未知過去，又點知將來？Tesla 7舊水，BlackRock都7舊水。Snapchat增長嚟自「其他地方」。美股今年一度插三份一但埋單仲升，史上未試過。圖靈測試已經過時？光頭佬每日只做三個決定 (Patreon)

快評兩句—未知過去，又點知將來？

大師冇點你—Tesla 7舊水，BlackRock都7舊水

每日一圖—Snapchat增長嚟自「其他地方」。美股今年一度插三份一但埋單仲升，史上未試過

Good Read—圖靈測試已經過時？光頭佬每日只做三個決定

FB Post Summary—從缺

1. 寫咗2020回顧，上集同下集。唔係完全同投資金融有關，但值得一睇。

2. 嚟到2021年新一篇，再一次都係多謝咁多位讀者，陪我由2020走到2021。正路地，今個月就會去到1000人，真係一個不錯嘅成就。

3. 而同時間，我原本係有打算2021年推出更多東西。不過賣過關子先。好可能係拖到3月中先會出—點解3月中？心水清嘅會估到—因為到時我正式離職，咁我就會知道時間上做到幾多嘢。舊讀者應該知我唔鍾意over promise。好多時做咗先講。但好啦，預告少少，考慮中嘅可能玩你問我答，或者拍埋片，或者齋聲音導航。

4. 呀同埋，本人1月10日就完成隔離。又可以再搵我食飯的說。以往讀者評價相當高。記住join VIP 會員就可以搵我傾計，知無不言，可以帶多個朋友，但當然係你請。20蚊 同 40蚊 月費會員都可以的。又開放返了。

快評兩句—未知過去，又點知將來？

5. 真係建議你睇我嘅2020回顧，上集同下集。雖然7000字，但吹水嘢多，冇圖表冇數字，好易消化。甚至乎，你都可以寫下自己嘅2020回顧。「1月2號仲寫？」。冇所謂的，使乜理人，甚至你唔貼出嚟都仲得。

6. 講真，急甚麼？正如大家都想知2021展望，甚至好多媒體2020年尾已急不及待搵定人訪問。但，又係德國股神科斯托蘭尼（André Kostolany）嗰句：你唔使知道聽日發生乜事。你知道今日同昨日發生乜事就夠—因為好多人連呢啲都唔知。

7. 真的，過去一年，的確百年一遇。特別係投資市場上。不妨諗下你舊年有咩做得好，有咩做得唔好。點解做得唔好，點解做得好（係純好運？定真係深思熟慮？）。講真，星期一先開市，你至少仲有兩日思考下。你根本唔使知道將來發生咩事，大家都係估估下。最大難度係到時殺到埋身，你點應對—往往就靠你之前打落嘅根底。

大師冇點你—Tesla 7舊水，BlackRock都7舊水

8. 兩隻都新高，嘻嘻。Tesla係明顯貴到無論的，而「鬥傻」都一般唔係我作風（雖然未必賺唔到錢，但長遠會學壞手勢）。不過，最初推Tesla因為入標普指數，480升到大約700，唔少讀者都有份玩。而家多數都落咗車，但仲有少數係未走嘅，都OK，放風箏嘛。既然本身都係橫財，480買嘅，唔跌穿500真係可以繼續玩。雖然隻嘢真係極貴，但亦都真係妖到無倫。當然，冇貨嘅就唔好而家飛入去了。

9. 相反另一隻，BlackRock，舊經濟嘢。其實未開Patreon，舊年年中在HomeBlogger專欄已推。去到而家當然亦唔平（實情美股有乜公司平？）。講真技術門檻唔高，但勝在夠大，以本傷人。

10. 類似嘅公司，我會睇隻標普環球，SPGI。去台灣前寫過。近期股價都係麻麻地，啱啲有畏高症嘅。

每日一圖—Snapchat增長嚟自「其他地方」。美股今年一度插三份一但埋單仲升，史上未試過

11. Snapchat增長嚟自「其他地方」-呢隻股票早兩日都寫過下。留意公司近兩年嘅增長嚟「其他地方」—都夠晒搞笑，除咗北美，歐洲，就係「其他地方」。估下最主要係邊度？係印度。點解？因為ban咗抖音，的確係受惠股。唔算好鍾意間公司，但留意仲未破頂的。

12. 美股今年一度插三份一但埋單仲升，史上未試過—解下個術語先，Intra-year drawdown係指一年內高位跌到低位嘅調整。咁大家知2020年美股標普指數由高位到低位跌咗34%—呢個唔係史上最多，2008年高位跌一半添。但，就冇試過一年由高位跌34%而全年埋單都仲有得升。教訓？都冇乜。一方面歷史有參考價值，但另一方面你見2020真係創造歷史。分辨乜嘢往績值得睇，乜嘢冇咁重要，就係最難。

Good Read—圖靈測試已經過時？光頭佬每日只做三個決定

13. 圖靈測試已經過時？—可能部份讀者熟過我，知道乜嘢係圖靈測試Turing Test．簡單嚟講，就係一個imitation game（冇錯，亦係套戲嘅戲名），去判斷你部機器係咪有AI，人工智能。極簡化嚟講，就係你同兩舊嘢用文字傾計，睇下分唔分到背後係真人定機器。分唔到嘅，就通過圖靈測試，被視為有智能。呢個測試已經70年，而家有人話過時，應該用更好嘅標準。如果係一般人冇乜人理，但呢個係Alexa嘅嘅首席科學家，就值得一睇。

14. 光頭佬每日只做三個決定—冇錯係首富Jeff Bezos．有時我都遲疑係咪分享呢啲，因為只要你變咗首富，好似講乜都好有道理。無論如何呢篇都可以快手睇下，不長。講嘅係佢每日只做三個決定，認為高質決定三個就夠。當然潛台詞係認為質同量成反比，如果一日要做幾百個決定就拖低質素（唔知係咪呢）。但好似話Steve Jobs呀 小朱呀之類成日著同一款衫，原因都差不多，因為唔想諗，腦力花在其他地方云云。當然，你要做到好勁嘅勁人先有呢啲Luxury，文入面一樣有講，Jeff Bezos開頭搞亞馬遜嗰時，咪又係要親力親為一日做幾百個決定。但個原則大家都可以學下：隨住你變到小頭目team 頭管理層，就唔使樣樣嘢都落手落腳管啦。

FB Post Summary—從缺

15. 係喎，真係從缺。點解從缺都要講？就好似”This is a blank page”咁。費事舊讀者以為呢個環節無聲無息八萬五咗，或者新讀者唔知有咁嘅環節—呢個環節我會貼返我在Facebook 出過嘅文同埋summary，廣告文除外—而呢兩日除咗廣告文係冇其他嘢嘅。都講過，時間緊迫嘅，當然係Patreon讀者優先。