今年唔高興嘅理由，可以有三種。兩種係自己犯錯，第三種就只需要調整心態 (Patreon)

美股今年升20%，差不多去到歷史新高。你有冇食盡先？

今年呢20%，易賺之極。全年都冇乜點跌過。

今年只係有一次10%回調，而正係入市良機。咁都嚇走，好難贏錢

今年咁易賺錢嘅，都冇食盡嘅。諗下點解—而唔係仲妙想天開試更高難度

唯一問題係有冇買得夠大，同埋一路食住—因為11月真係冇事發生

唔高興嘅三種原因：一係冇買，一係只買港股　—　呢啲都肯定係你問題

第三種原因：有買，買得大，但因為分散咗，嫌回報率唔夠高

調整心態：你100%美股，咪又可以諗早知全納指。早知全Nvidia

今次呢幾篇，會針到唔少人對「長期投資」同「分散」嘅質疑

港股坐幾年都係輸，咁啲人就認為股票唔應該長期持有。錯到無倫

難道我買WeWork輸死，就conclude買股票會輸死？

一句：買美股，贏錢定輸錢多？

「但美股都會迷失十年」—係架！咁你冇咩高見可以包贏錢？咪叫你分散

回帶：睇返之前講座講嘅「新錢配置」

講座時講嘅 4321  ETF配置，好差咩？今年羸10%

況且，四瓣一齊死嘅情況，真係極少（可惜唔係冇。舊年咪一齊死）

1. 呢幾篇會散散地，每樣講啲，但我覺得好值得睇返一啲成日講嘅嘢　—　會用多啲數字，同埋去回應一啲人嘅質疑。

2. 再講一次，希望之後寫返貼市啲。不過好似仲有個「美股迷失十年」要寫。況且年尾又要同大家回顧一下。

美股今年升20%，差不多去到歷史新高。你有冇食盡先？

3. 但今年嘅回顧真係簡單：一句：美股今年升咗20%，差不多歷史新高。你食唔盡嘅，就真係檢討下。冇嘅，點解？

今年呢20%，易賺之極。全年都冇乜點跌過。

4. 今年呢20%真係算極之易賺，全年近乎冇乜點跌過。咁嘅回調都受唔住，咁你好難贏大錢。有圖你睇，美股差不多每年都平均有一次10%回調。今年正係10月尾嗰次—然後就迎嚟11月嘅大升。所以，再恥笑一次，啲人同你講咩「高位跌咗好多」，「熊市」（回調20%）—根本就係買入機會。大家都見過幾次，但每次「熊市」時你同人講買，都大把人笑你。因為投資世界就係多數人係錯的

5. 亦順手答埋，好多讀者都會話，唔得喎，買得大嗰時，跌10%都係覺得心情好差。咁但，你都見到，2020年一個月跌30%，我都係咁坐住，成副身家喎。除咗係叫你「睇少啲股票，唔好同咁多人傾計」外，提供多個方法畀你。點解我唔驚？因為我深信會彈返上嚟。點解我深信？因為試過。你試得幾次，你都會開始有信心。正如今次10%調整，見到就係買入機會

6. 我知，你又會想問「咁港股呢？」—放心，我成個系列，有一半係用嚟招呼呢句嘢的

今年只係有一次10%回調，而正係入市良機。咁都嚇走，好難贏錢

7. 講返今年美股呢20%，相當易賺。冇乜點大調整，亦唔係兩三日升晒上去（雖然有9%係一個月內）。咁都執唔到，應該係出咗啲問題。首先諗下有乜嘢自己諗錯咗，做得唔好，而唔係仲妄想之後一年賺幾倍。咁低難度嘅嘢你都做唔到，做更加難度嘅動作，畀你做到，都只係好彩。而靠好彩嘅錢，多數都會輸返。

8. 換個講法，好似運動訓練咁，你試舉試跳唔成功嘅，應該諗下點解。而唔係再試個更難嘅。

今年咁易賺錢嘅，都冇食盡嘅。諗下點解—而唔係仲妙想天開試更高難度

9. （所以你見唔少人「賭」到第一桶金後，就唔再賭。呢啲係聰明人，因為知道再賭落去就會輸。黎智英，火燎森，索羅斯，大劉，或多或少都係咁。你總唔見火燎森碌卡買完中石油搵到100萬，之後再碌再買大啲。佢自己都知只係好彩）

唯一問題係有冇買得夠大，同埋一路食住—因為11月真係冇事發生

10. 即使你唔係全美股，甚至有埋港股拖累都好，今年都應該有OK嘅正回報。唯一嘅問題只係你有冇買得夠大，同有冇一路食住個升浪。特別係11月呢下嘅9%，好蝦人，因為好似根本冇乜「消息」 —唔係世界大戰打完，唔係俄烏打完，唔係中美修好（或美國炸咗中國，或掉轉），唔係疫情有特效藥，唔係經濟有乜好消息，唔係有新發明　—　就只係「憧憬聯儲局減息」—仲要只係憧憬。呢個11月話到畀你知，股市要升就升，唔使同你講理由，哪怕你覺得個「理由」點「冇說服力」都好。

唔高興嘅三種原因：一係冇買，一係只買港股　—　呢啲都肯定係你問題

11. 所以今年大家應該好高興。唔高興嘅只有三種原因。一係你冇買。一係你只買港股。咁呢兩種肯定係自己嘅問題，應該檢討下，肯定我Patreon每一日都叫你分散，100% invested．

第三種原因：有買，買得大，但因為分散咗，嫌回報率唔夠高

12. 第三種可能係你有買，買得夠大，但嫌回報唔夠高。例如因為分散咗，你嘅回報冇20%（呢個可能性好大，我估絶大多數人今年都冇20%回報，我都冇） -

調整心態：你100%美股，咪又可以諗早知全納指。早知全Nvidia

13. 呢種情況，可以話係happy problem。你嘅投資冇乜問題，根本做得幾好，只係要少少心理輔道。好簡單，調整心態　—　到你100%美股VOO，食盡20%，你咪又可以覺得「早知全部QQQ」，40%一年。就算到你全部QQQ，你一樣可以覺得「早知全部Nvidia」—無止境的。但你要明白，你會咁諗，應該已經係幾貪婪，小心貪勝不知輸。因為到跌市嗰時，你又會慶幸自己個倉冇高位跌六七成（買指數應該好難，個股就會）。

14. 換個角度講：有20%回報固然好，但即使「只係」得10%或高單位數，都唔使點灰心。特別係你銀碼買得夠大嘅話。年年高單位數，已經幾好。但真係要買得夠大。

15. 今次呢幾篇做少少Mythbuster，用數字嚟說話。不過講到尾，好多都係思考上嘅謬誤。所以點解成日講「心法」。

今次呢幾篇，會針到唔少人對「長期投資」同「分散」嘅質疑

16. 會針對兩樣嘢，就係「長期投資」同埋「分散」，兩大嘅核心信念。但依然唔少人唔信，甚至會反駁。

17. 有趣嘅係，佢地「反駁」嘅例子，往往就係拎「港股」。呢度已經見到一個好大嘅問題：你比最接近嘅嘢，最熟悉嘅嘢，框住咗你對世事嘅睇法。

港股坐幾年都係輸，咁啲人就認為股票唔應該長期持有。錯到無倫

18. 港股長坐都係輸（又其實，係咪真係？由幾時計起？收埋息呢？），有人就認為「長線都會輸」（又，其實冇一種投資係「唔會輸」的，這也是基本心法）。有人認為Buy and hold已死

難道我買WeWork輸死，就conclude買股票會輸死？

19. 呢種想法，就好似你見到WeWork破咗產，輸死。然後認為買股票就係會輸死　—　買股當然有「有機會」輸死（所以咪叫你分散！）。但，其他升幾十幾萬倍嘅股票你唔講？幾年前我買一隻Nvidia 一隻Wework，兩隻一齊長坐，咁最後係贏錢定輸錢？咁你話「你只係選擇性拎Nvidia做例」—咁最初講嗰個，又何嘗唔係選擇性拎WeWork做例？

一句：買美股，贏錢定輸錢多？

20. 咁唔好拎個別例子，拎成個美股睇：一句，標普指數，過去咁多年買。贏錢定輸錢多？唔順嘅。畀多次呢個圖你睇。

21. 或者簡單啲，呢個圖都得。自己慢慢掟飛鏢

22. 當然，美股都會迷失十年（其實誇張咗），咁你話「美股坐十年都會輸錢啦」—難道咁就可以否定唔應該買美股持有？大把人坐到發達添你唔講？

23. 仲有，冇錯頂位買美股，在嗰十年都會輸錢　—　但邊個話你知有方法可以「永不輸錢」？而上次篇文嘅圖，已經畀你睇到，長坐咪將輸錢嘅機會減到最低。但你又要鬧做乜叫你長坐。

「但美股都會迷失十年」—係架！咁你冇咩高見可以包贏錢？咪叫你分散

24. 同樣地，美股嗰十年好差　—　但之後嗰十年升到幾個開你又唔講？而呢個例子，根本亦畀你見到，點解應該長期持有。因為打後十年你就爽過唔過。「咁之前十年呢？」—　之前十年咪係其他市場好！所以咪叫你分散！但又鬧話「分散拖低回報」—咁想點呢其實？

25. 你會見到唔少人，始終心入面都係想捉到最低，然後最高沽。但，真係有咁易？今時今日你梗係可以笑買港股嗰啲係傻仔　—　咁但你諗下，在「迷失十年」入面買美股嗰啲人，係咪個個都傻仔？你叻過晒佢地？又應該唔會啩。

26. 況且，遲下會再寫，但在「迷失十年」—　你分段買，就早已經返咗家啦。所以啲人用呢樣嘢反駁「stay invested一樣死」—其實正好相反。只要你唔係捉到最頂買，美股個「迷失十年」根本唔係咁大件事。更何況，其他市場做得好。

28. 預告：我知你會話—只係美股係咁啫，美股就長坐必勝（雖然都仲有人要拗中間有迷失十年，而我唔知點樣可以保證佢贏錢）。「咁但港股呢？」—嚟緊我地咪睇，到底美股係常態，定港股先係常態。況且唔好忘記，美股市值大好多。你買啲「全餐指數」，都係主要美股。所以當然以美股為準。

29. 另外，講得太多理論嘢。畀啲實際數字同例子你

回帶：睇返之前講座講嘅「新錢配置」

30. 首先，上面呢個東西，係我今年年中嘅一個講座，華泰（中環中心）嗰次。上面個兩個大原則最重要。但嗰日都有人問個4-3-2-1，其實唔係我而家嘅配置，係講「新錢」

講座時講嘅 4321 配置，好差咩？今年羸10%

31. 咁你可以自己計。你Date back年頭又好，兩年前又好。你由年中開始計又好。40% EMXC，30% IDEV，20%VOO，10%盈富基金，好差咩？肯定係有錢贏（幫你計埋：年初至今就10%，下半年就剛好贏少少）

況且，四瓣一齊死嘅情況，真係極少（可惜唔係冇。舊年咪一齊死）

32. 況且有個好處：呢四瓣嘢一齊死嘅情況，真係極少（但當然唔係冇。2022年就係。再講一次，你有一個「一定唔會輸錢」嘅方法，就不如你教我，我畀錢你幫我冇風險年年15%回報）

33. （我特登冇cut走Powerpoint最下面嘅東西，咁固然阿里巴巴大跌，內銀都跌。但台積電　AMD 日本股一樣大升啫）