恒大好似仲未找數喎，咁但點算？2024年都唔好買股票？再解一次聯儲局加息路線圖．理文化工746的教訓 (Patreon)

恒大好似仲未找數喎，咁但點算？2024年都唔好買股票？

再解一次聯儲局加息路線圖

理文化工746的教訓

直入廣告：我嘅Mox邀請碼係29CGWB

恒大好似仲未找數喎，咁但點算？2024年都唔好買股票？

1. 恒大嚟講，似乎星期四隻美元債仲未畀利息。但係咪又即刻當違約？應該唔係，因為仲有30日寬限期。但相信畀得到嘅機會唔係太大，何況之後仲有其他息要畀，似乎點都係要債務重組。

2. 咁你可以諗一個問題：係咪一路都唔使買股票？我當你話恒大倒下會對中國有好大影響（可能），但對外國呢？你見美股都只係跌咗一日（星期一），然後已經懶理，呢兩日（星期三四）直頭強力反彈，話你知照計冇乜可能係咩「雷曼時刻」。根本個比喻就錯到極，不過唔客氣講句，好多人嘅程度太低，你咁講佢地就會信。

3. 另一方面，亦見報導話中央叫地方政府做好「準備」，亦即係似乎諗下點善後。但另一方面，又話「希望」恒大短期避免隻美金債違約，咁即係點？

4. 之前都冇好詳細講，恒大如果倒下，最大嘅問題並唔係銀行之類，而係爭落好多供應商錢，仲有啲乜乜理財產品，呢度會造成嘅社會不穩，先係最大嘅問題。（所以，雷乜鬼曼？）。

5. 但明顯地，你見暫時至少表面上，中央政府都係唔多想介入。能力絶對有，但正係唔想開咗個先例，造成「道德風險」（moral hazard，一路都覺得個中文譯得好差），唔想之後個個覺得可以騎劫政府，有事就搵人救。

6. 之之又但係，亦有個傳聞，話恒大會變國企。雖然我係唔多信嘅，個消息來源似乎流流地。但，有一個例子你可以參考下：蒙牛2319一樣係十幾年前變咗國企，但之後亦好地地，股價仲係幾得。當然，兩者嘅情況並唔完全一樣。

7. 如果你再諗遠啲，一輪洗牌後，贏家肯定係國企，中國海外688同華潤置地1109，兩隻我都長期持有。同你想像中唔同，兩隻嘢今年嘅股價表現唔差的，兩隻都跑贏指數，唔使輸錢。

再解一次聯儲局加息路線圖

8. 下半場，當然睇埋美國聯儲局。我估好多人睇都懶睇，點解？因為美股照升嘛。但有趣在，如果議息之後連跌兩日1000點，你又忽然好擔心了。見到個問題未？升嗰時你就唔去睇，覺得唔重要，跌嗰時就覺得好重要，證明好多人係畀個指數牽住佢走的。

9. 要睇聯儲局原本份嘢嘅，呢度有。昨日我都亦略講咗。接下嚟會換另一個方法去講多次，加多幾張圖。

10. 先睇個點陣圖，最簡單，記住一粒豆豉代表一個聯儲局官員，係佢地估嘅將來利率水平。呢度係6月會議，同今次（9月）嘅比較

11. Bloomberg嘅圖更全面，幫你整理晒，2022年一個圖，2023年又另一個圖，然後睇返過去咁多次會議，啲豆豉點郁法。

12. 咁你見到2022年，估會加息嘅應該已佔超過一半，上次係未的，好可能下年就加一次息。另外去到2023年，上次都預會加息，今次預會係更加進取，好可能加三次。

13. 呢個圖係另一個畫法，亦會睇到差不多嘅結論。

14. 然後你亦都見到，最新嘅加息路線圖，係比市場預期，或者經濟學家估嘅，都要快。好簡單，市場同經濟學家就會更新佢地嘅預期，聯儲局就係咁樣去管理大家嘅期望。

15. 最後都畀你睇返，聯儲局背後嘅理念，當然同佢地睇美國經濟有關。正如我講，同6月時相比，今次調低咗今年嘅經濟增長預測，但調高咗下年嘅預測。調高咗今年失業率嘅預測，但下年冇調整。

16. 更重要係睇通脹，今年調高咗好多，但下年只係好輕微咁調高。反映聯儲局仲係覺得通脹只會係暫時。

理文化工746的教訓

17. 理文化工746，又新高了。不過應該唔少人都沽咗，我都係之前有叫你沽的，明顯我自己都錯，但冇法，周期嘢，工業股，又細公司，冇咁大信心叫大家一路坐。今次畀你見到，股票都係要坐的。

18. 不過半馬後炮睇返，當時都仲係有啲太保守。認真計返，公司2011年純利6.8億，但當時股價見過10.70。今年半年已經5.9億，十分天真地project，全年就去到11.8億，咁，如果相同嘅市盈率，股價應該18.6添！

19. 咁但，呢啲當然係而家先講嘅嘢。點解最初我冇咁計？最初嗰時（即係半年前），我係睇2018年，留意2018年公司全年賺8.7億！但股價都完全冇返返去2011嘅位，所以我都唔敢用2011嘅市盈率咯。

20. 呀，「如果隻理文去到東岳咁嘅市盈率會點？」，就嚇死你。因為其實隻理文半年賺嘅錢同東岳差不多咋！但而家東岳540億市值（最高時640億！），理文化工先110億…….

21. 不過當初又唔知隻東岳會炒起啦下，亦都唔知理文半年賺咁多。講到尾都係因為工業股，細隻，周期嘢，都唔敢叫大家坐，怕跌返落嚟畀人鬧。下次我檢討下，但我深信如果我自己買應該會坐得穩的。

直入廣告：我嘅Mox邀請碼係29CGWB

22. 賣多次小廣告，因為真係有唔少讀者有加入！詳情睇舊文，但簡單嚟講，Mox嘅referral program，未開嘅記住開，齊齊食窮李澤楷同渣打。真金白銀落袋的

23. 開個 Mox戶口（download個app就得），開埋個Mox Credit，填我嘅referral code 29CGWB，30日內消費200蚊，之後就有現金回贈。記住9月30號前要開（最好快手完成埋嗰200蚊消費）

24. 我嘅Mox邀請碼係29CGWB。街外錢齊齊搵

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。