ivanliresearch

美股嘅嘢，跌2%，有乜好討論？鬥地主同恒大爆煲嘅嘢．撈底嘅嘢． SPAC差不多死晒。全球政府債務負擔。1.5%嘅股票貢獻咗過去30年所有財富增長． How to Win Any Argument Over Investments。ESG得啖笑。美國通脹進入新階段 (Patreon)

Published:

2021-09-21 00:53:47

Edited:

2021-09-21 01:54:46

Imported:

2022-09

Content

美股嘅嘢，跌2%，有乜好討論？

鬥地主同恒大爆煲嘅嘢

撈底嘅嘢

每日一圖— SPAC差不多死晒。全球政府債務負擔。1.5%嘅股票貢獻咗過去30年所有財富增長

Good Read — How to Win Any Argument Over Investments。ESG得啖笑。美國通脹進入新階段

FB Post Summary — 囡囡是Donki VIP．Donki 月餅

1. 週末寫咗篇長文，講財務自由，長但唔會深，幾好睇的說。可惜生不逢時。

2. 呢刻你就梗係擔心股災，不過你見我都去到星期二朝早先寫，唔係因為驚或乜，而係幾時去到呢啲位就最多噪音，大升大跌嘅時侯都係。要過濾下細心諗下點寫。

3. 我一向嘅建議都係叫你唔好睇太多嘅即食資訊。睇書睇文OK，新聞嘅睇每日出版已經好夠，即時新聞可以睇少啲（你聽日先知有乜分別？），社交媒體嘅更加少睇為妙。雖然好多人係會不停主動whatsapp你。

4. 咁我食呢行飯就冇得避免，你如果打金融工都冇計，你唔睇啲客都會問你，但如果唔係做金融工嘅，真係唔使睇咁多股票

美股嘅嘢，跌2%，有乜好討論？

5. 先講美股，實情係冇乜好講。跌2%，有乜好討論？冇錯，講到係5月以嚟最大單日跌幅，但你記唔記得5月咩事？我都已經唔記得

6. 避險情緒係有嘅，美債債息跌（但唔算好急），美金升（一樣，唔算好急），VIX都升—但VIX甚至都未去到5月咁嘅位。恐慌？有排未算。但當然你可以演繹做唔係好驚唔使擔心，或者係未係最驚之後仲有得跌，呢啲係事後先知嘅。

7. 做嘅嘢？當然係不變應萬變，我原本想買嘅股票，照樣會買。點解跌咗唔買？

8. 值得一講嘅係，鬼媒嘅評論，差不多全部都係講恒大，會唔會傳染出去之類。主流傾向話唔會，亦有啲話會，當然主流唔一定啱。

9. 但你見，真係冇乜人去關心咩香港地產商的！呢個係幾有趣嘅地方啦。

鬥地主同恒大爆煲嘅嘢

10. 最難判斷嘅係，你唔知香港嘅跌市，係「因為」恒大就快會違約，定係「因為」打壓地產商呀樓價急跌呀負資產呀人人訓街呀之類。當然你睇啲股價，就係內房都跌，香港地產商都跌。

11. 但一個關鍵點：香港地產商雖然跌得急，但只係一日。咁你一日跌10%，固然係多，但同恒大嗰種高位不停跌係兩回事，呢個亦係鬼媒唔覺得係咩一回事嘅原因

12. 事實你睇返，路透社原本嘅報導，星期五出。好似收市前已有傳，但即管當收市後。當時亦唔覺得係咩一件好大嘅事，你見傳媒冇好關心，只係普通一單港聞，星期五晚嘅ADR市場反應亦唔大，甚至去到星期一開市反應都唔大。係跌咗你先忽然覺得好大件事

13. 而根據我主觀判斷，的確唔係十分十分大嘅一件事。當然多數地產商都封口，但你見少數夠膽出嚟講嘅（例如胡應湘），都係講到大陸畀啲壓力，但應該未去到十分粗暴嘅地步。但你知市場氣氛差，就小小嘢都放大。

14. 然後，可以講下恒大，正路地呢個星期四債券就要畀息，正路應該係還唔到嘅（但，如果還到呢？）。咁就會違約，甚至之後會債務重組，債權人全部hair cut，可能100蚊債變25蚊之類。問題就係之後會引致乜東東啦。

15. 我個人就傾向樂觀，正路地既然恒大壇嘢發酵咗咁耐，一係最後關頭有人救，一係就政府都判定佢爆煲嘅打擊都可以承受，唔好助長moral hazard，我亦相信若果恒大真爆煲，大陸政府之後會即時大放水，控制個傷害。但亦無需要而家好急飛入去撈底甚麼。可能等到下星期先？當然個風險係，政府會唔會高估自己嘅能力？當年雷曼爆煲都有呢個類似嘅情況

撈底嘅嘢

16. 好啦，真係撈，撈乜？你見市場都好有效率的。多農地嘅，當然會畀人盯上，你見大陸政府對於啲內房囤地都好不滿。但你話信和83希慎14太古1972（阿媽19跌得仲勁）之類，都唔係起住房，主要做商場嘅，照計影響不大，而跌幅又細。

17. 所以視乎你有幾大膽，你膽搏膽嘅咪撈發展商。可以揀新世界17，聽聞同大陸關係OK的，但風險自理，我話你真係要睇就呢隻咋，我自己係唔會的。冇咁大膽嘅，咪上面堆收股租信和希慎太古。又或者，友邦1299之類，唔係地產商但都遭殃嘅，都可以諗

18. 甚至，你可以諗下騰訊700阿里巴巴9988之類，昨日居然跌得少過大市，好耐未見過，你亦可以諗下係咪監管「魔掌」已經伸去第二度。

19. 講到尾，撈底，唔係睇個市，唔係睇間公司，係睇你自己嘛！睇你有幾多彈藥，有幾受到風險。你今日入去買，之後即時再跌10%，你受唔受得住先？定又係ASML跌4%就要PM我嗰啲先？然後又話聽咗我講買邊隻然後輸錢呀，咁就無謂了。你見我本書都講，最緊要你對自己坦白，係受唔到風險嘅，咪接受現實，唔好搞咁多嘢。

20. 不過最後話你知，我係冇打算撈任何嘢嘅，都話冇錢。但到下個月有錢，想買嘅嘢一樣照買。我始終係唔明白大家點解咁重賭性，鍾意試下捉唔捉到個底，當然呢個係人性，明顯我就同主流世界格格不入的。

每日一圖— SPAC差不多死晒。全球政府債務負擔。1.5%嘅股票貢獻咗過去30年所有財富增長

21. SPAC差不多死晒—記唔記得大約半年前仲係講到SPAC點巴閉點好炒？結果呢啲fancy嘢，只係因為錢太多啲人太興奮先吹捧出嚟，話咁快已經靜晒。你見到啲上市數目縮晒。另外張圖冇話你知嘅係：八成SPAC而家都係潛緊水。你又有冇得到教訓？定都係聽人講好hit你又去追？

22. 全球政府債務負擔—呢個圖就勁咯，表面解釋你當然話某啲國家財政紀律差搞到好大鑊，蘇丹希臘之類。但真係咁簡單？你可以睇呢位仁兄嘅評論（明顯係反話）：「你睇外圍低負債嗰啲伊朗土耳其一定好穩定，中間高負債嘅日本美國加拿大一定高通脹貨幣崩潰」。結論？並唔係你諗得咁簡單。你可以話因果掉轉，正係某啲國家可以低息借到錢，先可以借到咁多

23. 1.5%嘅股票貢獻咗過去30年所有財富增長—都幾震憾，但你又可以諗下啟示係乜。有啲人以為啟示係揀股好重要—你揀中就係。我嘅演繹？真係大多數股票都係碌碌無為，甚至令你輸錢，但贏嘅可以一隻頂幾十隻。所以你要分散，或者買指數算。

Good Read — How to Win Any Argument Over Investments。ESG得啖笑。美國通脹進入新階段

24. How to Win Any Argument Over Investments — 唔長，易明。我覺得佢個題起得唔多好，甚至文都寫得唔係幾好，但依然值得睇。佢就只執住黃金　vs 美股兩樣嘢去示範，你見到過去五十年，最初十年黃金跑出，之後廿年係美股世界，打後十年又係黃金，之後十年就係美股。個重點唔係話你知好快又黃金跑贏，而係人係相當短視嘅—你甚至諗，都未必真係短視，嗰樣嘢持續十年，你仲唔覺得係定律？偏偏唔係。佢嘅結論都係教你要分散。文入面冇特別提嘅係：美股跑輸黃金嗰十年，新興市場股票都做得好好。

25. ESG得啖笑 — 長文，但唔算難明。又係估值教父Aswath Damodaran出場。此人的確勁人，又多產，讀書時已經睇佢啲嘢。佢篇文對ESG投資抱相當懷疑嘅態度。四個重點：何謂「好」，好難量度，隨時會變。唔係因為啲公司「好」所以搵到錢，而係因為佢地搵到錢先可以做啲「好」事。邏輯上冇可能加多啲限制反而令你投資回報更好。最後，唔應該旨意公司或者股市去幫你做「好」事。值得認真睇下

26. 美國通脹進入新階段— 長長地，但唔深。唔係話你知美國通脹會即時消失或惡化，而係個本質唔同咗。以前啲文都有講，過去幾個月嘅「高通脹」，好大程度嚟自二手車之類，供應鏈有啲問題，二手車貴過一手，咁呢啲已經開始消失。但，另外有啲新嘅因素就會開始見到，好大程度都係真係因為加咗人工引起