年度鉅獻：股市脫離實體經濟，咁究竟受乜影響？ (Patreon)

2020最大教訓：股市同實體經濟脫節

冇寫嘅嘢：企業盈利，A股，樓價，聯儲局資產負債表（講埋原因）

買港股正傻仔？港股同美股周期

金價：股市，債息，美匯指數

聯儲局有六年冇加息冇減息，唔通股市就唔郁？

股市：債息，美匯指數

結論？

1. 呢篇算係年度鉅獻。因為我星期一就完成隔離14日出關，亦都係我被炒嘅頭七！噢耶。難得出到門，當然會留返一星期玩下。咁文我都會照出，但就真係會寫短啲了，亦都反正年尾，假期，冇咁多嘢寫。

2. 呢個圖真係蘊含唔少智慧，我會畀埋隻Excel大家玩。你鍾意點玩都得。有人問點解用一年一年，都問得好。有閒情嘅你可以做下每個月，其實都得。不過講返，其實資產價格可以郁得好急，太短期睇又未必有意思。

3. 你鍾意嘅，可以run 個negative correlation 咁，我都識。但咁寫反而悶死啲普通讀者。所以我用個layman啲嘅角度寫

2020最大教訓：股市同實體經濟脫節

4. 都年尾，講股票都講得差不多，又講下啲宏觀少少嘅嘢。但真係唔係講經濟，都話「股市同實體經濟脫節」。今年你就算輸錢都好，至少都學到一樣嘢，就係「股市同實體經濟脫節」。

5. 下年經濟，就梗係反彈啦，唔使講。但知道又點？亦記住，人人都知嘅嘢，即係反映晒在價格上，唔會幫你賺到錢。講經濟呢啲，只係畀某啲人（包括我）搵食用，同客吹水用，寫嘢用。但，對你投資，幫助實在係冇乜。既然2020年經濟好差但股市可以升，咁2021年經濟好，股市點解唔可以跌？

6. 但當然，都仲係睇好股市，但唔係經唔經濟嘅問題。希望大家明個邏輯。

7. 亦因為咁，你見我連GDP都費事放入去。首先，香港股市就唔係睇香港GDP啦，指數好多都中資股，而反正中國GDP年年都升，爭在升多升少，亦有人話有水份，隨你。美股呢？一樣，「邊個話美國股市睇美國GDP？」。首先好多公司收入嚟自海外，二來，上面咪講過，「股市同實體經濟脫節」。你鍾意自己搵數字都得，我都有在手，我都做過，但冇乜意思的。

8. 堅持想睇嘅，呢個圖，舊的，2019個數好似未準，但不重要。我想大家特別睇。2000-2002年，經濟三年都增長，但股市跌足三年，差不多高位跌一半。See？實乜體經濟？當年仲要未有咁多內地公司。

9. 仲有，2003年所謂沙士好大鑊，你肯定？當年經濟增長3%，股市升35%。

10. 仲有，睇2008同2009。2008根本「實體經濟」有正增長，但股市跌一半。2009「實體經濟」收縮，股市升五成。

11. 唔咁極端嘅，睇2017 同 2018。兩年經濟增長都係差不多，但一年股市升36%，一年跌14%，又點解？

12. 某程度上，睇2008 2009會睇到的，係炒定下年嘛。咁所以咪講過，股市一定炒將來炒預期咯。而「實體經濟」一定滯後嘛。咁所以，今年股市，炒定下年復蘇，又點唔合理？點先叫「唔脫節」？

冇寫嘅嘢：企業盈利，A股，樓價，聯儲局資產負債表（講埋原因）

13. 另外，張大圖入面，冇「企業盈利增長」。其實會幾有用，大約股市都跟企業盈利增長（而企業盈利不一定跟實體經濟，你睇啲科企？實體經濟仆直，佢地盈利照升）。睇上面個圖見到，大約都跟。但，難在乜？難在，你好難搵到呢啲數據。咁固然Bloomberg會有，但分析員估盈利，往往都滯後，股價股市升咪調高，跌咪調低。你今日見到啲盈利，佢可以好快斬走一大截—所以，你事後睇呢個圖就有用，但你在個風浪中，你根本唔知見到分析員估嘅數，下星期佢會唔會調低兩成。

14. 原本可以加埋樓價，但香港樓價差不多年年升（除咗08），「冇乜好討論」。亦證明香港樓市嘅Dynamics 同以上其他呢堆嘢好唔同，切記。

15. 另外，我冇放嘅係A股。因為自己唔熟，亦冇乜讀者買。但某程度上有趣，值得研究下，搵者搵日講。

16. 仲有。可以放但我冇放嘅，其實係「聯儲局資產負債表」，呢個先係近十幾年股樓黃金Bitcoin各樣嘢都狂升嘅元兇。但我想另外開篇文講。有興趣嘅，自己加哦數入表入面。

買港股正傻仔？港股同美股周期

17. 入戲肉，講返呢個圖，我會不停重覆咁貼，或者Extract一部份。

18. 應該唔使點解，港股（恒指），美股（標普指數），債息（美國10年債券債息），美匯指數。另外仲有美國聯邦基金利率，同埋金價（美金每盎士）。大把玩法，任你組合，我只拎幾種嚟講

19. 首先，呢幾年買港股真係畀人恥笑，甚至之前有個讀者叫我唔好寫港股，因為佢唔炒（反正佢已冇訂，咁我講句：畀12蚊美金咁巴閉，你畀12000蚊我就任你點唱寫乜都得）。事實美股近年跑贏晒全球，冇得拗，亦強得有道理。只係睇啲科企嘅影響力同盈利能力都知

20. 但，你睇返過去咁多年，美股港股，往往同升同跌，週期係差不多嘅。咁固然人地升嗰時升得多過你，跌嗰時跌得少過你。多年積落，就拉開晒（又，記唔記我講過，做人都係咁？你唔使逆市發圍，但順境時做得好過人一啲，逆境時輸得少過人一啲，幾個週期就拉開晒）

金價：股市，債息，美匯指數

21. 咁既然港股美股周期差不多，就好辦啦。可以當「股市」咁講。之後我地睇下同其他嘢嘅關係。

22. 首先講金，你見到，某程度上可以分散到股票嘅風險。股市（特別係港股）回報差嘅年份，2008，2011，2018（都算），同埋今年，佢都回報好。

23. 另外你見到，金價，同10年美國債息，大約係負相關嘅。好合理，對不？債息大跌嘅年份，金價例好。而金價因為係美元報價，所以弱美元亦都會利好金價，一睇就見到。

聯儲局有六年冇加息冇減息，唔通股市就唔郁？

24. 戲肉，當然係講股市。但首先我講一樣嘢。之後都唔會講，就係聯邦基金利率，聯儲局加息減息。你見，同股市關係，係冇乜嘅。反正中途好多年零息冇郁過。然後2015-2018年加足四年息，但股市都係升下跌下。所以唔使過度演繹。要留意，但唔好以為聯儲局一加息股市就死，或者一減息就掂。因為聯儲局只係控制短息，由聯邦基金利率，再傳導去你日常見嘅咩LIBOR HIBOR，再轉去短債嘅債息。去到長債，已經唔係聯儲局加減息可以控制（但聯儲局近年會直接買債，係另一回事）

股市：債息，美匯指數

25. 我遲下可能再寫文講。但唔使好專業都知，債息跌（即係債價升），應該係利好股市嘅。因為機構投資者，錢嘅嘢，都係買股或買債。債息低嗰時，即係回報唔吸引，咁應該會利好股市。呢兩年特別明顯

26. 咁你睇圖見到，的確債息跌嘅年份，多數股市都好，但唔算太過絶對。2008年你理解係金融海嘯，但2011年就難解釋（而投資唔好乜都夾硬要問點解，有時就係奇奇怪怪）

27. 最後啦，美金，美匯指數。一般都話美金弱有利股市，特別係新興市場，似乎一般都係。因為美金本身好多時係「避險資產」，美匯指數係「風險胃納」指標，特別係大件事嗰時。你見金融海嘯又好，疫情又好，一大件事，人人都渣美金。所以強美元往往同股災同時發生。

28. 咁睇表，亦都見到大約係咁。美匯指數大跌嘅幾年（2007，2009，2012，2017，2020），都係股市做得好好嘅年份。

結論？

A股市同實體經濟脫節

B港股同美股周期冇你想像中咁背馳

C股市差時金價往往好

D債息跌同弱美元利好金價

E聯儲局加息減息對股市影響冇咁簡單

F債息跌同弱美元利好股價

30. 有冇發現，C，D同埋F，放埋一齊，好似有少少矛盾？都唔完全係嘅。同埋，呢啲東西，唔係物理鐵律咁絶對嘛。