【讀者分享 ⚽️🇧🇪🇳🇱🇪🇸】 足球國際關係之隊中有隊 (Patreon)

沈教授、各位會員好，又係我講下關於足球界嘅國際關係。今次想講嘅就係一個國家足球隊裏面嘅派系。

首先我哋睇下歐盟總部所在地嘅比利時。比利時對香港人（尤以港女）最為熟知就係朱古力，之外仲有Waterloo呢個地方，拿破崙戰敗之地（油麻地地鐵站以前就係呢個英文名）。其實呢個國家九十年代都叫勁過一陣，有「歐洲紅魔鬼」之稱，不過內部就有兩派之爭，源於比利時兩大語系族群，一派講法文，另一派就講荷蘭文（弗拉芒語）。長期兩派互相唔妥大家，喺咁情況下，好難有突破。

直到2000年左右，有一批前殖民地剛果(梅賓沙兄弟)入選比利時國家隊，開始有啲起色。去到近廿年，再有一些北非難民後代（費蘭尼）加入，而且剛果族裔第二、三代嘅盧卡古、甘賓尼崛起，最好成績去到世界盃季軍。當時嘅教練係西班牙人馬天尼斯，呢一點其實有啲得益，由一個外國人嚟教，唔好講佢本身執教能力有幾高，單單唔需要點理入面係乜族裔人，單睇能力選人，已經煩少一樣嘢。比利時咁啱撞正人才大爆發，正常排陣正常戰術就可以有第三了。

之後我們講下比利時鄰居荷蘭。本身荷蘭喺七十年代開始勁，有告魯夫、尼斯堅斯、阿里漢（佢退役做過某強囯教練），呢一批人得過1974（決賽11人全白人，無現在咁多黑人及混血）和1978年世界盃亞軍（不過當時告魯夫無踢決賽，沈教授之前有講過呢件事）。之後就沉寂咗十年（82,84,86呢幾屆大賽入唔到決賽週），去到1988年，先拎到歐洲國家盃冠軍。

點解又會咁突然捧到盃，就係有蘇里南裔選手入隊，「荷蘭三劍俠」其中兩個就係嚟自荷蘭呢個前荷蘭海外構成地，有大量新嘅人才加入，成績當然就係好，加上當時教練係米高斯，佢喺荷蘭足球係教父級存在，梗係鎮得住不同派系，1988順利奪冠。不過荷蘭呢個國家嘅人係好鍾意表達自己意見，內訌就一直係傳統。其實都關新教徒事，荷蘭新教屬於加爾文教派，又係提倡自己解讀《聖經》，咁樣訓練下嘅人民，一定有自己一套。

今篇最後就講下同之前兩個好有淵源嘅國家，就係西班牙（比利時同荷蘭以前都受西班牙統治過）。西班牙國家隊都係近代先拎到世界盃冠軍（2010），之前都拎過歐洲國家杯冠軍（1964,2008,2012）。西甲長期由皇馬同巴塞領頭（馬體會都係馬德里市球隊），我哋可以睇成地方對抗中央咁理解，咁有乜地區搞「對抗」呢？有加泰隆尼亞、安達魯西亞、巴斯克、華倫西亞呢幾個大區，都係分處於西班牙周邊。其中加泰和巴斯克有濃烈獨立意識，所以該區足球隊有其特色。例如巴塞長期同皇馬爭執牛耳，就有深層對抗元素在內。而巴斯克嘅畢爾包，就堅持只起用巴斯克血統球員（近代就改為該地區成長球員）。

不過西班牙政府又唔係由得該地區球隊「作為精神領袖」存在，中央政府會「扶持」另一隊抗衡。畢爾包就有皇家蘇斯達，西維爾就有皇家貝迪斯，華倫西亞就有維拉利爾，巴塞隆拿就有愛斯賓奴（無女球王效力過），後兩者隊徽有皇冠標誌。喺咁情況下，點都會有球員抱有特別心態去踢國家隊。2010拎到冠軍，就係由迪保斯基帶隊，佢就有濃厚皇馬色彩背景，但踢法用巴塞tiki-taka，用激勵方式令兩邊合作。

從以上睇到出，全球化下對國家隊選才係有所得益，加上二戰後解殖運動，令足球足有一個全新面貌出現.。講住咁多先，有機會再講，感謝！

▶️ 加拿大會員 Chad：北美四大聯賽特色，和英超有何不同？
https://www.youtube.com/watch?v=8sHXLqASJ6U