早早話冇驚過。美股差不多一年都冇試過5%調整，成日等等等調整，錯失幾多嘢？IBM 收入按年升3%，三年最勁架啦！新創建659，盈喜嘅嘢。「佐丹奴夠盈喜啦」Nvidia成為美國十大公司，就快入道指添？ (Patreon)

早早話冇驚過

美股差不多一年都冇試過5%調整，成日等等等調整，錯失幾多嘢？

IBM 收入按年升3%，三年最勁架啦！

新創建659，盈喜嘅嘢。「佐丹奴夠盈喜啦」

Nvidia成為美國十大公司，就快入道指添？

1. 昨日都唔記得講，週末整咗篇科技股業績preview，搞埋啲數，有埋個Excel畀你。今次係NTS，NetFlix Twitter Snap，三間暫時我只持有NetFlix．篇文好嘢嚟的，留意NetFlix星期二收市（香港時間星期三朝早）出業績，咁你睇咗篇文就會知業績得唔得。

早早話冇驚過

2. 市況我反而冇乜想講，驚，有乜好驚？唔係見今日反彈先講。昨日你見我都好老定，實在冇乜好討論。但，亦證明我成日講嘅一樣嘢：睇少啲股價可能對你有幫助。事隔24個鐘，已經冇人再討論咩 Delta變種，股市就係咁奇怪。

3. 亦唔係馬後炮，由星期一晚啲股票表現都見到，個跌市唔算咩好恐怖，只係好多人畀「道指跌1000」「美股今年最大單日跌幅」（冇錯都係事實）呢啲標題嚇親，你見科技股明顯昨晚較強，都有唔少嘢逆市升。

美股差不多一年都冇試過5%調整，成日等等等調整，錯失幾多嘢？

4. 而由星期二港股都企得幾硬淨，就知外圍唔會太差。咁去到星期二晚，更加冇乜好討論。至於說好了嘅5%調整？依然未有喎。等等等等調整，等到幾時？對上一次5%調整，係舊年10月，會唔會等足一年都唔會有5%調整？而你可以計下當中你等等等等等，錯失咗幾多嘢。買股票不能咁縮數，但我明啲人點解會咁縮數，因為佢地買股票只係望升一兩成，咁咪5%10%都計。你目標夠大（但當然要時間），就唔會介意咩5%，特別係你發現等等等會錯失幾多機會

5. 拿，又學到嘢啦。仲唔明嘅？睇多次舊文。有舊錢，唔買驚輸死，買又驚摸頂，點算好？— 最好時機投資係舊年3月，第二好嘅係而家

IBM 收入按年升3%，三年最勁架啦！

6. 反而想講IBM嘅業績，只係作為教學。冇持有，冇買過，唔打算買，你都最好唔好買，雖然今年股價都有12%升，唔係太差。但而家股價係10年前嘅7成左右。

7. 如果我年代嘅朋友，實識呢間公司，電腦人更加知道係一代霸王。後來嘅都不多講，但你知道我鍾意用數字，多過只係用把口講啲嘢得唔得（你見有啲公司啲人以為好得，但股價一樣死晒，例如早幾年咩 A&F 或者 Under Armour之類）

8. 首先講，記住業績只有勝預期同遜預期，而股價炒將來，同埋反映最新嘅嘢，陳年嘅好事壞都都早早反映晒。齋講今次業績，唔錯的，每股盈利2.33，預期 2.29。收入呢，188億，預期係183億。按年升…… 3%。咁當然同啲咩Big Tech比爭幾十萬丈遠，但都係睇預期啫，係咪？所以你見業績後股價一度升4%，雖然之後軟返落嚟

9. 但，如果你睇遠少少嘅，都見到股價近年不停咁跌。都話而家股價係10年前嘅7成左右。而家市值？同間Zoom差不多。一間百年老店，點高科技點乜專利，仲細過間冒起一年多啲，大陸仔搞嘅視像會議公司。

10. 問題係乜？好簡單，冇生意，冇增長，你見今次出3%收入增長都勝預期，就知幾咁唔掂。

11. 畀實數你，今年第二季收入講緊188億，但2000年（你冇睇錯，21年前）都有217億，你見到幾咁大鑊。睇埋圖（Macro Trends），最底係季度收入按年升跌（留意未有今次，即係未有第二季），今次收入按年升3%，已經係3年最好表現！死未！但真喎，之前係不停咁跌，第一季先按年升返1%（個圖最右邊，都話未有第二季）。你亦可以睇埋中間，每季嘅收入數字，甚至最好睇最頂，T12（過去四次季度）收入數字，幾恐怖。

12. 見底未？唔敢講，2018年你都見有幾支綠色，之後又再紅過。純粹用呢個例子示範，呢啲就係冇乜「護城河」嘅公司，你生意不停倒退，股價點升？

13. Bonus，再想學多啲嘅，話埋你知，IBM歷年用咗1400億回購，但而家市值1240億。你可以諗下即係代表乜。

新創建659，盈喜嘅嘢。「佐丹奴夠盈喜啦」

14. 亦係教你睇股票。新創建659有推過下，但近嚟都少講。咁但，最新消息，出盈喜喎。又睇下點？咁呢度長期讀者都知，冇人話出盈喜實係好消息，亦冇話好消息實升，亦冇話升你就要買，四回事。可惜你見好多人係睇下份通告都懶，所以點解你要訂呢個Patreon

15. 最緊要一個數字，純利。新創建6月年結，所以今次係年全業績，話全年（2020年7月至2021年6月，再講一次，我好憎唔係12月年結嘅公司，因為我要多好多時間解，包括每次都講一次好憎唔係12月年結嘅公司）賺唔少於10億，當住10億先。舊年呢？2.53億。按年升295%。

16. 你心諗，嘩，勁呀，仲唔升？真係咁簡單？你知我個人好坦白，如果你咁諗嘅，你啲股票知識仲係好缺乏。睇埋落去話你知錯乜。

17. 固然最好知道分析員估幾多，但冇亦冇緊要，你同我都至少知道佢上半年（即係舊年6-12月）賺幾錢。請去睇，或者睇我上面個圖（BTW，EJFQ喎，訂咗，伏已中，遲下講）。半年純利賺緊6.1億。而家全年賺10億，咁你話，個盈喜好定唔好？應該明晒啦？

18. 你見我Patreon好處係唔會自吹自擂，話新手有啲嘢諗得表面時，我會話埋畀你知點解，同埋畀個啱嘅方法你，等你自己去摸（都話我之前係教書的，詳情請睇我本新書，入面有講WTF哲學，W就係Writing）

19. Bonus，再想學多啲嘅。你可以睇埋佢個盈喜，講甚麼咩應佔經營溢利不少於50億，呢個數你睇咩EJFQ就冇啦，但睇半年業績一樣有，半年呢個數係33億。咁全年話50億，你話得唔得？See？我照顧埋啲不同程度嘅同學

20. 不過，留意埋，個盈喜入面都好強調漸進派息，似乎好重視亦好有信心，所以又唔會大跌。

21. BTW，都順手講埋，同樣分析盈喜，你見我週末寫佐丹奴709，都話個盈喜其實唔掂，估星期一股價跌。咁星期一港股都大瀉，你都仲可以話跟跌，但佐丹奴到星期二都仲跌，就見到個盈喜擺明唔係正面消息。

22. 呢啲，只係基本功。但你識呢啲已經叻過好多人了。

Nvidia成為美國十大公司，就快入道指添？

23. 最後都少少交代返，星期一美股大瀉千點，我寫Nvidia逆市升，當時話唔多明做乜，以為因為驚晶片短缺。明顯我係忘記咗公司1拆4！之前都講過的。（剛好兩個月前）

24. 拆細對股價有乜影響？當然係冇！否則間公司可以不停拆。不過，照計拆細後，就有機會入道指。基於道指十分低能嘅計法，往往啲股價數字太高就唔想納入，所以有人估Nvidia 拆股係為咗入道指。雖然，追縱道指嘅ETF，規模比起標普指數爭好多倍（好似十幾廿倍）

25. 又，星期一晚逆市升後，Nvidia就成為美國10大公司了，估唔到咁大呢（TSM台積電唔計美國公司啦，阿里巴巴都好似唔計）

================================

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。