醜股大翻身（結局篇，上）　—　美股標普指數成份股，又係咪見到有「物極必反」，醜股大翻身？至少2023年係。 (Patreon)

標普成份股，又係咪有「物極必反」，醜股大翻身？

呢排嘅玩法都係「純量化」，但都有佢嘅好處

好多你所謂「知道」嘅消息，都大半反映晒在股價，價值係冇乜

Facebook 蘋果，咪又係年年做嗰啲嘢。但升時又有理由，跌又有理由

Nvidia今年升嘅，啲「利淡理由」咪冇人提囉。跌，咪有人提

加息減息，封關開關，升又升過籠，跌又跌過籠

首先做Back test，睇下標指成份股係咪「物極必反」。另外講啲技術問題

2022年，標指最強 20隻，下年點？最差嗰20隻呢？你估下？

留意2022年最差嘅標指成份股中，有兩隻2023年爆咗煲

冇乜必要，就唔好買中小型銀行股了

好似好美好，但只係睇22/23。如果睇21/22呢？

1. 兩日冇出文，因為搞呢兩篇大作。未必好長，但用嘅時間絶對係一篇等於三四篇，主要就去搞堆Excel—今年都係會畀多啲呢啲嘢大家

標普成份股，又係咪有「物極必反」，醜股大翻身？

2. 各位觀眾，去到最終回嘅上集。睇下美股標普指數成份股嘅「物極必反」同「醜股大翻身」。順便睇下，今年買乜股。

呢排嘅玩法都係「純量化」，但都有佢嘅好處

3. 補充少少，呢排呢堆嘢，都係「純量化」嘅玩法。我完全唔會同你研究美國經濟衰唔衰退，甚至唔多理係咪減息，唔理打唔打仗，甚至唔理咩行業前景，乜嘢技術

4. 其實呢種做法有佢嘅好處，我甚至覺得你應該多啲用，信啲冰冷嘅數字。因為始終個重點係，大家「知道」嘅好多所謂消息同事情，根本已經好大部份反映晒在股價。

好多你所謂「知道」嘅消息，都大半反映晒在股價，價值係冇乜

5. 好簡單，你拎住一堆某一年表現好嘅股票，咁梗係有理由架啦，實有理由，冇你都作到有。而好似呢啲理由下一年都仲存在　—　但點解股價上我地反而成日見到唔係咁？反而見到「負相關」？呢啲唔多唔少同估值有關。升又升過籠，跌又跌過籠

Facebook 蘋果，咪又係年年做嗰啲嘢。但升時又有理由，跌又有理由

6. 具體講，例如Facebook 或蘋果。喂，近N年都係做嗰啲嘢架啦。但做乜2021年好掂，2022年香晒，2023年又掂返晒？你話加息，扯，難道2023年就冇加息？咁你話炒預期減息。係嘅，但都係事後講　—　亦可以肯定，無論今年升定跌，你都可以事後搵到啲「理由」　—　甚至唔使事後，而家你搵定理由都得。只係如果升嘅，你啲「睇淡因素」咪冇人提，冇出現過。跌嘅，啲「好消息」咪冇人講。

Nvidia今年升嘅，啲「利淡理由」咪冇人提囉。跌，咪有人提

7. 一個最簡單嘅例子，Nvidia。如果今年再升？扯，咪AI需求仲係好勁，最新台積電業績又強（我知，我有睇，ASML都係咁升添）。但跌嘅？一句話估值離譜，仲未見減息，就解釋到

8. 以上呢啲都講過。所以雖然唔係話完全唔睇唔講呢啲嘢，但純量化又有純量化嘅好處。舊年德國經濟收縮添，德股大跌你咪話經濟唔掂股市實食，但而家唔跌你咪話只係技術性，任你講。

加息減息，封關開關，升又升過籠，跌又跌過籠

9. 仲想補多點：呢種「物極必反」，當然亦係反映「恐懼與貪婪」。近四年你見到極之明顯，因為真係有啲大事發生。2020年世紀疫情，嚇死人，經濟停頓，但之後聯儲局無限QE，咁股市又大升。但到「復常」後，反而股市就唔得。特別係一大堆「封關股」Work From Home股，散晒。咁事後睇，明顯係炒過籠。當然你可以拗話「疫情過後習慣都唔會變」，但你睇Zoom之類，明顯係過晒火位，而家股價得返高位10%左右（但你要事前判斷咩位先炒過籠，就唔係咁易，雖然你睇price to sales之類都得）

10. 講返正題。今次嘅做法，十分簡單，同之前睇恒指成份股一樣。首先我咪做下back test先，睇下之前啲年份，最勁嘅標普成份股，係咪下年就唔掂。最唔掂嘅，係咪下年就掂。

首先做下Back test，睇下標指成份股係咪「物極必反」。另外講啲具體問題

11. 恒指因為得八十幾隻，就比較易搞。但到標普指數，你去做會有啲技術上嘅問題，話定你知。特別係用我個Excel Template（又attach畀你）去睇全年股價表現，就會遇到一啲問題

12. 首先，有啲嗰年表現最好嘅公司，根本係年中先上市，咁我睇全年股價就睇唔到佢表現。當然你可以每隻搵返幾時上市，但太煩了。第二，相反地，有啲係之後跌到除咗牌，爆埋煲，咁你又係搵唔到下年嘅表現。當然仲有有啲去到中途畀人買咗。

13. 上面呢啲咁嘅東西，要解決都係可以嘅，但極煩，你要逐間公司搞。所以我呢度就唔搞了。犧牲少少精準，但慳返多多你同我嘅時間。而我相信對大局影響唔係太大。

14. 仲有最後留意，圖入面有時啲source係計total return，計埋派息。但我個Excel 就冇計呢啲。咁又係總有啲偏差。但同上一段講嘅嘢一樣，在好精準同快手之間，做個取捨。

2022年，標指最強 20隻，下年點？最差嗰20隻呢？你估下？

15. 嚟啦喎，睇圖，2022年標普成份股，最強就係呢20隻。

16. 咁好簡單，我將呢20隻放去個Excel度，睇下2023年咩表現。

17. 時間同版位關係，我唔cap個圖，但你可以開個Excel check返。下面我只講結果，唔cap圖。

18. 2022年呢20隻最好嘅，去到2023年，平均只係升4.5%—而美股2023年升28% 。咁即係呢堆嘢大幅跑輸。唔止，20隻入面，跑得贏大市得幾隻，而最叻嘅都唔夠40%—　證明「追momentum」好似真係唔太 work

19. 2022最差嗰啲呢？一樣，唔cap圖但你可以開Excel嚟睇。去到2023年，呢20隻嘢，平均回報16%　—　都係跑輸大市

20. 但首先，呢堆「2022輸家」在2023嘅表現，已經好過「2022贏家」嗰堆好多。另外，呢堆「2022輸家」中，不乏2023年升一兩倍嘅，似乎都係OK抵搏

留意2022年最差嘅標指成份股中，有兩隻2023年爆咗煲

21. 另外更重要嘅係：留意2022最差嗰堆嘢當中，有兩間嘢2023年係total loss—正係兩間細銀行，Silicon Valley Bank同Signature Bank，2023年頭爆咗煲嘛。你唔計呢兩間的話，剩低嗰18隻，回報29%，就跑贏大市。「都係支持我地個物極必反理論」

22. 你話，嘩，咁狗？Total loss就唔計？係有啲狗的。不過話說回頭，最初，同埋而家，我都仲係會告誡你呢樣嘢：真係唔好買啲中小型銀行。原因嗰時都講過：聯儲局近年啲作風，似乎真係會「救存戶唔救股東」，好多時銀行救到，但股價都係冇晒

冇乜必要，就唔好買中小型銀行股了

23. 亦因為咁，所以一般叫你唔好走去買KRE—後來雖然有得升，但根本都係跑輸大市。亦同樣道理，而家唔好買啲咩內房股內房債　—　一樣係救得到都會大幅攤簿你。債券嘅就可以重組，hair cut　—係呀間嘢冇事呀，但你一樣輸大錢。所以唔好咁表面，唔好只係去諗「間嘢會唔會死」。間嘢唔死，但你會死。

24. So far，係咪幾好呢，完完全全就畀你見到：2022年掂嘅，2023年跑輸。2022年唔掂嘅，2023嘅就幾好，有啲升一兩倍　—　特別係你踢走嗰兩間銀行後。

25. 好似好美好，咁我地即時睇下2023年邊堆嘢最差咪得！

好似好美好，但只係睇22/23。如果睇21/22呢？

26. 不過有一個問題：上面我只係做咗2022同2023。如果做多年，你估情況又會點？下篇講。但預告定：我咁講得，當然2021同2022嘅情況，就冇咁靚仔了。咁點算？下篇解

27. 下篇就真係大結局了。睇下會唔會今晚出埋。心急嘅，你自己亦可以開個Excel睇。