維他奶345唔係Nike喎。52周新低，之後點？一早都話理文化工746出盈喜！中銀航空租賃2588盈警．十二碼嘅嘢，梗係射高波。美股IPO多數搵笨。標普新貴多數跑輸，踢出嘅跑贏。點解記者懷念侵侵？冰島dating app幫你唔好搞錯表妹堂妹。點樣洗錢洗得更開心？ (Patreon)

快評幾句—維他奶唔係Nike喎。52周新低，之後點？（有Excel）

大師冇點你— 一早都話理文化工746出盈喜！（有Excel）

Bonus　—　中銀航空租賃2588盈警（有個好流嘅Excel）

每日一圖— 十二碼嘅嘢，梗係射高波。美股IPO多數搵笨。標普新貴多數跑輸，踢出嘅跑贏。

Good Read —　點解記者懷念侵侵？冰島dating app幫你唔好搞錯表妹堂妹。點樣洗錢洗得更開心？

FB Post Summary — 最新改革：Asia Miles 馬可菠蘿會用返 國泰品牌

1. 雖然港股悶，美股冇市，但今日訊息量就大。個股同你講維他奶345，理文化工746，仲有送埋中銀航空租賃2588畀你。另外照舊啲每日一圖同Good Read都好睇。仲有週末出咗篇 Big Tech，嘔心瀝血呀，啲數字有用的。

快評幾句—維他奶52周新低，之後點？（有Excel）

2. 記住，我只講投資（或投機），唔講政治。來龍去脈我不交代啦，大家知，咁唔少人都有興趣買，甚至有讀者自己飛埋入去。而我係冇預會跌咁多，同埋，「我瞓到四點先起身」。

3. 仲有，以前都寫過下維他奶，有晒數。see？環環相扣。點解有啲公司我冇買但都會留意。上次業績寫過，再上一次都有。

4. 當然最簡單嘅想法，扯，咪Nike咯，大陸佬杯葛得幾耐？個個身體很誠實，幾大買維他奶。我唔反對個結論，但，都想同大家分享幾樣嘢。

5. 首先，大陸當然係Nike重要市場，但大約係15-20%收入（仲要計埋香港台灣）。相比之下，大陸（唔計香港）佔維他奶60-70%收入，兩者真係唔係同一回事。何況羅生仲要係政協。

6. 然後，冇錯Nike上次業績好勁丫，但，你話大陸人冇杯葛冇影響？我不同意，呢個圖貼過，你可以睇多次，明顯見到大陸嘅銷售受咗一定打擊。只係，杯葛又唔等於所有人都唔買，同埋最重要嘅：你都係佔我全世界15-20%嘅收入啫。如果咁嘅杯葛力度去到維他奶，影響又大好多喎，係咪？簡單數學啫。

7. 之但係，你問我，我代入一個小粉紅或憤青嘅想法，維他奶嘅「風波」，同Nike相比，又真係細好多，何況，買Nike嘅大陸人又多過飲維他奶嘅好多。

8. 亦都同樣地，你見維他奶「救火」（或曰「跪」，隨你，我討論股票啫）嘅速度，亦都快好多。

9. 但之但又不過，Nike係我一早有買嘅公司，但維他奶唔係。兩者可以千秋萬世嘅能力，又有啲距離。維他奶都係好勁嘅公司，但我地講緊全世界最top 嘅Brand喎。

但又又不過，維他奶已經插到落52週新低喎。Nike當時唔係喎。

10. 冇錯，一大輪打交，先畀到結論你。我唔係和稀泥各打五十大板，但我點都諗晒唔同嘅嘢先做結論同決定。好簡單，買得過，撈咗底嘅我都覺得明智。問題係你話搏佢升返兩成三成就OK，但你叫我長期持有我係唔會的。畢竟上次業績我都話你知，公司業績認真麻麻，大陸特別係，唔知乜事。而近幾年純利都係原地踏步

11. 所以你買嘅係跌過龍修正返，但呢間公司未必係可以一路長坐嘅。因為維他奶同Nike真係唔同咯。呢個例子，亦大約畀你見到我大約係點諗嘢嘅。就未必係一句可以講完，奈何人人鍾意速食懶人包，其實係精神垃圾食物。

大師冇點你— 一早都話理文化工746出盈喜！（有Excel）

12. 拿拿拿，大師冇點你呀！只此一家添呀。寫過幾次，但最重要嘅係呢三篇。3月3號第一次介紹，當時3.8。然後3月15日專題講（呢篇你要我寫多次都唔得，用好多時間），當時4.3。而家？5.1，任何位買你都贏錢！之前仲有讀者問我好唔好走，我都叫唔好

13. 因為，一個月前我已經寫埋7月必出盈喜！而家幾多號話？就出！夠勁未？

14. 另外，真係邪到極，我週末仲走去睇多次間公司有冇出盈喜的，有對話為證。睇嗰時星期一未開市，然後就大升，收市就出盈喜。

15. 言歸正傳講下個盈喜，特登英文版，因為中文有時亂，”升2倍”即係點？但無論如何，幫你計埋數。舊年上半年1.6億純利，今年上半年去到5.6-5.9億。你望下，應該史上都冇試過半年有咁勁！鍾意自己開個Excel玩。

16. 我嗰幾篇文話過，今年全年應該做到7億純利，而家應該唔止，而我望落啲三氯甲烷價仲係高位，之後再研究。只要下半年經濟唔太差（但誰保證？），分分鐘有機會挑戰全年純利新高，2018年全年都係8.7億，而家半年都5.6-5.9億。

17. 咁，之後點？留意冇話盈喜實升，可能今日（星期二）反高潮。而家追就梗係唔好，之前買咗嘅，我覺得我舊文話5.2-5.6呢啲位應該都去到，甚至6蚊都有機，但想貪到幾多就自己諗了。記住，呢啲公司未必可以長渣。

18. 我可以做嘅？就係試下去業績發佈會，問下嘢咯，以前有工返時有邀請我的。

Bonus　—　中銀航空租賃2588盈警（有個好流嘅Excel）

19. 以前寫過下，近期已經少，亦冇買，不過咁啱見到跟進下。你見到了，出盈警，但係朝早8點出（真神心），咁所以股價反映晒，由低位掃返上嚟。

20. 因為個盈警真係冇乜特別，話上半年（公司12月結）盈利較去年同期跌20-25%，舊年頭兩三個月都未大爆疫，所以你大約都覺得，還神啦。咁計埋數出嚟，畀埋圖你，今年上半年仲有2.4-2.6億美金賺，高過舊年下半年一大截喎，完全唔係差嘅消息。

每日一圖— 十二碼嘅嘢，梗係射高波。美股IPO多數搵笨。標普新貴多數跑輸，踢出嘅跑贏。

21. 十二碼嘅嘢，梗係射高波。—應下節，甚至今個週末專題我都可能寫足球（但當然都同投資有啲關）。十二碼呢，係啲學者同埋數據L最鍾意研究嘅課題。咁我句嘢話咗你知，梗係射高波，射高波畀龍門救到嘅機會得3%。我知，你話，「會射出街嘛」，係，18%射高波會唔中目標，低波就只得5%。但計埋出街都好，高波79%入，低波72%。當然，你可以話已經bias咗，冇信心嘅球員唔會射高波，根本射高波嗰班就係勁啲，隨你。話時話，我見幾屆多賽都多咗球員咁做，唔知係我錯覺定大家都發現咗呢樣嘢

22. 美股IPO多數搵笨—大家知道散仔一般好難參加美股IPO（話時話，而家咩富途華盛嘅好似畀你玩，同埋RobinHood上市好似都會分畀啲散戶，即係客仔）。呢度講嘅係，你上市前分到嘅梗係爽，平均升三四成。但上市第一日追嘅呢？近乎得個桔，唔少都輸錢，拉勻應該一定跑輸大市。

23. 標普新貴多數跑輸，踢出嘅跑贏—呢個現象以前都講過，你諗下其實幾合理，因為啲股票要入到指數，一定係升咗好多嗰時。固然有時係因為公司做得好，但亦都好多時因為嗰期炒得癲。真相當然兩者都有啲，但實證見到，好多時指數都係高買低沽。舊年Tesla入標普指數就係最好嘅例子，都寫過唔少文。咁你問，買指數咪好笨？兩睇，固然有呢啲缺點，但長遠嚟講，你睇連啲基金經理都好少跑贏指數。

Good Read —　點解記者懷念侵侵？冰島dating app幫你唔好搞錯表妹堂妹。點樣洗錢洗得更開心？

24. 點解記者懷念侵侵？—大約你都估到了，因為佢帶嚟話題，收視保證。媒體嘅嘢，主要都係要收視，有人鬧唔緊要，冇人鬧先大件事。咁見到嘅係，侵侵一起身，各大媒體嘅收視都大跌。右翼（美國嘅語境，即係Fox news之類）媒體固然大跌，但中間或左翼嘅一樣都跌。

25. 冰島dating app幫你唔好搞錯表妹堂妹。—原文講cousin，表堂親都叫。點解有啲咁嘅嘢？應該話，點解冰島先有啲咁嘅嘢？因為冰島人口細，又隔絶於其他地方，大家個個都係若干程度嘅親戚。咁所以，撞上自己表妹堂妹嘅機會，係相對地高。另外你會問，點work架呢？原來冰島係有齊所有人嘅家族史甚至DNA。呢，十幾年前我睇過套冰島片Jar City，又係用呢個冰島人DNA做題材。留意文入面提到deCODE Genetics呢間公司，套戲亦都係同呢間公司有關。又，照計呢個app，離開冰島就冇用了。「會唔會搞個app唔好match到自己老婆女朋友會好啲？」

26. 點樣洗錢洗得更開心？— 留意係教你洗錢，唔係賺錢或投資。都係老生常談，但都work．例如教你Buy experience，一般比起買物件更加難忘，我都發現係。Lets say你幾萬蚊買件衫，不如幾萬蚊去次豪華旅行。例如叫你請人食嘢，免費嘢最開心—「人地開心之嘛關我乜事」「咁應該第時人地會請你嘅」。例如叫你用錢買時間。又或者，Pay now, consume later。相反嘅先洗未來錢當然係唔好。

FB Post Summary — 最新改革：Asia Miles 馬可菠蘿會用返 國泰品牌

27. 最新改革：Asia Miles 馬可菠蘿會用返 國泰品牌 —一般我都唔同意你啲網友講嘅「啲友呃食飯，我去做都得」，正如好多人以為我求其寫下嘢就有錢收，咁又唔見個個人得？但，今次國泰呢下嘢，真係令人覺得「啲高層拎一千幾百萬人工就係諗埋啲咁嘅嘢」。順手批判埋啲External Consultant，冇嗰樣整嗰樣，A嗰時又話B，B嗰時又話A。你單品牌業務集中又話叫你擴展去其他，到你擴展咗又話你失焦顧客唔清楚應該集中資源。講到尾，給我股價，其他免談。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。