Santa Rally．PayPal Dropbox再創新高．全球化如何影響歐洲公司。聯儲局最新預測。基金經理冇乜渣現金，驚驚。見工講呢六樣嘢就實玩完。人人都憎Facebook．賣淫不是選擇 (Patreon)

快評兩句—Santa Rally

大師冇點你—PayPal Dropbox再創新高

每日一圖—全球化如何影響歐洲公司。聯儲局最新預測。基金經理冇乜渣現金，驚驚。

Good Read—見工講呢六樣嘢就實玩完。人人都憎Facebook．賣淫不是選擇

FB Post Summary—Ivan已拎台灣居留權

1. 祝大家平安夜快樂。又，Ivan在台北嘅工作效率真係極低，硬件（酒店房，新電腦）同軟件（我本人嘅時間表）都有影響。所以亦係嗰句，新讀者，唔好因為呢幾篇較hea而咁快停訂—因為在台北呢幾篇真係寫得短啲（不過，今次都1600字呀），至少睇埋下星期二三我在香港嘅先做結論。

快評兩句—Santa Rally

2. 原本應該第度寫，但等唔切了。好簡單，美股係有所謂嘅Santa Rally—指嘅係年尾最後5日，加埋新年嘅2日，呢7日，史上回報一般都相當強，強過其他7日組合（當然係作者data mining 得嚟）。

3. 而一般見到，如果呢7日跌市呢（就只有以上呢堆年份），下個月，同埋下年，多數冇乜運行。

大師冇點你—PayPal Dropbox再創新高

4. 冇乜特別，兩隻都係呢排推，PayPal更加講足半年。DropBox呢？慎防有新讀者唔知，似乎估佢會賣盤畀大型科企。重覆，2021年，中國美國嘅主題都係二線科技股。不過近期都完全見到晒係咁

每日一圖—全球化如何影響歐洲公司。聯儲局最新預測。基金經理冇乜渣現金，驚驚。

5. 全球化如何影響歐洲公司—我自己覺得個圖做得唔多好，左右唔同scale，仲要一個升一個落，好易令人以為2011年就過咗頭。但講返，見到睇Stoxx Europe 600（歐洲股嘅指數）入面嘅成份股，2004年過半收入嚟自歐洲，嚟自亞洲得11%。而家？嚟自歐洲嘅收入得43%，亞洲去到19%。此消彼長。當然因為全球化，而事實亦係個經濟重心向亞洲移。美國仲叫做保得住，但歐洲就讓位了。

6. 聯儲局最新預測—原本想寫文，但未得閒，咁睇咗最重要嘅嘢先。聯儲局一年議息8次，有4次畀人認為特別啲，因為會有經濟預測數據。早排係2020年最後一次，重點當然係睇12月同9月時聯儲局嘅睇法點變。幾易見到係樂觀咗嘅，估GDP估得高咗，失業率估得低返，通脹估得高啲。理論上好似加息升溫，但只係由好好好低溫變咗好好低溫咁。你睇埋最後個圖，暫時去到2023年都不打算加息。但當然下次開會可以調。

7. 基金經理冇乜渣現金，驚驚—灰色棒係基金經理持有嘅現金水平。藍色線係標普指數。咁你應該見到，兩者有一定負相關，亦同你嘅常識符合，兩者互相因果。3月嗰時嚇到賴尿，基金經理當然渣重現金，事後見到當然係買入機會—但亦正因為佢地沽晒貨咪會跌市，咪會渣重咗現金。咁而家，見到只係渣4% cash，多年嘅新低。似乎係調整訊號。亦好合理，啲錢都放晒入去，仲邊有子彈買？所以你見我呢排睇法保守啲。

Good Read—見工講呢六樣嘢就實玩完。人人都憎Facebook，除咗投資者．賣淫不是選擇

8. 見工講呢六樣嘢就實玩完—CNBC make it 好多呢類文，有時都廢廢地（但廢唔過香港嗰啲），不過呢篇我覺都不錯。邊6樣嘢易出事？I’m a motivated self-starter（廢話），5年後我想坐到你個位（想點？），我同我舊老細唔妥（同意，但我離開星展後見工我都有照講），我嘅缺點係完美主義（一巴星佢啦），可唔可以講多啲關於公司嘅嘢我知（上網查啦），份工福利點？（好多人講過啦呢個）

9. 人人都憎Facebook，除咗投資者—相當長嘅文，但唔算難睇，又多圖。大家咁憎Facebook，嗰一大堆嘅理由，正係公司咁成功嘅原因。作者認為自己可以精神分裂：道德上文化上呢間公司真邪惡，但在商營商，呢間公司真係無敵咁滯。

10. 賣淫不是選擇—好似同我立場唔係好同嘅文，但記住唔好圍爐只睇自己同意嘅嘢。作者固然係女性，feminist，但佢係反對近年全世界大行其道嘅「性工作都係工作」。亦所以佢堅持寫Prostitution，唔係Sex-work．值得一睇嘅文，佢嘅argument 唔少，主要係講「呢個工作同其他工作唔同」，「妓女aka性工作者係咪真係有say no嘅權利」等等。BTW，Unherd嘅文幾好睇，你見我都成日貼，亦都免費，但唔係太多金融嘢。理論上佢地嘅文冇特別偏左或偏右，核心價值在個名：As you may have guessed from our strange spelling, UnHerd aims to do two things: to push back against the herd mentality with new and bold thinking, and to provide a platform for otherwise unheard ideas, people and places.

FB Post Summary—Ivan已拎台灣居留權

11. Ivan已拎台灣居留權—全無公共性，但我FB Page冇寫過其他嘢，寫呢度優先。而如題，我今次嚟台灣係為咗拎個居留證，已成功。不過答返FAQ：居留證唔係護照唔係公民，正如綠卡唔係美國公司，我可以在台灣定居，唔使用台證，可以做嘢，但冇護照冇得投票。另外，當然我係會12月27日返香港，雖然我畀人炒咗（有冇人未知？），但仲要坐到3月。而呢個Post 700 人like，證明個FB Page唔係冇人睇嘅。