［今年應該很高興］芒格話頭，最簡單嘅快樂秘方，就係降低你期望。但實際上，總不能做鹹魚。咁你嘅期望，降到幾低先合理？其實亦即係問，你應該take幾多risk？ (Patreon)

似乎仲係有啲讀者唔多滿意今年表現。

芒格話頭：降低你嘅期望，萬事大吉

問題係， lower到幾多先好？

「100%股市」嘅回報同風險，應該適合。太高你頂唔住，太低唔夠上游

Again，今篇我自己都幾鍾意。雖然好似都係老題目，但又有啲新嘅角度。未必完全關事，但我attach埋嗰個傳說中嘅risk and return excel，仲有「退休」Excel，仲有上星期經濟一週篇文。嗰兩個Excel，十分有用，記得save低，自己update同modify．長遠啲我甚至想做多啲呢方面嘅嘢（多數數據），資源共享。

1. 有啲讀者反映有時會漏咗attachment，好難避免，當然你PM提我我就會事後加返上去。但你收email嘅就唔會收到第二次通知（否則你會覺得我極煩）。所以最簡單嘅方法：見到漏咗嘢，隔半日一日再上嚟睇，多數我就放返。甚至乎更簡單，隔一兩日先睇我啲文，反正又唔係趕住救命。

2. 同樣地，都有讀者反映有啲錯字，有時甚至意思掉轉。一樣，都係多數你隔半日上嚟，就會改咗。好難做到有快又準，有取捨的，正如你投資都不能又高回報又低風險（但其實有方法！呢兩篇講）

3. Patreon文我都會盡力避免錯字錯意思，但Facebook啲文就真係冇時間篇篇由頭睇幾次了。你地付費讀者，同公海免費嘢嘅分別。

似乎仲係有啲讀者唔多滿意今年表現。

4. 早排都仲係有唔少讀者，似乎對今年嘅投資表現唔係幾滿意，有啲甚至覺得我應該可以做好啲，「提我丫嘛」。不過天地良心，11月頭寫到明「買啦？仲等！」，仲講埋買股票，仁至義盡了。

5. 事實上你今年由頭坐到尾，亂掟飛鏢都好，點都有7-8%回報。一半港股一半美股，都應該贏到錢。呢個未必真係極handsome嘅回報，但11月美股一個月回報，已經係史上第18最好（out of 1000幾個月喎）

芒格話頭：降低你嘅期望，萬事大吉

6. 早排芒格死咗，大家回帶啲投資金句，好多未必有用，亦唔係你睇一句嘢就有用。但我覺得你可以留意佢講，想快樂，其中一個最簡單有效直接嘅方法：降低你嘅期望。記住，唔好只睇句嘢，重點係你思考下。遲下我都會在公海寫（呢啲人生哲理嘢就唔放呢度浪費你時間了）

7. 當然，咁唔等於叫你「躺平」（都話思考下！唔好咁快下結論）。但我可以快手分享下，在投資方面嘅啟示：正如我成日講，美股都只係一年10-12%回報咁。你當然會見到有人1年賺幾百倍，正如六合彩期期有人中。但be realistic，多數人都係輸錢。投資市場上亦係，你太高期望，往往死得更慘。

8. 事實上芒格亦係同啲後生仔分享，話畀佢地知，你地當中，好可能最終唔少人都會失望。其實只係殘酷但又真實嘅數學現象。

問題係， lower到幾多先好？

9. 問題係，你實可以反駁，「咁唔使投資啦，好地地放曲奇餅罐，簡簡單單做定期咪得」。呢個質疑係啱嘅，所以真正問題係：lower去到幾多先合適？呢個問題，其實亦等於問：應該take幾多risk？亦即係，想瞓得好定食得好（最好就兩者兼備啦可？）

10. 其實真係好重要嘅問題，甚至係人生最重要嘅問題：但好少人會諗。

11. 亦即係，在個risk and return curve，我應該企到邊個點？全部做定存？定借孖展買3倍ETF？ 定全部買債？

12. 你應該會睇到，就真係一般「回報」同「風險」嘅取捨。換句話講，你在條線已經企邊個點（而唔好諗你要冇風險但15%回報，個圖冇呢回事）

13. 即使只講「股債配置」，就當世上只有美股同美債兩樣嘢揀，咁我應該50 50？定70 30？你亦會睇到係咁嘅圖（遲下詳解，但你應該至少見到：0%股票100%債，或10%股票90%債，係傻的　—　回報更低，但風險更高）

14. 固然你嘅期望就梗係，無風險，但一年15%回報。但大家都知呢樣嘢實唔實際。無數咁多人就係咁輸晒100%，甚至有啲傻人去借錢，即係輸突。唔明？咁你問下啲JPEX 幣，或者甚麼Hounax嘅苦主。呢啲人，就係覺得自己可以打破自然定律，冇風險15厘息。

15. 固然人人唔同，你人生階段唔同時亦唔同。你輸錢時問你，同贏錢時問你，亦都完全唔同。甚至同一個人，你同你老婆一齊畀人炒咗時問你，同你發現老豆剩低3000萬遺產畀你，答案都即時唔同。

16. 但正經答返：in general，我嘅答案係：一般股票市場嘅market risk，應該係「合適」。亦即係，100%股票（但唔好再多。你話，可以再多咩？可以，有啲人借錢咪會）。

17. 再高啲，根本多數人都頂唔住，嘥氣。甚至你見即使100%市場指數，我相信都唔係個個讀者頂得住。特別係你見好多人跌10%已經叫救命要止蝕，仲要根本冇瞓身家。不過，個心臟係可以訓練嘅。仲有，係真係有方法減低風險（下篇講）。另一方面，太低回報嘅，你係安心，但一年3%，亦完全唔夠你上流。

18. 就係我成日講，你做到同大市差不多，已經夠。因為首先，多數人（if not 絶大多數）都做唔到。你做到嘅，已經叻過多數人　—　你都唔好睇少呢點。因為你諗真啲，我地差不多每一個人嘅「快樂」，都係嚟自同人地比較

19. 我會叫你唔好同人比較，你都會同人地講，都會同自己講。但實情只係程度上嘅分別。因為呢個也是人性，改不了的。好簡單，你地個個可以一個月比100蚊訂呢個Patreon—咁我同你講，你已經比世界上90%嘅人富有。咁你一定講粗口，覺得我離地，覺得我撚化你。是正常的，因為我地唔會拎自己同啲非洲中東北韓嘅小朋友比。你拎去比較嘅，就係你覺得「差不多」嘅人，好可能係你朋友，同事，上司之類。你甚至唔會拎自己同啲鬼佬比，唔會拎自己同大陸農民比。

20. 所以，如果講投資，你就真係同返「會投資」嘅人比。市場上嘅「錢」比。咁而無數咁多研究你都見到，多數人係跑輸大市嘅（但留意：未必係「多數錢」）

21. 另外，去到大市咁嘅expectation，你就應該夠膽買得大。你只講啲嘢升幾十倍，但你根本買唔到大嘅，係廢話（埃汾著名嘅「拜仁慕尼黑測試」：我一晚1000變6000添，但點解唔係買100萬？）

22. 而你買得夠大，做到同大市差不多回報　—　多數都唔夠你發達（100萬升10倍都係1000萬啫。而有幾多人買過100萬嘅10倍股？）。但你話夠你衣食無憂財務自由，都係應該做到嘅。

「100%股市」嘅回報同風險，應該適合。太高你頂唔住，太低唔夠上游

23. 話說回頭，10-12%聽落好少，其實唔少。固然，好嘅年份，你賺三四成，絶對唔難。關鍵係：係咪年年做得到先？係咪一路compound上去先？係咪買得夠大先？而家呢啲都係要通過「長期」投資。

24. 原本話想寫返短啲，貼市啲，結果都係事與願違，只係「補充」個「買啦？仲等」系列，又多幾篇。但主要因為有讀者問，而我相信啲補充係有用嘅。可以re visit 返一啲經常提但又經常有人問嘅課題，例如地區分散，資產多元化，或者「點解要長線」之類。

25. 之後仲會又寫多次「美股迷失十年」，亦係有人問。當然亦會有啲新角度，除咗睇「點避免」（答案：冇得避免），「點應付」（上面寫咗）外。仲會試下解，到底嗰時點解美股會咁差（呢個好似冇詳細寫過）。