【國際運動場：讀者分享 ⚽️】 顛覆「國安」概念：國家隊都可以揀嚟踢？ (Patreon)

沈教授及各會員好，又係我哋吹水交流嘅足球看國際關係。今次我哋講下原來國家隊都有得揀嚟踢。

我先好粗略咁講成為國家隊成員嘅資格（好波就有得揀，唔好波就剩係俾人揀）：根據國際足協規章，任何註冊足球員都具備代表該出生地，或持有該國籍的國家、或父母、祖父母（包括外祖父母）其中一人的出生國家的資格，還有要經該國足球總會承認。我叫呢啲做原生地、or有血緣關係資格。呢一種就好簡單，國際足協通常99%承認代表資格（除非缺乏文件證明）。

另一種就係歸化，or入藉後取得該國護照or身份。有好多國家娶或嫁後的另一半，係可以得到對方的國藉（當然好多國家要居住滿一定年數及通過考核）。咁唔經過婚姻，而取得該國國籍，就似技術移民嗎，在該地生活和工作一段日子後得到該地區身份（例子香港、日本）。以上呢種方法，就有陣時國際足協係唔批准，就係歸化/入藉球員唔可以代表另一個協會成員國出賽A級賽事（友誼賽唔計）。

仲有一種係國家隊成員轉換另一國家隊踢情況，就係原先國家已經唔存在，或該國家演變為不同國家。例子有前蘇聯解體後，本身蘇聯主體變成俄羅斯，及再有若干前加盟國獨立，前蘇聯球員有一次權利改變代表國。南斯拉夫亦如是，巴爾幹半島就有塞爾維亞、克羅地亞、黑山、波黑、斯洛文尼亞、北馬其頓及科索沃。

好！講完啲咁悶嘅條文，我哋就講下啲球員國籍同關係。大家有冇諗過父子、兄弟係會代表唔同國籍呢？

首先講父子先。大家記唔記得90年代AC Milan前鋒Weah呢，佢係第一個拎金球獎嘅非洲球員（國藉係利比里亞），退役後仲做過該國總統。利比里亞呢個國家嘅成立係由美國支持下建立的（沈教授之前有專文介紹過）。喺同美帝有歷史關係下，佢送咗啲仔女去嗰度成長讀書，其強大足球基因影響下，其中一個仔Timothy Weah已經代表美國隊出賽了。呢種好似香港人父母咁，有機會就送子女去第二啲先進、更優質學習環境地方學習成長一樣。

講完父子之後我哋講下兄弟。呢對叫Xhaka兄弟，阿哥就代表阿爾巴尼亞，細佬就踢瑞士國家隊。球場成就上係細佬勁啲，今屆利華古遜聯賽不敗奪得冠軍，細佬係隊長兼主力。本身其家族就係阿爾巴尼亞人，但老豆喺前南斯拉夫係政治犯，坐過政治監，之後就舉家移民到瑞士。兩兄弟都係喺瑞士出世，但阿哥選擇其血緣國，細佬就揀出生地，兩兄弟仲喺2016歐國杯決賽週同組對決。講多兩樣關於細佬嘅事，佢踢波都算「硬朗」之餘，亦勇於表達「政見」，試過一次喺國家隊慶祝時同Shaqiri做出雙頭鷹手勢。

呢兩位球員都有科索沃血統，屬於科索沃嘅阿爾巴尼亞人。曾經喺科索沃成位國際足協一員後，想改為代表科索沃國家隊，可惜FIFA唔批准。可見就算代表另一個國家踢波，亦不忘其本身的根。

此例子可供海外港人共勉之！

再講另一對兄弟，佢哋就係Boateng，他們係加納血統，但出身喺德國柏林。不過佢哋就同父異母兄弟，大佬Kevin就揀加納踢，細佬Jerome選擇為德國出戰。Boateng家族有老豆阿叔踢波維生，咁佢哋就同Xhaka兄弟唔同，Boateng係因父親喺歐州踢波、而喺歐州出世，Xhaka就係避秦而到瑞士，亦反映到經濟移民還是政治難民的爭議，喺足球界亦存在。

我哋今次未講完，仲有關於球員代表第二個國家的代表隊故事，因篇幅較長，及想和大家交流一下，所以我哋下期見。

▶️ 劉舜文：德國聯賽堅拒商業化，還可以堅持多久？
https://www.youtube.com/watch?v=qYn9ZOX5qno