回晒PM，之後再會同大家跟進影音版。騰訊700卒之有返啲力。快手1024及其他中概股都反彈。匯控5卒之派返息，但一早預咗啦。高盛 JP Morgan業績好但股價照跌。通脹升到5.4%—但真係咁驚？美股都冇乜大反應 (Patreon)

小版務：回晒PM，之後再會同大家跟進影音版

騰訊700卒之有返啲力

快手1024及其他中概股都反彈

匯控5卒之派返息，但一早預咗啦

高盛 JP Morgan業績好但股價照跌

通脹升到5.4%—但真係咁驚？美股都冇乜大反應

小版務：回晒PM，之後再會同大家跟進影音版

1. 今日夠晒豐富，希望做到多圖少字。不過大家留意到今日晏咗少少出（聲音版影像版都會晏少少）。

2. 因為我做咗件壯舉：就係覆晒大家嘅PM！希望將來都會覆得快啲，感謝讀者厚愛。

3. 提定你，之後我會再PM嗰啲之前投票想要聲音版影像版嘅讀者（第一次，同第二次），見有啲最終都冇upgrade做20蚊或40蚊會員。等我了解下有乜不足先，如果太少人嘅可能8月未必再做了，所以要拉下票。記住只係收你差價，同埋年費都可以係咁運作。記住年費20/40嘅免費送我本書畀你。

騰訊700卒之有返啲力

4. 好多人話我少咗寫港股，冇計，著實係又悶又唔掂，不能強求。但卒之昨日（星期二）有個較好嘅反彈，咁我又寫下。留意我覺得個力度都係唔多夠的，幾隻帶動大市嘅股票都即市高位回返啲。

5. 第一個焦點當然係騰訊。呢隻我一直都持有，銀碼唔細添，都相當多人問我，我都係答話放心，實情長渣嘅嘢真係冇乜好擔心，或者話冇乜可以擔心。

6. 大家都知之前股價弱勢，主要因為監管風暴，反壟斷等等。剛剛之前仲因為騰訊音樂被搞，所以騰訊都跌咗啲。

7. 但最新呢？唔知係一啖砂糖一啖屎定點啦，忽然發展係批咗騰訊私有化搜狗。咁就令人好多解讀，係咪騰訊識做，政府又益下佢呢？甚至係咪成個整頓都差不多停？令人充滿聯想。

快手1024及其他中概股都反彈

8. 同時間，你亦見到唔止係騰訊強，成個科技板塊都強，例如之前嘅快手，都有啲反彈（但都唔係好有力）。你見科指跑贏咗恒指國指

9. 更重要嘅係，就連美國上市嗰堆中概股都反彈，似乎真係開始見底啦？雖然之前大家都失望過無數次，但始終例如騰訊（或者阿里巴巴）呢啲盈利扎實啲嘅公司，就冇咁驚嘅。

匯控5卒之派返息，但一早預咗啦

10. 但講返，除咗科技股外，恒指升勢亦某程度上多得匯控5。點解？因為似乎可以派返息。雖然我一路都係好懷疑，到底派息與否，對股價影響係咪真係咁大（但當然舊年4月宣佈唔派息係股價插咗好耐）

11. 叫做有返啲安慰，但又要講返，上次講美國銀行股可以派返息或回購時，我已經提到匯控都好快會派得返息。

12. 當然，銀行股而家並不特別吸引，一直都唔多吸引，雖然我都有啲。

高盛 JP Morgan業績好但股價照跌

13. 咁講開銀行股，都講埋，兩間大銀行JP Morgan 同高盛，就為業績期揭開序幕。留意我係有JP Morgan的，core list 你見過咪有。高盛就N年前有，已經沽咗，有啲後悔，但後話。

14. 咁，我Facebook Page都有簡評咗。有興趣可以睇CNBC嘅稿（高盛，JPM），只望頭條都見到業績強勁，亦都勝過預期。但股價呢？偏偏係跌，成堆銀行股一齊跌，亦都某程度上拖低咗美股

15. 點解會咁，Facebook Page有簡評下。但首先講業績嘅部份，好大程度因為撥備減少而盈利大升，咁冇話唔得，但含金量就冇話收入強勁帶動咁高。另外，股票當然炒預期，咁銀行股第一第二季業績都不錯，但之後呢？

16. 你可以見到幾樣嘢：首先，債息既然低迷，息差之後一定唔太好，影響淨利息收入。另外，要加人工畀啲員工。

17. 仲有，Trading income應該唔會咁靚仔，因為股市靜咗落嚟，普遍個市夠亂銀行嘅Trading income都係好的。你望下舊年第一二季？

18. 咁所以，似乎短期都係冇乜運行，當然我都仲持有JP Morgan，唔通你以為我會又沽咗佢？若果債息大反彈（雖然唔多似），又會反彈了，例如今年第一季咪係咁！呢排美資銀行股冇運行啫，但你留意下，年初至今，高盛同JP Morgan都升兩成幾喎，跑贏大市，係呢排弱啫，咁你不能見到升又追，跌又沽嘛，邊有咁笨？

通脹升到5.4%—但真係咁驚？美股都冇乜大反應

19. 最後，講下美股。當然係留意個通脹數字。6月嘅CPI按年升5.4%，都幾誇張，亦係高過預期。不過留意返，聯儲局一般睇PCE，雖然同CPI唔會走勢爭好遠。

20. 市場反應？又係睇你點睇，出嗰時，最初有啲講法（我都同意，Facebook都有快評）根本認為不足懼。留意下魔鬼在細節，好大程度個CPI，係由啲二手車價格狂升而引起（點解會咁升就另一個故事）。

21. 然後睇下債息，開頭反應不大，但中段開始急升。唔知點解，亦可能同出面啲評論有關。比較鴿派（唔強烈認為加息）嘅官員都轉軚，而雖然有不具名（做乜唔開得名）嘅白宮宮員認為通脹只係暫時，但都暫時咗好耐，亦冇講佢估幾時回落。

22. 加上一路都話美股估值相當貴，咁由升轉跌好合理。但你睇個跌幅，實在微不足道，講真道指跌500點我都唔有乜大反應（1.5%咋喎），何況100點？

23. 而又真係都提下，我哋core list上嘅嘢，唔少都係再創新高。我星期一晚買嘅Shopify（in case有人miss咗）都仲有得升—BTW，3187都買埋，仲會買多隻新美股，星期三話你知係乜，以前寫過的。

24. 結論？驚都冇驚過

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。