Tesla交付50萬架車。中資電訊商除牌會點？2020債券回報其實都不錯。Walmart 單價同交易宗數背馳。2020係名人光環盡失之年。AI唔夠訓都會出事？Patreon 1000 人感言 (Patreon)

快評兩句—Tesla交付50萬架車。中資電訊商除牌會點？

每日一圖—2020債券回報其實都不錯。Walmart 單價同交易宗數背馳

Good Read—2020係名人光環盡失之年。AI唔夠訓都會出事？

FB Post Summary—Patreon 1000 人感言

1. 卒之達到1000人！多謝晒大家。比我目標（2020年底）遲咗幾日，但冇所謂。而目標當然係不停向上調（陣間講王維基都會講呢點）。最初8月搞時我只係想9月尾去到500人。成功咗。然後我嘅目標係1日有一個新訂戶，結果亦遠超於此。不過壓力當然一路都增長。

2. 呢排都係多新讀者。未睇我嘅2020回顧（個人篇），可以睇返上集，同埋下集，反正你返工都冇乜心機做嘢。冇興趣睇我個人嘅嘢，咁可以睇返我2020市場回顧+教訓嘅第一集。之後仲有幾集，應該唔會爛尾，嚟緊幾日寫。

3. 雖然我畀人炒咗，但出糧出到3月。而雖然我仲在屋企隔離中，但我今日（星期一）開始suppose work from home嘅，所以都會早啲起身。2020市場回顧+教訓嘅幾集，就留返日頭寫了。

4. 另外，寫完呢一篇Patreon（你讀緊嘅呢篇），我仲會在Facebook 寫篇王維基。出咗12月嘅數字，同埋2021嘅目標。到時自己去睇Facebook文吧。但整體我覺得數字不錯，仲有啲廣告業務令人振奮，股價又高位回落啲，應該有得彈？唯獨係個目標太保守。但呢啲目標一定保守，做唔到就好核突，舊年都係年中先大幅上調。

（05:00 更新 - 已出，呢度）

呀，Attachment 有埋 王維基啲數嘅Excel，鍾意拎去玩

快評兩句—Tesla交付50萬架車。中資電訊商除牌會點？

5. 都係有讀者點唱，快手寫。先講Tesla，我估對股價影響不大。始終唔係出業績嗰啲數，況且正如上面講王維基一樣，呢啲目標多數都定得有彈性。你睇新聞有啲話交付數量比預期好，但同公司自己嘅目標爭啲。不過會唔會股價跌？應該唔會，跌都唔係因呢樣嘢。因為都只係爭好少，況且只係爭幾百架，有機會最後出嘅數再會多啲。

6. 另外，周末嘅故事係，紐約交易所將三間中資電訊商除牌。影響？正路應該不大。應該話，之前話唔畀美國人買，或者指數強制剔除嗰啲影響更大，而家呢個除牌，真係冇乜特別影響。

7. 講真，唔係呢單新聞，可能好多人都唔知 中移動 中聯通 中電訊係在美國有上市。正如匯豐之前在巴黎退市，都冇乜人理。（當然匯豐係自願，唔係被除牌）

8. 實務上會點做？我都唔係好肯定。但搞清楚嘅係，三間電訊商在美國唔係直接上市，係上ADR。ADR是甚麼東西？大約係有啲行（Bank of New York做好多）印啲紙仔，話你知，拿，你呢張嘢就等於100股中移動架啦，咁上下。咁正路地Bank of New York唔會篤手指賭白頭片，背後當然會買返咁多中移動嘅正股—寫過好多次，大銀行犯不著同你take position 估中移動升定跌，我back to back 食你差價咪已經穩陣不賠。

9. 所以，理論上，一係就將呢啲ADR轉做港股。一係就叫個客沽貨走，或者Bank of New York之類自己接返。

10. 但實務上，因為三間嘢本身在香港上市，而ADR成交又少，對股價影響只會些少咁多，仲只係心理上。因為我間公司根本生意照做，唔同話華為或中芯嗰啲畀人禁。（電訊商在美國都有少量生意，但一早禁咗了）

11. 另外，其他中資公司，甚麼拼多多呀百度呀愛奇藝呀，梗係仆返嚟香港上市啦。照計都有利港交所。但呢個主題2020年已炒過，最大嘅都返晒嚟了。

每日一圖—2020債券回報其實都不錯。Walmart 單價同交易宗數背馳

12. 2020債券回報其實都不錯— 成日寫股票，頂多寫下債息。想講，如果閣下比較富有，就應該都係70/30 或者60/40，股債組合（不過理論係咁講，但在香港你要搞掂層樓先）。呢個圖畀你見到，2020年債券表現都不錯，佢呢度嘅多數係ETF。實情股票債券多數負相關，但近年多得聯儲局搞局，好多時近年都齊升齊跌。2020年，你見到債息一路跌—就即係債價一路升（債仔而家可以低息借到錢，咁我張一早定死息口嘅借據越嚟越值錢嘛）。買債都有OK嘅回報，最弊就係乜都唔買。

13. Walmart 單價同交易宗數背馳—疫情下嘅改變。疫情之前，你見Walmart美國嘅交易宗數（你當係有幾多人流），同埋單價（每張單平均幾錢），大約同步。但疫情爆發後？完全背馳。人流大跌，估到啦，又封城，唔封你都驚。但啲人結果係一次買好多嘢。單價上升，係more than 抵消人流下跌嘅

Good Read—2020係名人光環盡失之年。AI唔夠訓都會出事？

14. 2020係名人光環盡失之年—香港唔知，但講美國（或全世界）。我都同意文中所講。首先係美國政局，BLM呀拜登呀種種。而眾所周知荷里活絶大多數都左傾大愛反侵。以前冇問題，但而家殺到埋身社會咁兩極，就好難啲兩邊討好了。另外亦係疫情，啲明星有啲離地舉動。其實一直都係，但疫情又拉濶社會矛盾嘛。難搞。

15. AI唔夠訓都會出事？—哈哈哈，細個以為機器人唔會累唔會發老脾唔會叫加人工。但原來有啲AI唔夠休息會影響效率！不過又唔係標題黨，真係只係某啲先會咁—邊啲？就係模仿人類腦部功能嗰啲。我開始好亂。到底如果學到同人腦一樣，係咪叫完美AI？定唔會累嘅先係AI？

FB Post Summary—Patreon 1000 人感言

16. Patreon 1000 人感言—半廣告文，但呢篇值得睇。講下我1000人嘅感言。講到尾，外人梗係覺得好簡單，你啲咁嘅友都有人睇，「我又試下」。而作者本人就梗係覺得可歌可泣。但真相應該係兩者之間，好老土一句，梗係天時地利人和，但機會留畀啲有準備嘅人。Luck is a function of surface area. You increase your odds by exposing yourself to more opportunities and more people。而都係嗰句，我寫嘢頭嗰廿年一個仙都冇仲人人畀人恥笑添，唔係話乜，但唔係真係鍾意，好難堅持—呀仲有，當然亦因為我唔使靠寫文開飯（而家就要了）