[FB文] 非金融 ［一舊水蛋治，你唔食大把人食，合理之極］ (Patreon)

FB出左篇文，連結如下：

https://m.facebook.com/story.php?story_fbid=534204658278807&id=100050678310520

［一舊水蛋治，你唔食大把人食，合理之極］有人叫我，我又寫下先。當然我冇食過，亦唔會食（好得閒？）。Mirror 定 Error甚麼我都唔識欣賞（Collar我都唔識欣賞，我是一視同仁冇性別歧視的死廢老）。至於呀1生啲作風，我亦一向不敢九筒。但，就真係同以上呢啲都無關。

TLDR：你問我，梗係呃錢啦。但有乜所謂，目標對象都唔係你同我。有人排，咪證明定價合理之極咯，再貴啲都仲得，再慳皮啲都仲得呀。經濟101啫，等於啲日日話自己underpaid嘅人，咁搵到份工加你三成人工未先？禾嘅，即係你份糧好合理。記住老細嘅立場，九千蚊請到嘅人，點解要畀一萬？

TLDR2：你批評話啲嘢唔好食，呃錢，完全miss the point．人地都唔係賣呢啲嘢。正如上面講，再難食啲再貴啲都仲得呀。1生可能後悔留咁多水位添。

TLDR3：主題餐廳之嘛，有幾難明？至於講咩幾錢成本嘅，come on，星巴克杯咖啡啲粉幾錢成本？成熟少少啦，好嗎？

1. 首先，強調返第一個takeaway：香港人好撚有錢。成舊水食件蛋治，真係悲慘世界。每次啲人同我講香港慘過索馬里或者馬里烏波爾，都忍唔住笑。（馬里烏波爾就我作，但索馬里真係有推友講，此人自此被我稱做索馬里，可惜唔係女，冇得情迷）

2. 反正剛買咗份大額人壽保險（是真的，成球嘢美金，遲下寫），等我冒險啲，「各打五十大板」，即係地圖炮，屌晒所有人。

3. 首先個報導，正如吾友話齋，間舖絶對反映香港人核心價值。就梗係殺雞取卵快撚手斬你一轉錢啦，最短時間搵最多嘅錢，梗係咁，你話係咪？

4. 當然仲有呢個「抄襲」韓仔舖，但鐵粉覺得唔係就唔係啦—而佢地先係科水嘅人嘛。咩呀，得韓國先有蛋治呀？計我話根本係韓仔抄香港。「刁你啦，我大中華有蛋治時日本仔仲係生番咋，全部嘢都係抄我大唐添。」。你睇有冇人同意咁講？正如咩MV又好造型又好巴士廣告乜都好，咩呀，梗係唔係抄。但TVB就係抄。呢啲真係唔使咁認真。（咁正經，韓仔幾廿年前好多嘢都抄日本又係真喎，但doesn’t stop 韓仔變成而家流行化先鋒）（然後韓仔話日本燒肉都係抄韓國添，但日本人又會話「有唔同」。所以真係唔使咁認真）

5. 仲有，當然就係食神式嘅香港核心價值：張枱有咁窄得咁窄，張凳有咁迫得咁迫咪等啲友坐得咁舒服，食完拿拿聲好走，支飲管有咁粗得咁粗，冰有咁大舊放咁大舊，杯汽水咪chur一聲飲完買過第二杯囉！。

6. 你當然可以批評間嘢，正如我都講咗，你問我，梗係呃錢啦，要排隊嘅，十蚊件都唔去呀。但，人地由始到撚都唔係打算做你我生意啦！歪波打？所以我好贊成1生講呀：你啲意見我先理得你—雖然我認為，「食嗰啲先係少數」，但有乜所謂，niche market，幾時做食店要全香港七成人都鍾意食？況且，咪話都係掠一浸，你估京都百年老店咩。

7. 正如上面講，你啲友仔，去話啲嘢唔好食，貴，限時—根本就miss the whole point．即係你睇四仔嫌條女唔係早稻田畢業唔識S位泊車咁（當然有女優用呢個做賣點），實在表錯情。

8. 即係你話屌餐廳，「但你敢唔敢屌去食嗰啲友先？」。但，有咁嘅消費者，咪有咁嘅產品咯。搞清因果喎

9. 拿，人地個賣點，從來唔係嘢食喎。甚至以我所知，呀1生從撚來都唔係賣友善可人架啦，有何問題？

10. 我好認真一句：咁呢個世界好多人，就係唔屌唔鬆化架嘛！就係五行欠屌架嘛。真喎，啲友慕名去澳牛，其實咪又係微M，享受畀人屌但又唔會出血嘅感覺。對你太禮貌你覺得失落添

11. （插栔廣告：嚟緊我想寫篇文，講《痛愛》二十年。非正式統計，即係我鳩估，呢隻係容祖兒在女歌迷之間最紅嘅歌。因為歌詞好。事實好多人都係犯賤的，亦唔止女，男都會）

12. （正如我啲讀者，就係鍾意我會無啦啦直入廣告，點丫？你嚟屌話人地啲文廣告放最頭最尾，咁你咪去睇「人地啲文」。「我太正經我啲讀者覺得唔爽添」）

13. 我覺得好簡單，佢間嘢要排隊，就已經證明啲嘢唔係太貴，唔係太難食啦。「再難食啲都得」。反正覺得呃錢嗰啲，根本都唔係目標客戶。佢減價50%，我都係唔會去食架啦。所以根本係兩班完全唔同嘅人。

14. 類似例子，仲有好多。例如Patreon啲「電子雞」（呢個名詞真係用得好），我聽唔少仔長期話呃錢，「手仔都唔使畀人掂就收咁貴」。係噃，「我都覺得此風不可長，講真你阿叔我女就食夠，但長此下去會影響下一代嘅港仔」。又好多仔去批評，「嘩人地台妹鬼妹嗰啲點點點」—咁你咪去睇咯。如果嗰啲女最後流失晒啲客，自然咪會減價，或者「做多啲嘢」—但如果冇嘅，咪即係仲有好多人唔介意咯。The price is right

15. 甚至乎，我自隊。喂，我個Patreon。都有人話呃錢架。喂沈博都係收五蚊美金之嘛，人地靚仔過你良心又大過你A又多過你錢又多過你成就又高過你，你憑乜收一舊水港紙個月？

16. 又或者，我記得好似訂明報，定信報電子版，都唔使一舊水一個月。喂入面N咁多嘢睇喎，有港聞有經濟有娛樂，N咁多記者嘅心血結晶喎，N咁多名家寫文喎，人地都唔使一舊水個月，你憑乜？

17. 根本，我們都是電子雞，係同一個邏輯。但，既然我有2000人睇，就夠啦。我唔使剩返嗰幾百萬人個個睇下話？「當然會就更好，多你一個都好多」（帅帶一提。我就覺得一舊水真係幾抵睇）

18. 憑乜下話？就係憑有人睇咯。存在即合理，有幾難明？

19. （又插播，順帶一提，我見好多人搞Patreon都忽略咗一個好簡單嘅常識：收入＝價Ｘ量。但唔少人嘅ego都令佢唔想收得太平。之但係，你見最成功嘅Patreon，沈博士好，蕭生又好，全部都係收得平的。你收一個月一千幾百嘅，根本冇可能做得大。而Patreon，同好多創作一樣，主要係量嘅遊戲，冇乜孖展撈哥時。我演唱會嘅，一千人睇同兩萬人睇，對個歌手嘅各種成本壓力應該冇乜分別）

20. 同樣道理，憑乜一舊水個蛋治？因為有人畀咯。都話香港人好撚有錢。

21. 好啦，正經少少講。咪講咗咯，主題餐廳咁之嘛。你唔去屌啲主題餐廳難食？我食過梳乎蛋主題餐廳，日本台北都食過，啲嘢難撚食到仆街，又貴，但咪又係去。打卡之嘛。邊個expect啲嘢好食或者抵食？

22. 但講到主題餐廳，就可以講最後一樣嘢：殺雞取卵

23. 實情，你見主題餐廳，如果唔係連埋主題公園，街舖多數都做唔長。醒嘅直頭做Pop up，幾個月摺埋佢。或者搞聯乘，授權個梳乎蛋畀你整人肉叉燒包。好簡單，主題餐廳好少人會食第二次。卡你打完女你溝完，啲嘢咁撚難食，你仲會去多次？「除非同第條女啦，記住扮冇去過，食啲嘢時畀返個想像唔到咁難食嘅表情」

24. 咁我估，都有人反駁話，而家有人排又點？啲人去一次咪唔再幫襯。短視呀，冇回頭客。

25. 係！就係咁之嘛！丞相非在夢中，君乃在夢中耳

26. 藝人又好，球星又好，主題餐廳都一樣。必然係咁的。因為，花無百人紅嘛。今日就呼風呼雨啫，之後點知？所以，就梗係而家斬一轉。而家唔掠，等幾時？你去食都係食人地個名氣之嘛。

27. 當然，加埋香港嘅情況，更加係咁。你見好多餐廳都係咁。一來大家趕潮流，鍾意上網晒，話題店咪人人去，嗰時興芝士蛋糕咪旺角幾條街都係芝士蛋糕，但過咗氣咪冇人去。二來，亦都因為租，1生間舖之前傾，我估啲租都唔太貴，但幾年後就梗係加租。咪握咗佢，玩第樣。

28. 你話唔合理？根本合理之極。

29. 講到尾，你睇呢篇文，一個仙都冇畀。但我相信一樣好多人覺得垃圾。更何況整件一舊水嘅蛋治？不過，有足夠嘅fans咪得。

＝＝＝＝＝＝＝＝＝＝＝＝＝＝＝＝＝

30. 最後離題，醒多你一樣嘢，成日講。雖然我係「書生」。但越大越覺得talk is cheap，創意overrated，點子人人有，執行力同決斷先定勝負。

31. 搞Patreon又好，做電子雞剝衫又好，賣蛋治又好。總會有人話你知，唔work架。你打咁多字冇人睇架，收人幾舊水點都唔露冇人訂架，賣成舊水份蛋治冇人食架。

32. 但，真係試過先知。而根本，係唔會有「perfect timing」，你唔會有「ready」嘅一日。無數咁多人，死嗰日都係未ready任何嘢的。

33. 所以，豁佢老味出去啦。試過唔掂，真係冇人幫襯，咪證明你唔掂，唔值嘅咁價。咁你先再諗，收平啲，做好定，定係收皮算數。

34. 之前寫我眼疾做手術嘅文，我好清楚咁寫過，我就真係覺得如果變咗盲人，就真係諗下死咗算。唔係晦氣，係好認一真。

35. 但我都有講，都算慶幸，我都唔係好多遺憾。固然永遠有啲未食嘅餐廳，未去嘅地方，未睇嘅書咁。但，撇除呢啲永無止境嘅嘢，整體我都覺得，即使我聽日死咗，我都仲算不枉此生。

36. 但點解？唔係我特別叻，唔係特別富貴。大把人叻過我富貴過我，但至少過去十年八年，我好勇敢去試唔同嘅嘢。包括呢個Page

37. 所以，去經歷吧。你唔試點知自己冇料到？（冇打錯字）。我相信好多人唔去試，就係因為怕真係證明到自己唔掂（我都係）。表面睇，你唔試，咪永遠可以幻想自己「如果點點點就點點點」，正如你唔睇醫生咪冇病。但如果你聽日就釘蓋，甘唔甘心？特別係，當然你見到有啲人真係試咗，而成功嗰時。