恒大唔係雷曼……啩。標普指數成份股壽命越嚟越短。次次都話蘋果冇創意架啦。為甚麼恒大唔係雷曼。理財教育得啖笑 (Patreon)

快評幾句 — 恒大唔係雷曼……啩。

北水大手（？）買王維基1137

每日一圖— 標普指數成份股壽命越嚟越短。次次都話蘋果冇創意架啦。

Good Read — 為甚麼恒大唔係雷曼。理財教育得啖笑

FB Post Summary — 阿富汗沒有印鈔機。台灣週刊都講日本股

1. 實則今次唔係特別忙，只係諗唔到寫乜，又唔想太行貨。但星期六瞓醒就諗到了。

快評幾句 — 恒大唔係雷曼……啩。

2. 先講美股，要講嘅就好多理由，有機會細講，最近排你見到嘅咪債息升，同埋嚟緊啲盈利增長會慢過之前（但唔係一早預咗？市場就係有時唔講道理的，唔好太固執）。9月美股已經連跌兩個星期，果然應驗咗之前話9月弱啲嘅傳統。咁但點？唔通沽晒佢？標普指數高位都只係跌3%咋喎。唔好話5% 10%，跌兩三成我都冇驚過

3. 即係星期五晚ASML跌4%，又有讀者嚟PM我，我係唔知佢想點。我估佢應該唔係串我，或者輸錢（但買呢隻嘢有乜可能輸錢？），但你諗下，如果2000個讀者，我當有1%（即係20個）會PM我，而我個倉幾十隻股票，是但有一隻一日跌4%，你可以諗下我一晚會收幾多個message．即係隻嘢要日日不停咁升？應該講過好多次，跌市先見真章，而多數你每一次事後都見到啲公司翻生，然後後悔點解之前冇買。咁當然，除非你揀啲股票係一沉不起啦下。咁呢個就另一個問題（我都會揀著啲咁嘅公司，但唔會係隻隻都咁，呢個咪分別）

4. 港股嘛，一早已經弱勢，恒大下星期應該會畀唔到利息，即係違約。咁啱又中秋節，當然好多人拎嚟同雷曼爆煲相提並論，但就真係完全兩回事。要講可以寫好多文講，但講真，寫嚟做乜？我又冇買恒大。而你網上見嘅永遠都話係爆煲好大鑊架啦，但你見上證指數今年仲有得升，你見啲interbank market 仲係相當正常，唔似係咩系統性危機。

5. 你要搞清楚嘅係，雷曼爆煲大影響，唔係因為佢欠債多，而係因為佢係一間投資銀行，再加上，嗰個年代嘅其他銀行，槓杆都極高，一蚊股本做五六十蚊生意的。再加上，嗰時全世界仲未印咁多錢。

6. 咁但，影響當然係有的。但點？沽晒啲港股佢？定你想沽空？我只能話你知，咁耐以嚟（since 2018）我啲股票都係只買冇沽過，包括港股美股。

北水大手（？）買王維基1137

7. 呢個可能會在Facebook 寫，但呢度貼咗先。之前在Facebook 都有寫過，王維基1137入咗北水名單後，一路都冇發市。去到9月9號嘅紀錄先有人買咗2000股（應該係9月7號買，因為兩個交易日後先結算先見到）咁大把

8. 最新見到？有大手買啦，去到9月16日號紀錄（留意16號已停北水，係反映早兩日，即係14號的），已經變咗34萬股！9月17日號紀錄（即係15號買），去到39萬股。留意下，14號都只係大約200萬股成交，即係北水佔咗17%，都唔算少。暫時持股仲係唔多，亦都只係得一日大手，但一早話定你知，密切留意。我就真係日日走去睇的。呢度有得睇

每日一圖— 標普指數成份股壽命越嚟越短。次次都話蘋果冇創意架啦。

9. 標普指數成份股壽命越嚟越短—個圖係睇返每一年（計七年平均），標普指數成份股入面嘅公司，可以留幾耐。你見到壽命係越嚟越短嘅。係咪股市特別波動？又好似唔係。結論就係見到啲舊公司更加容易被顛覆。啟示？任你點演繹，但我個人嘅理解係，啲公司更加難話幾十年都做霸主。固然你捉到唔同年代嘅霸主換嚟換去就最好，但邊有咁易。我嘅演繹係，你買個股更加難跑贏指數。

10. 次次都話蘋果冇創意架啦—呢個圖係蘋果對上咁多次發佈產品，之後嘅股價表現。留意係相對於標普指數。咁你見到了，除咗第一代iPhone（2007）真係嘩一聲外，打後大多數都係跑輸大市。但更重要係乜？你見到三個月六個月，就會跑贏返。

Good Read — 為甚麼恒大唔係雷曼。理財教育得啖笑

11. 為甚麼恒大唔係雷曼 — Ryan Detrick嘅文，長期大好友。恒大爆煲？冇驚過。斷估佢都冇買，佢係話你知唔會成為咩系統性危機。點解？三個理由，首先，啲債券好多係啲基金同ETF渣，你地輸錢你地嘅事，唔係銀行拎到一手都係。第二，相信政府點都會協調下。第三，恒大始終持有啲資產，唔係雷曼咁啲嘢真係變到冇乜價值。

12. 理財教育得啖笑— 非常好嘅文！唔長亦都唔深。呢個係大課題！我一路都想講。但呢度先快講。首先，我地生存在一個高度金融化嘅社會，應該所有人都同意理財好重要（又有冇諗過，呢度你已經畀人洗咗好多年腦？）。但，你覺得理財教育係乜？有冇用。作者就話你知真係得啖笑。首先利益衝突就唔使講，都係啲金融公司推得最多。但點解其他人唔去講？因為冇人肯畀錢！金融公司又點解肯免費教你理財？你話呢？仲有，事實見到，啲理財教育，同埋投資者日後嘅行為，係近乎冇關嘅。

FB Post Summary — 阿富汗沒有印鈔機。台灣週刊都講日本股

13. 阿富汗沒有印鈔機— 呢篇幾受歡迎。首先你估下，阿富汗嘅貨幣有冇崩潰？又好似係冇的，年初至今都只係跌10%，打仗打到咁喎！你yen對美金都跌6%啦。不過留意返，因為塔利班畀人制裁，所以而家阿富汗想印銀紙都印唔到的！因為以前係在歐洲印，而家塔利班掌權，理論上唔可以同佢有生意來往，而佢地國內係連機都冇部嘅！Anyway，聽聞而家係用緊巴基斯坦盧比，同埋巴基斯坦都有機可以借畀佢地。

14. 台灣週刊都講日本股— 近期的確多咗唔少人講，咁好現實，升咪有人講。本雜誌我睇晒，都冇乜好特別嘅嘢，你真係睇我篇舊文好過。唯一一有趣，係佢講40%嘅日本股票，都係低過1倍 price to book，係遠多於其他股市的。即係一路講嘅，估值平。另外佢仲有兩個股票名單，我遲下會貼。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。