Domino's Pizza跑贏Google，除咗Dividend reinvestment 好重要，仲有乜啟示？ (Patreon)

Domino's Pizza跑贏Google，除咗Dividend reinvestment 好重要，仲有乜啟示？

科企的確純利率高好多，增長又高好多，規模又大好多。

DPZ純利率同增長都低過GOOGL，但點解跑羸？股息，同埋估值

DPZ又好，GOOGL又好，我有一隻，夠我輸十隻垃圾股

複利的威利：CAGR爭幾個%，十幾年就拉開好多。

股王都會生意跌。生意唔跌股價都會忽然狂跌。要耐性。

而家個個都低股派息嘅重要

DPZ年年回購，GOOGL就之前發唔少新股。呢個又係分別。

小小版務，又搞咗個投票，四種形式嘅 影音版，你想要邊種？未投嘅可以去投，任何人都投得。之後就會用嗰款。

另外，Facebook Page都有講，有啲新搞作。嚟緊一兩星期極忙，應該唔會甩稿，但可能寫得短啲，同埋PM未必得閒覆

DPZ跑贏GOOGL，除咗Dividend reinvestment 好重要，仲有乜啟示？

1. 去今日嘅正題，係延續上次篇文。未睇嘅記住睇，堅好睇。成日想話學點睇股票，就睇呢啲週末文。今次可以開住上星期舊文嚟睇。上次篇文講咗，2004年夏天上市嘅Domino’s Pizza（DPZ），回報跑贏都係咁上下時間上市嘅Google （GOOGL）。你心諗，唔係嘛？Google 喎！高科技喎！FAAMG喎（甚至有人話係最nerd 最geek嘅科技股），但事實係咁。

2. 留意我用字好小心，我係指回報，唔係指股價。當中有少少分別。因為回報涉及dividend reinvestment，碌雪球咁利叠利上去，十年廿年見到就好大分別。仲有，你銀碼細嗰唔覺，收幾百蚊股息梗係用去食飯，但碌到大啲嘅，切記唔好當橫財使咗佢，或者唔好使晒，點都放返入股市（唔一定係同一隻股票）。

3. 上次篇文，好大篇幅就係講呢幾樣嘢，dividend reinvestment，stay in market，日子有功，time is your friend。但，即使我地只睇股價，我諗DPZ股價升幅拍得住GOOGL，都令好多人跌眼鏡。當中仲有好多啟示。呢篇文細講。

4. BTW，我整理晒啲資料，變咗呢個圖。睇唔清唔緊要，attachment有原圖。仲有，我成個excel都attach畀你，建議你開住個Excel嚟睇文。至於資料呢？在Macro Trends搵，免費好用。

5. 快解少少個Excel，兩間都2004上市，所以啲數字2005開始（當然股價就有2004）。留意股價用咗平均，全年咁多日平均。但隔離column嘅每年股價升跌就係年尾比年尾，唔係平均。其他應該唔使解。留意返，純利除股數未必就係完全係每股盈利，有年頭年尾嘅問題，或者可能有咩優先股，但大約都真係 純利除股數=每股盈利。至於「頭尾」嘛，就係2020 vs 2005，股價就 2020 平均vs 2004 平均

科企的確純利率高好多，增長又高好多，規模又大好多。

6. 第一你睇到最簡單嘅嘢：股價長線大約都係跟盈利的！睇返「頭尾」，咁多年間，GOOGL每股盈利23倍，股價就10倍—不過如果計到最新（2021年6月），股價就16倍。DPZ呢，每股盈利8倍，但睇返「頭尾」股價24倍，好誇張，如果計到最新係28倍。當然呢度涉及好多問題，你拎2004年第一日上市又唔同，但重點係：你間公司不停盈利上，照計股價點都跟上的。反之亦然。

7. 然後你睇，高科技嘢真係高科技的，由乜睇到？首先，收入同純利增長，講緊成30倍。你賣Pizza邊有可能？（特別係2004年賣Pizza都已經係好成熟嘅行業），你見DPZ講到咁勁，純利只係4.5倍咋。

8. 另外，仲睇到兩間公司嘅純利率好唔同，雖然話咩GOOGL要研發要請工程師，但始終科技股本身係高純利率嘅，差不多每年都在20%之上，即使變到而家咁大間，都仲維持到。DPZ呢？純利率低好多。但居然可以由當初單位數變而家10%之上，都好勁，但另一個故事。唔多唔少因為規模夠大啦。

9. 當然仲有，你睇啲收入同純利嘅數字（唔好睇每股盈利！不可比！因為股數唔同），GOOGL都係高過DPZ好多好多，市值都係。GOOGL係一間純利400億嘅巨器，DPZ賣Pizza賣到5億純利已經好勁。

DPZ純利率同增長都低過GOOGL，但點解跑羸？股息，同埋估值

10. 的確見到，科企股嘅護城河深好多，純利率又大好多。況且只會係科企搞你舊行業，好難掉轉頭。DPZ點搶GOOGL生意？最多工程師會叫下Pizza

11. 有趣嘅係，既然講到科企咁勁，點解GOOGL回報，反而仲低過DPZ？

12. 上篇文都講過，第一係dividend reinvestment，GOOGL從冇派息，但DPZ派唔少。呢度並唔係話派息一定好（甚至有啲人覺得派息就唔好），而係強調，派咗嘅息，你拎去食Pizza，同買返股票，後果可以爭好遠。持有DPZ就係靠呢部份令你回報高過GOOGL

13. 但仲有第二點，上篇文冇講的：估值！你以為高估值好？錯。最好係「你買時低估值，你沽時高估值」。你心諗廢話，但真係畀你睇到個效應。

14. 我唔列出嚟，但你計下，GOOGL 2005平均股價，除2005 每股盈利（你可以當係市盈率），都111倍啦對不？但DPZ呢，13倍。咁梗係啦，科企高增長嘛，嗰時都知啦，但代價咪隻嘢從來都冇平過。更得意睇下去到2020年，GOOGL呢個市盈率去到25倍咋，multiple contraction（因為太大，預會放慢）．反而DPZ去到30倍！Multiple expansion 。點解會咁就後話，但你本身就好高市盈率嘅，好難長期維持，亦好難再expand．可惜過去好多年都係增長股跑贏，啲友鍾意聽故事講顛覆，就好少有人理估值。

DPZ又好，GOOGL又好，我有一隻，夠我輸十隻垃圾股

15. 上篇文講過，以CNBC個圖計（呢度重貼多次，留意係2020年2月），GOOGL回報1蚊變30蚊，DPZ係1蚊變55蚊。

16. 你話揀邊隻？根本why not both，你兩隻買晒又得，是但中一隻都夠。但個重點係：首先你要買股票先，仲要stay invested。呢啲例子畀你睇到，一定要think big，我渣到一隻好股，升幾十倍嘅，我怕乜其他有幾隻嘢變廢紙？所以點解我買YALA，WISH同 Bitcoin奶晒嘢（以前仲有啲3D打印股），但仲處之泰然？因為我其他啲嘢升幾倍嘛！

17. 「止蝕」以前我都講過，我自己唔多做，但我唔會太反對你咁做。（但，求其一隻NVIDIA高位都跌兩三成啦，點止蝕？我講今年冇事冇幹喎！唔係2020大屠殺喎）。不過，去「止賺」嗰啲真係唔知個心諗乜。當然我明，你怕你隻嘢升咗倍打回原型，南柯一夢。但，如果你隻嘢真係有實力嘅，照計長升長有丫。咁如果根本你都唔信間公司嘅，啲錢你賺唔到都好正路。又或者，用以前講斬邊留邊嘅方法咯。例如嘉年華郵輪CCL我都建議大家咁做，又唔係同佢對過世。或者以前嘅Tesla都係。（根本啲嘢就教晒你的，我仲成日回帶，所以要成日睇文呀）

複利的威利：CAGR爭幾個%，十幾年就拉開好多。

18. 唔知點計CAGR嘅，自己睇維基。但你唔好將我個Excel 每年股價升跌嗰堆嘢計平均呀下！CAGR 係geometric mean，唔係arithmetic average．而你投資回報一定係計前者。今年輸50%，下年贏100％，你回報係0，唔係25%。

19. 上篇文提過，GOOGL嘅股價回報，CAGR（Compound Annual Growth rate）25%，1蚊變44蚊。DPZ呢，CAGR 22％，1蚊變30蚊（暫且唔計dividend reinvestment住）

20. 睇到幾樣好簡單嘅嘢：首先，你一年回報有20%，已經勁抽到一個點，2004年到而家會係22倍。呢啲就係複利的威力。問題係，易唔易做？梗係難啦，極難！記住係成個倉喎，唔係你有隻安踏萬幾蚊變十幾萬然後講10倍回報喎。咁記住，唔該你現實少少，唔好諗埋啲咩「我唔貪心諗住每年20%夠了」。同時間，出面嗰啲話「年年三四成」嘅，你信嘅我就祝你好運。勞蘇基金絶對唔會做呢啲假嘅保證。（照舊，有興趣又未報名嘅PM我）

21. 另外，17年嚟，GOOGL CAGR25%，1蚊變44蚊。DPZ CAGR 22％，1蚊變30蚊。見唔見到爭幾咁遠？呢啲亦係複利的威力，你個回報一年爭少少，拉長咗就爭好遠。但高啲回報一般都高啲風險，你可以控制到嘅，往往就係拉長個年期。

22. 最後，貼多個上次嘅圖。見唔見DPZ有dividend reinvestment 嘅CAGR係29.5%，冇dividend reinvestment就24.3%？一年爭5%，你睇下17年爭幾遠？30倍同60倍嘅分別。

23. CAGR爭幾個%，十幾年就拉開好多。做人都係。以前都寫過，順境時我跑贏你少少，逆境時我冇你咁大鑊，幾個周期就拉開晒了。

股王都會生意跌。生意唔跌股價都會忽然狂跌。要耐性。

24. 另一方面，GOOGL作為一間強大護城河嘅科企，你見啲盈利真係年年升，唯獨係2017年跌過（有啲one off嘢），不過因為one off，同埋2018年公司已經無人唔識，所以2018年個市雖然相當差，但你坐得穩都唔奇。然後你睇DPZ，2006年盈利已經倒退，難免畀人覺得公司谷到條數最靚時上市（好多公司都會），之後2007 2008年更加重災區，玩到2012年先回覆返2005年嘅利潤水平。幾耐呀？7年呀！你老味（sorry粗口）而家事後睇你梗係易，但個撚個一季盈利唔得已經嚇到話公司唔掂呀要走人啦，叫你等7年？你會咩？實情你有冇股票渣住7年？除咗唔記得或者輸到當廢紙嗰啲。係咪好多都手痕止賺止蝕走？

25. 同樣道理，事後你睇呢兩隻已經股王，可能係美股幾千間公司甚至世界幾萬間中嘅王者。但，一樣可以跌到趴街。金融海嘯兩隻都跌六成咁滯，你止咗蝕又點買返？OK你話百年一遇，但，2007個市咁好，DPZ一樣跌一半，死未？（上一段講咗盈利大倒退）。同樣地，2014年冇事冇幹，GOOGL一樣跌一半，死未？點止蝕？更唔好講好多人買隻嘢一個月唔升已經嚟問我乜事，使唔使走。

26. （補充：後來見可能同GOOGL拆股有關，Macro Trend啲數字可能少少問題，但原則不變）

而家個個都低股派息嘅重要

27. 呢個我都未得閒寫，但股息真係一個好大嘅迷思。固然好多人都知，美股要抽股息稅，好多公司寧願回購都唔派息，亦合理。但亦有公司揀派息。呢度我想講，好多人都忽略咗：大佬，要除息的喎。所以你咩走去除息前買定之後買，根本唔應該有乜分別。同樣地，我甚至好奇怪，點解匯控忽然宣佈唔派息，股價會跌咁多。固然兩件事一齊發生，但，定根本係因為大家發現政府好惡？有冇諗過個邏輯係乜？我投資Facebook，當然係覺得啲錢放在佢度好過放在我度啦，咁做乜派息我會開心？

28. 但，呢啲都係哲學啲嘅問題。簡單啲講，好兩極。以前啲老嘢，往往好息之徒，甚至好多人走去襟住個股票機見到邊隻嘢10厘息就仆落去，我又祝你好運，即係你覺得買1.5%美債嗰啲係傻仔。不過近年又掉轉，個個都科企小朋友上身，冇人睇派息，又係錯。

29. 拉長嚟睇，個派息對你好重要。DPZ跑贏GOOGL咪就係因為派息（但你要再投資咯）。舉個例，呢個圖係港交所嘅派息，而家每次都派幾蚊 — 而2000年上市嗰時都係幾蚊咋，你諗下，派一次息等於你回本。而你真係渣股票渣得長，係會見到呢啲現象的。

DPZ年年回購，GOOGL就之前發唔少新股。呢個又係分別。

30. 最後一提，記住，股票可以成間公司睇（市值，純利），或者每股睇（股價，每股純利）。但好多時要睇每股。呢個上次篇文都有講過下，GOOGL「頭尾」純利升咗27.5倍，但每股盈利只係升23倍。點解？因為股數多咗。留意唔係上市時，係後來再發的新股。因乜？獎勵啲工程師啦，老細啦，仲有收購。所以你見股數都多咗30%，雖然近年已經係縮緊，因為做回購

31. 相反，DPZ呢？股數差不多年年縮，而家係當年嘅六成左右。所以你見到，純利4.5倍，但每股盈利差不多8倍—而影響股價嘅，係後者。

32. 拿，唔好話冇講心法嘢啦。呢篇慢慢睇。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。