【讀者分享 🎬】 《幸彤在監獄》放映會觀後感 (Patreon)

昨日（6月1日）參與了《幸彤在監獄》的放映會。就係有關鄒幸彤嘅一套紀錄片，概述佢參與香港民主運動嘅過程同埋以訪問身邊同行者及好友去讓我哋更加立體地去了解呢一位現時身陷牢獄之中嘅香港女兒嘅心路歷程。老實講，睇完套戲其實心情都幾沉重，同時間亦都帶點慚愧，因為呢位年輕嘅女孩，背負着嘅竟然係香港整個民主運動其中一條最重要嘅支柱，而且無畏無懼堅持住自己嘅信念，就算身陷險境，明知以身犯險，都仍然秉持及堅守信念。

紀錄片在全球多個地區，包括澳洲、加拿大、英國及台灣都有播放。響雪梨，我參加咗嘅嗰一場，係由新成立嘅組織《香港時空》同埋《澳港聯》聯合舉辦，放映會後更有座談會討論有關香港人如何秉承維園精神，邀請了前立法會議員黃震遐醫生、前立法會議員許智峯、以及前「港語學」創辦人陳樂行為客席嘉賓，涵蓋了老中青三代，實在別具意義。他們三位都分別對8964嘅認知以及多年來參與集會嘅經歷同在場人士分享，透過佢哋三位去詮釋六四事件、當中黃醫生親身接到北京電話，許智峯當時只係幼年期，陳樂行當時根本未出世。所以成個討論，就係我哋作為經歷過8964嘅一代，以及經歷過參與維園集會嘅一代，一齊表達如何將我哋親身經歷嘅記憶，傳承俾我哋下一代，令到佢哋唔好忘記呢件慘痛嘅歷史。

隨著中國政府不斷去嘗試清洗有關8964嘅歷史同埋喺人們心目中嘅記憶，作為旅居海外嘅香港人，我哋有責任去將呢段歷史傳承，我哋要去追討嘅嗰個公義唔單只係六四天安門屠城嘅責任，對於香港人嚟講，更加係2019年反送中運動之後將香港毁滅嘅責任。以前我哋話我哋明白民運人士嗰個悲痛，以前我哋對於嗰啲流亡嘅民運人士表示同情及了解，正如許智峯所講，如今我們感同身受。

《幸彤在監獄》所展現嘅，係鄒幸彤嘅勇氣、決心以及對香港民主運動無私嘅奉獻。她不只是在香港為民主奮鬥，原來在世界各地，東南亞、日本、英國等地方，也有她的同路人。香港嘅幸運，係能夠出到一位咁出類拔萃嘅民主鬥士；香港嘅不幸，係一個朽壞嘅政權要將呢名民主鬥士置之死地。

那我們應該要怎樣去回應呢？閉口不言，鴉雀無聲？還是被那寒蟬效應嚇着，事不關己？香港人，我們不要被打到，不要被嚇怕。若然回憶是罪，尋找真相是罪，那麼，真理及正義是否已經被埋葬呢？要掩耳盜鈴到幾時呢？如果我哋依然逃避，在這混亂、真理模糊嘅世代，終局，還會遠嗎？

不能忘記，

不敢忘記，

不可忘記，

不會忘記。

▶️ 支聯會副主席鄒幸彤：就算坐監，我也繼續到維園悼念六四
https://www.youtube.com/watch?v=FAKOcrhV5FU