【讀者分享⚽️】 回應北美足球會員訪談：歐洲足球的階級政治 (Patreon)

我見有朋友講關於歐洲足球界，小弟不才略講一下。

歐洲因有不同國家，所以各自都有職業聯賽，都隸屬於該國足協 （除英超例外，因英超由20隊球隊「名義」成立公司所營運，所以有重大決策要20隊投票通過）。而聯賽分為不同層級，正如Konger FC咁樣成立一支新球會，在符合該聯賽標準下就可申請加入，由最低組別打起，有野心、有實力下，可以打到該國最高級別。

我哋可以從中睇到歐洲運動（尤其足球），係傾向每個人或該區域人士可組隊參加，係歡迎任何人參與下，有實力就可以向更高水平進發。亦有「懲罰」不思進取嘅球隊，就係降班。在足球史初期，就已經形成該區域有志之士「跟隊」參賽，咁喺同區「兄弟波」一齊玩，就會形成有特色嘅球隊及打法。

好似倫敦現有英超球隊下，已經因應地域所在位置有不同氣質。好似富咸、車路士位於富人區，就同發蹟兵工廠嘅擁有工人階級的阿仙奴有所不同。單單富咸同車路士之前各自兩位前班主，佢哋潛在最終目的，就同一般班主唔同 （一位為打入上流社會、一位為保命）。

大家留意下足球運動，如果球會處於工人階級龐大區域下，喺百年足球史發展中，擁有收入及選才優勢。選才方面，有一個例子就係些路迪1967奪得歐聯冠軍時的正選11人，都係喺格拉斯哥市範圍發掘出嚟 （不過呢個全球化前才有嘅情況）。呢啲就係沈教授常講嘅地緣政治微型版。

不同北美各大聯賽固定一個level、無升降班制度，其實有一個原因就係保障投資方，確保所投資嘅金額唔會有所減少 (次級聯賽收入分別會好大) 。不過NBA及MBL其實有次級梯隊處在，但係用嚟培養球員，因為培育人才方面，美帝喺交予美國各級學校去養成，歐洲就直接由球會梯隊訓練。

而日本和韓國就另有體制。日本係雙軌制度，球會及學界都會有人才出現，三千分就係選擇修讀築都大學，然後出道。反而韓國近似美帝，由學校訓練，其中一個原因，係運動出色的學生入讀出名大學(SKY三大)機會，居然同普通苦讀生差不多，呢個已經好大誘因。最後出道成為職業球員，由韓國職業球會從中選秀。

題外話：係足球初期發展，由現代足球發明嘅英國輸出，咁英國喺19世紀仲係日不落帝國、即係海權國家，咁其他國家接觸及發展足球，就出現喺沿海城市。好似意大利嘅熱那亞，佢嘅隊徽就有聖佐治十字旗；阿根廷最初接觸足球城市，就係布宜諾斯艾利斯呢個港口。所以南美好多歷史悠久嘅球會都處於港口，加上港口勞動人口集中，發展呢種基層運動比較容易，呢種都係英國軟勢力彰顯。

還有想講多一句，幾佩服美帝為咗平衡球隊所在地區優劣勢，發展出一套選秀及薪酬制度，好符合美帝「表面」國情，盡量喺平均和平等環境下每個人有出頭之日。美帝強大係有原因，運動喺美帝入面就好似牛仔精神，而歐洲就係多元發展其中一個出路，有機會再講。

▶️ 加拿大會員 Chad：北美四大聯賽特色，和英超有何不同？
https://www.youtube.com/watch?v=8sHXLqASJ6U