Twitter 業績好勁．Snap 業績仲勁．Facebook 都破頂，但留意iOS新私隱政策影響．王維基HKTV1137之前升乜？最後講下美國首次領失業救濟數據 (Patreon)

Twitter 業績好勁

Snap 業績仲勁

Facebook 都破頂，但留意iOS新私隱政策影響

王維基HKTV1137之前升乜？

最後講下美國首次領失業救濟數據

1. 昨晚事忙，出唔切文，而家補返。反正亦都可以講埋Twitter 同 Snap嘅業績。相當強勁，兩間星期四收市後（香港星期五早上）出，盤後股價都大升。我就冇買過，亦唔算點力推，但都有讀者睇完我啲文買咗賺到錢的。

2. 當然代表成個Digital marketing 嘅行業仲係旺到你唔信，照計之後Facebook 同 Google業績應該冇乜走雞。你見Facebook都升到破咗新高，不枉係一直嘅愛股。留意Twitter一向已經係Digital marketing 之中比較雞嘅一間

3. 另外，再提一次，之前週末特登出咗NetFlix，Twitter同Snap嘅preview，你睇幾咁緊要？多數嘅數字我都update咗，請睇返呢度attach嘅Excel。遲早就全部core list嘅放晒上去。（不過Twitter Snap唔係，我亦冇買過）

Twitter 業績好勁

4. 照舊，你可以睇CNBC。收入11.9億，街估10.6億。留意按年升74%，係 2014年以嚟最高增速，街只係估緊55%。不過當然，上次文都有講，同低基數有啲關係，舊年第二季，佢地收入係按年跌19%。

5. 但首先，分析員估數（55%）呢個已經係計及低基數效應，出嚟係74%。另外，就當你計今年第二季對比2019年第二季，都仲升41%，都仲係2015年以嚟最勁。係喎，面對有啲咩低基數，或者一次性嘅東西，就係咁去比較，又學到嘢。

6. 另外，每股盈利0.20，街估0.13，留意CNBC話估0.07。呢啲位真係唔好太過執著，一來唔同媒體會睇唔同嘅「預期」（雖然唔應該爭好遠），二來，更煩係有時啲每股盈利係經調整，有時又冇。相對地收入好少咁多古怪嘢。

7. 然後，可變現每月活躍用戶（MDAU），已經突破2億，去到2.06億，同預期差不多

8. 下季指引，預收入12.2-13億，市場原本只係預11.7億。而全年預開支升30%，收入增速會超過呢個幅度。咁你可以自己拎啲數玩下，見到係幾進取的，公司2014年之後都冇再有咁嘅收入增長

9. 咁都唔使講，股價盤後當然勁升。

Snap 業績仲勁

10. 至於SnapChat，更加勁。CNBC呢度。收入9.8億，遠勝街估嘅8.5億，收入去到歷史新高，照計下季突破10億全無難度。

11. 收入增速係116%！17年以嚟最勁。留意雖然都有低基數效應，但冇Twitter咁明顯，因為舊年第二季佢收入同2019比都仲係有 17%增長。

12. 純利方面，仲係蝕錢，但蝕少好多，只係蝕1.5億，街估蝕2.8億，舊年同期蝕3.3億。留意個經調整每股盈利，係正數！有錢賺的，0.1，街估係打和（呢個街估應該都係經調整嘅每股盈利，係好煩的）

13. 仲有，個每戶平均收入（ARPU，average revenue per user），去到3.35，街估係2.92。不過你可以細心留意下，北美嘅ARPU，係遠高其他地區。咁好多公司，包括NetFlix都係咁，但冇爭咁遠。似乎我地呢啲活在北美以外嘅，就真係比較唔理解間公司（有讀者係美國或加拿大可以講下）。

14. 每日活躍用戶方面，去到2.93億，街估2.9億。公司下季預期可以突破3億。

15. 下一季，公司指引預收入升 58- 60%，慢過今季，但都係近年新高

Facebook 都破頂，但留意iOS新私隱政策影響

16. 最後值得一講嘅係，兩間公司都講話，iOS嘅新私隱政策，對第二季業績冇乜影響。首先呢個相當合理，但亦係代表可能下一季會見到。點解第二季業績冇影響？只係因為一來都搞到好遲先推出，亦好多用家未update．兩間公司都話比預期中多人opt in（願意被trace）．

17. 加返個頭盔，正路你睇Twitter同Snap咁勁，Facebook照計都冇走雞。但又留意公司應該係最受iOS呢個政策影響的，雖然亦唔好忘記，用iPhone嘅人唔係多數，而明顯地Facebook係會在Android機嘅廣告再加價。呢啲可以將成本轉嫁落第二度嘅能力，就係護城河啦。你係客，你冇得話「喂我落Android 咋喎你iPhone廣告少咗關我乜事？」，世界唔係咁運作的。唔鍾意嘅，落TVB咯

王維基HKTV1137之前升乜？

18. 最後有人問王維基隻HKTV（1137），星期三勁升，做乜。我都唔知做乜，唯一嘅解釋咪就係改咗名。咁你話改咗名對公司有分別架咩？冇。佢仲特登搞到簡寫都仲係HKTV。不過就借勢炒咗上去，留意過1000萬股成交，都幾少見的。

19. 順手講埋，有人問公司會唔會出盈喜。首先，「盈喜未必會升」，HKTV呢啲個個月出訂單數嘅，盈警盈喜都唔會太難估。

20. 但你用最簡單嘅方法睇（又係EJFQ！書展訂咗，特價三個月就還好，正價我就應該cut）：舊年上半年賺1億，下半年7400萬。斷估，今年上半年，唔會多過1億好多好多啩？

最後講下美國首次領失業救濟數據

21. 最最最後，都快手講埋，星期四晚都出咗首次申領失業救濟數據，係幾差的。再上次係37萬，街估跌到35萬人拎，出嚟係升到42萬。幾有趣嘅係，之前你又好似見到好多故事講美國工搶人，度度都要加人工咁，但似乎真係唔使擔心咩經濟過熱要狂加人工引起通脹。

================================

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。