騰訊700反彈但港股都係冇乜力。美國ADP就業數字極差．理文化工746業績．長江基建1038業績． 數碼廣告嘅錢由邊度嚟？今次牛市同之前相比如何？UBER到底有冇修成正果嘅一日？黃國英徒弟話你知　新手5步驟建投資組合 (Patreon)

快評幾句— 騰訊700反彈但港股都係冇乜力。美國ADP就業數字極差

理文化工746業績—半年純利多過舊年全年！今年純利應會歷史新高

長江基建1038業績—麻麻地，但叫做加到派息

每日一圖— 數碼廣告嘅錢由邊度嚟？今次牛市同之前相比如何？

Good Read — UBER到底有冇修成正果嘅一日？黃國英徒弟話你知　新手5步驟建投資組合

FB Post Summary— 冇喎

快評幾句— 騰訊700反彈但港股都係冇乜力。美國ADP就業數字極差

1. 大市？港股冇乜好講喎。留意騰訊700已經反彈，話冇人敢買係多餘的。但港股都唔係太有力，你見個升幅即市都收窄唔少，大市成交亦係比較少。

2. 美股方面，亦都係麻麻地，仲見到債息忽然亂亂地，唔知乜事。比較值得留意係個ADP新增職位數字遠遜預期，估70萬，結果得33萬。當然疫情下ADP嘅數字同官方就業數字似乎走勢唔係好一致，可以再等，但望落似乎大方向都係經濟放慢。加息又可以拖下，但企業盈利增長應該今季見咗頂？

理文化工746業績—半年純利多過舊年全年！今年純利應會歷史新高

3. 睇返理文化工746，出咗業績，留意係中午出嘅。見到業績出完後股價反應都唔太大，成交係多嘅，正常，出業績嘅日子就梗係多成交。

4. 新讀者想睇返舊文嘅，呢篇夠詳細。另外，6月我已經話公司7月必出盈喜，然後7月真係出埋。

5. 講返份業績，重點唔係太多，部份數字我已經在excel update咗，你可以download自己玩。每隻產品貢獻幾多收入有講，但賣咗幾多噸，同埋平均售價，就要中期報告先講（記住業績同中期報告唔係同一份嘢，後者再多好多嘢）。不過照計頭幾隻大產品，收入多咗都係因為價升，量應該去到100%產能，短期冇得再升了。

6. 新資料真係冇乜，之前公司盈喜已經話盈利升2.6-2.8倍，即係去到5.6-5.9億，而家咪去到近上限嘅5.9億。所以股價冇乜特別反應。

7. 派息方面，每股盈利0.712，派息就0.26，37%左右。留意好多公司中期息末期息嘅派息比較唔同，但呢間就大約都一致，每次都係三四成。冇乜特別

8. 你可以睇到嘅係，唔好只係同舊年上半年比（封城，低基數），要同埋舊年下半年比。咁見到今年上半年嘅純利5.9億，仲多過舊年全年嘅5億（上半年1.5億下半年3.5億）！

9. 但又留意，個收入就冇咁誇張：舊年全年31億（上半年14下半年17），今年上半年23億。咁你見到了，係個純利率升咗（毛利率都係）。不過好正常，產品價格高，毛利率同純利率自然升，做化工廠，都有唔少係固定成本嚟的。

10. 既然今年上年年已經5.9億純利，今年嘅全年純利好大機會創新高—史上最高都只係8.7億。但係咪股價又會新高？又未必一定，市場未必再比咁高估值，中資股同埋工業股，而家市場比嘅估值係低過當年的。

11. 暫時只係8月，但照計我估下半年嘅純利會低過上半年，原因昨日講咗：經濟又放慢，疫情又重臨，見到呢排啲化工價格都好似跌緊。

12. 不過留意，下半年公司會有新嘅產品貢獻收入。之前都有講過下，在珠海有個廠（我冇去過的），做「鋰電池電解液添加劑」，東岳炒到甩碌都似乎因為呢啲嘢（電動車喎），而理文化工下半年會有呢啲項目嘅收入了

13. 所以，就睇呢樣嘢，我覺得可能仲可以支持到股價。你買咗嘅，我估可能沽一半先，未必要沽晒。呢個係最新嘅判斷。當然最好望實啲化工品價格。至於未買嘅而家就唔好買了。

14. 呀最後，公司居然走去賣樓！我都冇留意。你見業績入面都要分一個新嘅分部出嚟講。都賣咗129個單位，1.6億（即係一個一百萬人仔多啲）。在邊？在常熟，佢地個化工廠都在常熟，我去過。當然同23億收入相比仲係幾細嘅數。但希望唔好變咗地產公司。

長江基建1038業績—麻麻地，但叫做加到派息

15. 另外，長江基建1038都耐唔耐有講，亦係我長期持有嘅港股之一。都出咗業績。半年純利30億，按年升5%，但低過舊年下半年，公司有講踢走啲稅務嘢就應該按年升15%。冇睇分析員預期，但照計似乎麻麻地。

16. 不過最重要，都係派息，公司十分引以為傲，香港好少有咁嘅公司。你見到都仲係保持住每年加少少，或者至少唔會減。

17. 留意呢隻嘢都唔少人輸錢，但我係長期有月供的。你見今年股價表現幾好，年頭到而家升13%，但之前四年好似年年都跌，玩死人。2016年個頂唔知幾時先返返去，但始終業務叫做穩定增長，息又派到，慢慢就應該會爬返上去。

每日一圖— 數碼廣告嘅錢由邊度嚟？今次牛市同之前相比如何？

18. 數碼廣告嘅錢由邊度嚟？—呢個圖幾好，左手邊三間係靠廣告收入嘅科技股（留意冇放Google），右邊係傳統媒體。你見到傳媒統媒體啲廣告收入當然係跌—但只係微跌3-4%。相反，科企嗰啲就升幾十甚至百幾%。見到乜？見到科企啲收入，唔止係嚟自搶走傳統媒體嘅廣告，仲有好多係之前不存在嘅嘢。當然我懶搵，未睇背後金額，只能百份比唔係即時落到呢個結論。例如理論上你可以話傳統霸主跌1%出嚟，已經夠你啲新公司嘅幾十%。但又係用啲常識嘅時間啦，Facebook已經係過萬億市值嘅公司，斷估佢收入升68%，冇可能只係嚟自傳統媒體廣告跌咯（快手望過下，華納一季廣告收入講緊10億多啲，Facebook一季收入講緊……300億）

19. 今次牛市同之前相比如何？—由2020年3月23日美股見底（老讀者一定記得呢個日子），到而家16個月，標普指數大約升咗100%。16個月算唔算好長？睇返歷史真係唔算，平均有40個月，之前兩次牛市都差不多10年（所以，點等調整？）。另外，升100%係咪算好多？睇返都唔算，平均可以升125%，誇張起上嚟4/5倍都得（所以股票升多過跌，唔好亂咁止蝕）。最後，如果計咁短時期內升咁多呢？即係睇年度化，今次大約平均一年升咗66%，原來同平均比都唔多，不過個平均數比1930年代兩次瘋狂升市拉高咗。我冇計，但目測計中位數，即使在牛市嚟講，一年66%就高過中位數唔少了。

Good Read — UBER到底有冇修成正果嘅一日？黃國英徒弟話你知　新手5步驟建投資組合

20. UBER到底有冇修成正果嘅一日？ — 呢個系列嘅文，半年前都貼過。呢位仁兄覺得UBER根本唔會賺到合理嘅利潤，唔止UBER，係成個行業所有公司都係，因為呢個business model係根本有問題嘅。類似嘅嘢都有唔少人講過，但呢位仁兄好有毅力，寫到第25篇！（上次嗰篇係第24）。佢係睇返滴滴出行嘅例子，去話你知，拿，滴滴差不多九成market share，都要蝕錢，證明UBER話一路拎多啲market share就可以賺錢係呃你嘅。不過我又咁睇，中國嘅情況又唔同外國啦。你睇剛剛Lyft（UBER對手）出嘅業績，都話「轉盈」，史上首次，雖然只係EBITDA賺錢，純利仲係見紅嘅。而出完業績股價都係大跌的（UBER就星期三收市後出）

21. 黃國英徒弟Mila Yuen話你知　新手5步驟建投資組合—首先我係唔識黃國英的，佢知我乜水，但冇私下傾計（話時話嗰時返大陸睇理文化工嘅廠佢都有去）。咁Mila Yuen更加唔識。好少share啲中文嘢，但呢篇幾好。特別係例如叫你如果錢少就買ETF，要寫下筆記之類。

FB Post Summary— 冇喎

22. 繼續未有時間寫。希望奧運後好啲

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。