快手追渣沽。PayPal—先由陸東港交所講起，過水濕腳。Payoneer—平價版PayPal。王維基1137大跌，預咗啦 (Patreon)

快手追渣沽

PayPal—先由陸東港交所講起

PayPal—過水濕腳

Payoneer—平價版PayPal

王維基1137大跌，預咗啦

1. 嘩，長到抽筋，但主要寫PayPal，嗰部份反而唔趕。趕時間睇咗快手同王維基1137先。另外，真係絶不欺場啦，忙過返工呀我（證明返工好 hea），你睇下篇文幾點出？

快手追渣沽

2. 不外乎三種人。中零手（包括冇抽嘅），中一手，或者中多過一手嘅。

3. 先講中多過一手嘅先：我建議你唔好同人講，因住畀人綁架！（認真：沽走一半吧）。至於一手都唔中嘅，就唔好追了，升200%仲飛入去，有啲難接受咯。

4. 中一手架呢？就真係可以鬧港交所，點解仲要一手一手咁買。原本會建議你食一半楜（正如中兩手或以上嘅人），但實際上唔得。我建議？唔沽！雖然可能你覺得好奇怪，升200%都唔沽

5. 關鍵係：你嘅銀碼細嘛。你不過係1皮變3皮，百份比上好勁，銀碼上還不錯—但始終唔係大到令你生活有明顯改變（但：如果爭人錢呀有卡數未找呀之類嘅唔同，快手食糊）。Worst Case 可能返返招股價，你咪走，賺少2萬—但，What if 隻嘢再升上去呢？1皮變10皮呢（有人話冇可能），或者5皮呢？就唔同啦喎。呢隻嘢似係有想像空間的，至少都睇埋入指數呀北水呀之類先啦。

PayPal—先由陸東港交所講起

6. 不如由陸東講起。年紀細啲（三十以下？）應該唔識佢，但我年紀，四十左右嘅，會買股票會睇新聞睇報紙，總會識佢。在最廣義嘅定義下，佢都係「財經演員」—我認為任何你在媒體上見到嘅都係「財演」，冇錯，包括發明呢個詞語嘅蔡東豪，亦當然包括畢菲特 Ray Dalio．但陸東至少有少少唔同嘅係：佢係大行出身，而且真係做策略師，Strategist．即係唔係啲求輪其在雷曼做過settlement clerk 公司執笠，然後又自己「XX後放棄投行工作去整腸粉」之類的故事（iMoney有一排好鍾意呢啲嘢）

7. 策略師Strategist，有冇令你覺得好熟？「冇錯，正係我之前在星展嘅梯圖」。我在耆英睇銀行股出身，後來玩到變副主管，咁見無數次工，總會有人問我嘅career plan 係乜（我心諗：打跛腳唔使做日日食軟雪糕唔使答你呢啲白痴問題），我當時係諗：我希望做策略師Strategist，然後，居然不經不覺，畀我坐到呢個位，仲在星展香港喎。

8. 策略師Strategist做乜的呢？最簡單嘅答法，間行有關股市整體嘅睇法，即係你地最關心嘅「恒指今年睇幾多」「買乜股好」，就一般由呢條友整出嚟。係喎，原來星展香港有一期官方恒指目標都本人說了算，都好似幾勁。

9. 陸東是個吹水寫嘢好叻嘅人，亦係正統分析員出身，加上仲要屋企富貴（呢樣我學唔到）。固然佢講嘅嘢唔係人人啱聽，亦都好似唔係成日準（雖然我啲文講過你去執著人地準唔準，其實幾低層次），但我覺得聽佢講嘢係有得著嘅。

10. 講咁長開場白，可以睇下佢講港交所（但我今日唔係講港交所）：我鍾意一些細水長流的生意，人家過水它就濕腳。

11. 港交所正係咁，話知你股市升定跌，話知你北水狂買定有人沽空定連登仔齊齊血肉長城，唔關我事，你地鬥飽佢，總之你任何trade我就收你少少，舔埋舔埋就好大好大舊錢。仲要因為係政府容許佢壟斷，根本冇第二間可以減價爭生意。固然這不代表任何價都飛入去，總有個價，唔通聽日1000蚊你又買？唔通10000蚊你都買？但，呢類公司，係比較容易做到長玩長有，我經常講嘅，「股價45度咁上」（technically 係exponential growth，「log咗後一條直線」），廿年前3.88上市，仲要派唔少息，而家500蚊。

12. 你發現都唔使點擔心周期，固然股災佢實跌，雷曼佢跌到反艇，但之後總會再創新高。對比係乜？你睇航空公司，10年前咁嘅價，20年前又係咁嘅價，永遠只係炒周期，當然都有得炒（你睇隻3800一年升咗10倍！雖然唔係航空股，原理一樣），但唔係嗰回事。點解航空股會咁？因為佢地賺嘅錢（如有）同當年都差不多。但你睇港交所？實數我都費事貼，但阿叔初做金融嘅年代，一日成個股市講緊百幾億港紙成交—而家一隻阿里巴巴一日200億成交，see the difference ？

13. 而Benjamin Graham嗰句真係好啱：In the short run, the market is a voting machine but in the long run, it is a weighing machine。你睇Gamestop，再睇港交所同PayPal，冇錢賺冇前景嘅，固然你可以成班人托高一排，但好快就畀地心吸力扯落嚟。

PayPal—過水濕腳

14. 咁仲有咩生意係咁？都有唔少，有啲冇咁似，有啲似啲。我以前好似寫過VISA，係全世界最大嘅金融股，而家都仲係—留意，唔係任何一間投行（而我不知做乜有人話投行好好賺好呼風喚雨），唔係任何一間銀行，Not美資not中資，而係一間—都唔知做乜嘅公司。

15. 真的，行家或者自己開舖頭會知，但有啲人真係唔知VISA係點賺錢。你要記住，提供信貸畀你嗰間，係銀行—即係你唔找卡數，花旗（舉例）就會罰你錢，淋你紅油，但VISA完全唔使上身！佢賺嘅，就係你每簽一次卡，就啄你少少錢。（年費？冇啦，仲有人畀年費？）。因為金額太大，每次少少，夠佢發過豬頭。仲有另一收入，十分邪惡，海外簽帳，你睇下啲匯率幾咁差？

16. 咁仲有咩類似嘅公司？「MasterCard」。但我想講PayPal．

17. PayPal就係類似模式嘅一樣嘢，呢啲公司十分屈機，就係每單交易舔你少少。而佢同VISA Mastercard之類，關係好微妙，你可以話亦敵亦友。連Facebook都要用PayPal，你就知幾咁堅

18. 我都唔知用咗PayPal幾多年，但真正力推呢隻股票，係舊年開Patreon嗰時。點解？因為佢真係好好搵！個個月就舔我一截。

19. 我在呢度分享過條數，你地畀100蚊，我實收85蚊，8蚊去咗Patreon，7蚊係Paypal（有人話邊有咁多，但總知唔係Patreon我就入佢數，唔好忘記仲有啲匯率度食你價）

20. 我會覺得，Patreon搞個平台，100蚊舔咗我8蚊，合理公道。但PayPal，喂，佢坐定定收錢咋喎，乜都唔使做—雖然都係「唔順超唔好用，或者自己搞一檔」，但感覺佢真係很好賺。你諗下以我而家嘅Patreon入數，我一個月貢獻7000蚊畀佢咁滯！傻的嗎？有咩公司可以一個月屈我7000蚊？

21. 所以，當然係if you cant beat them, join them．幾大都狂推大家買。有人有時都話，扯，你貼啲股票升冇用架喎，咩位買先—我明佢出發點，但想講嘅係：有啲股票我不停咁貼，核心推介（Black Rock ASML 之類都係），根本你任何位買都贏。（講開，Black Rock亦係呢種每單舔少少嘅生意）

22. 業績？都冇乜好細講，估你都估到，疫情多咗咁多網上交易，公司點會唔賺到笑？

23. 你睇個生意模式穩定到一個點，收入年年升，純利都差不多係咁（2014年唔知咩事，遲下研究下）。你睇返，股價點解升咁多倍？都係因為純利越做越大，就唔好以為咩基本因素都唔使睇。否則咪變Game Stop．

24. 順手講埋最新嘅數：2020年全年收入215億，舊年178億，升21%。2020全年純利42億，舊年25億，升71%。

Payoneer—平價版PayPal

25. 講咗一大篇PayPal，得返幾句講Payoneer，呢間公司應該更加少人聽過。但如果係Patreon用家就會知道—因為，Patreon除咗可以 Paypal收錢，仲可以用Payoneer（3間都係Ｐ）

26. 而我而家已轉用Payoneer啦，點解？平咯！好現實。但當然最初有啲擔心，始終PayPal大公司，又上市。Payoneer？得唔得架？會唔會我因小失大？（呢個例子畀你見到大公司品牌都係重要，特別係呢啲位，涉及錢銀）

27. 咁當然一路用都冇乜問題，係試過有一排死機（都幾大鑊）。但唔會用返PayPal了—然後亦見到資本主義嘅可愛：除非你政府欽點，否則總有人想競爭，你咁好搵，我咪收平啲打你。固然PayPal有一定「護城河」，技術同資金門檻係高（涉及錢嘅嘢一定煩，仲要N咁多國家法例），但並唔係完全不能攻佔。

28. 後事如何？可能開篇新文寫，因為呢度居然有讀者係做Payoneer嘅！不過我想講嘅係，之前好似Instagram（記住科@ivanliresearch！）寫過有間SPAC，Payoneer會借間SPAC上市，Payoneer正式宣佈咗了！有讀者已經一早買!

29. 當然Payoneer唔會想甘心只係做平價版PayPal，冇一間公司會想咁做，鬥格價最後大家冇肉食。我估比較可能嘅結局，又係Duopoly，VISA同ＭasterCard咁

王維基1137大跌，預咗啦

30. 真係昨日嘅文講明估股價會有壓力了，因為出嘅數真係麻麻，同12月比冇乜增長。同公司嘅全年目標比，都只係僅僅達標。再加上確診人數都回落好多，唔知關唔關事？咁又係嗰句，低位，咩10蚊樓下買嘅，真係唔使驚。咪等下，真係跌到你啲買入股先斬吧，照計公司仲有啲發展空間掛。