醜股大翻身（三）—港股大市又點？（有埋個Excel）．另外睇埋一啲常見嘅誤區 (Patreon)

埃汾話避開美國科技股，但納指呢期幾強，Nvidia 破頂，點算？

保持大約平衡，最緊要唔好人人賺錢你冇份，好大件事的

除非有好大轉變，咁到時話你知　—　但亦唔好怕「轉軚」

自己做你嘅數字，唔好信人地。冇時間？就只係集中睇幾樣嘢

美股同「歷史市盈率」比平貴，咁用幾多年？5年？10年？20年？

睇多啲唔同嘅嘢

千萬唔好先有結論，然後搵數字支持　—打工可以咁，自己錢唔好咁玩

好啦，睇埋恒指嘅「負相關」，又如何？

如果由1987年開始計又點？1998呢？

不過如果睇2009至而家，又好似唔係好同

結論？股票按年回報，就真係按年負相關。唔強，但幾肯定唔係正相關

上篇睇完美股嘅「負相關」，今篇睇埋港股大市。下篇就睇個股

1. 一路幾篇都係會繼續講「醜股大翻身」，不過嗰頭話完唔買美國科技股，呢頭就見到納指忽然強勢，Nvidia就破埋頂。我嘅想法？冇乜特別。首先唔好只係睇幾日。另外仲有，你話好賴皮都好：我同你同埋所有人，當然係可以錯的。

埃汾話避開美國科技股，但納指呢期幾強，Nvidia 破頂，點算？

2. 所以雖然呢刻問我，我都係答你避開美國科技股，但全年最後佢地真係跑贏　—　又有幾出奇？你話好賴皮都好，唔係升就跌架啦，唔係跑輸就跑贏架啦，唔係啱就錯架啦。真係唔好笑唔好嬲唔好講粗口，因為我應寫過幾百篇文講，重點並唔係你或我「啱定錯」，而係你點去多手準備

3. 實際上當然又係睇持倉比重，咁我都早早買咗Nvidia啦，一股不沽，冇止蝕冇止賺，唔使「食糊」take profit，佢呢期喪升我都分享到。正如我都唔少QQQ。

保持大約平衡，最緊要唔好人人賺錢你冇份，好大件事的

4. 總之經驗所得，最緊要避免「人人升你冇份」，甚至人人賺錢你輸，保證對你身心打擊極大，仲會影響你成套思想，令你成世都行錯路。例如過去幾年你齋買港股就會咁。又或者，你見啲嘢係咁升，一啲你睇唔起嘅人都贏錢，嗰種心理不平衡係極大的，你往往就會有一日忍唔住飛入去。好多人就係咁樣貴一貴all in，然後輸錢，然後立誓以後唔買股票，覺得係騙局。

除非有好大轉變，咁到時話你知　—　但亦唔好怕「轉軚」

5. 但你問我，我今年嘅心水，一定唔會係Magnificent 7嗰堆嘢，雖然我仲持有，但唔會加。除非之後有好大嘅轉變，到時話你知。亦唔好執著咩「轉軚」—凱恩斯名句：When the facts change, I change my mind - what do you do, sir？　—　相當有趣地，你見好多人日日睇股票，跌幾個%就嚇親或者要獲利—但就期望「大行」「KOL」「老師」年頭講嘅嘢全年都準。唔覺得有矛盾？呢刻我當然同你講領展抵買，假設佢升多兩倍，就當然唔係咁抵買

6. 講港股之前，可以補充多一樣嘢。之前我睇美股，都用咗三個時間。1928至而家，1971到而家，2009到而家。你鍾意可以自己加。

自己做你嘅數字，唔好信人地。冇時間？就只係集中睇幾樣嘢

7. 我想講嘅係：自己做數字嘅重要。當然實際上你冇可能咁多時間。但如果你睇到某人講某啲嘢（包括我），你最好自己拎啲數字做一次

8. 唔係話佢呃你，而係話，會選擇性咁畀你睇。呢樣先最危險

9. 打金融工甚至普通工嘅讀者都知，你想達成某個結論，當然要懶係客觀咁搵數字支持。但點樣玩啲數字，就各師各法。

10. 稍後我會補充。但最簡單嘅，例如我睇美股平或貴，同返個「歷史市盈率」比。咁我拎幾耐？5年？10年？20年？

美股同「歷史市盈率」比平貴，咁用幾多年？5年？10年？20年？

11. 我想你想像一個情況：好可能，就係同5年相比係貴，但同10年相比係平，同20年相比又係貴。咁點？如果我想講美股平嘅，我想sell你買美股基金嘅，我咪畀個「同10年比」嘅圖你睇。但如果我想sell你買其他基金嘅，我想話畀你知「美股貴」，我咪拎5年嘅圖畀你睇！

12. 呢啲操作，大家可能都聽過，甚至做過。你都係會繼續中招的。點避免？幾個方法。最好，就係你自己做一次！

13. 但你心諗，邊得閒？咁所以，其實反而你唔使留意咁多嘢！例如你只係專注幾個數字，你咪可以自己專心睇。通脹你又睇租金你又睇美國落幾多雪你又睇烏克蘭反攻拎咗幾多土地你又睇，就死得。有涯隨無涯。呢個年代，唔係講資訊多，係要「減法」。

睇多啲唔同嘅嘢

14. 另一方法？睇多啲唔同嘅嘢。今年我睇呢條友講話「美股平」，聽日我見到第度話「美股貴」。咁我咪睇下點解有唔同嘅結論。可能佢地用唔同嘅量度。亦可能係同一個量度，但年期唔同。咁我咪會知道成件事係點。

千萬唔好先有結論，然後搵數字支持　—打工可以咁，自己錢唔好咁玩

15. 最棹忌係乜？就係自己有咗結論，然後搵啲「嘢」去支持自己　—　你返工可以咁做，但自己投資一定唔好咁做。我保證呢一刻，你一樣搵到證據話你知美股好平，亦搵到證據話你知美股超貴。只係睇你睇邊個

16. 至於應該「信乜人」，又係極關鍵嘅學問，以前寫過下，今篇唔重覆　—　但可以肯定嘅係，要sell嘢畀你嘅人，當然應該不理，因為佢有極大誘因去扭曲件事，睇下上面講sell基金嘅例子就係。大行分析員？一樣！大好友當然有誘因一路唱好，但「終極淡友」一樣係會死撐，錯九十九次啱一次就也文也武。

17. 我嘅角色，就已經相對「中立」。唔係話我一定啱，但首先我冇賣任何產品畀你，唔使引導你。但例如我打工，老細要我唱好香港股市香港樓市？我一樣可以搵到好多理由。

18. 咁但，最簡單，當然係你做你自己嘅分析。呢排做嘅呢啲數字，易搵又易明，係個幾好嘅開始。

19. 冇時間？好正常。「咁就唔好搞咁多嘢，個個月買SPY算啦」

好啦，睇埋恒指嘅「負相關」，又如何？

20. 照辦煮碗，睇埋恒指。唔多解個圖點整出嚟，Excel送埋畀你

21. 恒指歷史1964年開始，包晒所有數字嘅全餐嚟講，你見個圖同美股「全餐」好相似。近乎係平，即係近乎冇關係，但真係要計，係少少負相關。

22. 上次講美股可以1971年計起（尼克遜廢除金本位），但港股1971年到而家，咪同1964年到而家差不多！只係多咗幾年。所以唔貼個圖。但可以話你知，個圖就再斜啲，個R squared高少少，條線fit得好少少。即係個負相關再明顯多啲，呢個趨勢係同美股一樣嘅。

如果由1987年開始計又點？1997呢？

23. 但如果由1987年計起呢？睇圖，個slope就斜好多了。量化，呢個slope係負0.19，「全餐」係負0.01，1971至而家係負0.05，見到斜咗好多。今次R-squared去到4%，其實都係極低，但之前兩個（「全餐」同since 1971）差不多係零

24. 點解係1987？因為股災。同埋你睇唔少香港股市數字，都係1987年計起的，原因不明。

25. 再睇，睇下1998-2022。點解1998？政權易手嘛。呢度見到，再斜啲啦喎。Slope係負0.27，R squared 去到7%，其實仲係好低，但真係又再大咗。

不過如果睇2009至而家，又好似唔係好同

26. 不過不幸地，如果睇金融海嘯以後，拎2009-2022比，又再變咗好似零相關。唔多唔少因為最新嘅4連跌，啲點責晒在左下格。

結論？股票按年回報，就真係按年負相關。唔強，但幾肯定唔係正相關

27. 另外你可能質疑，我呢個圖做乜，做乜個十字架（x y 軸刻度）咁大，啲圖質晒在中間　—　因為，我保持同返上面每一個都一樣咁嘅十字架　—　否則你會仲亂，望落好似斜咗，原來唔係　—　呢啲就係好多人誤導你嘅方法。而因為遠古年代恒指波幅大好多（一年升100%都有），所以遠古年代嘅十字架，放到今日，個架就好大了

28. 結論？美股同港股，其實出年同前一年回報，都係一般「負相關」。唔會太強，但好似真係好少搵到「正相關」嘅時期（除非你特登去選擇性搵）。

29. 另外，似乎遠古年代反而個「負相關」冇咁多，近年係多啲嘅。原因寫咗。不過港股去到最近幾年，個「負相關」又細咗，原因不明，應該就係近期4連跌所累

30. 仲有，似乎一般嚟講，港股嘅「負相關性」，冇美股咁重。原因也是不明，你可以自己估。我估都因為人人買美股，市場比較有效率。

31. 下篇就真係講個股