身扭曲較多，如貨幣金融秩序無大異動（特別係因港幣動蕩而加息），未會見到大波動。