［號外！］Tesla 入標普指數前花生日，記住睇埋其他公司 (Patreon)

1. 未必有用，但寫咗先，反正號外，Extra嘢。就算幫唔到投機（一兩日嘅嘢當然投機），都會令大家識多咗嘢

2. 首先，再提大家，今晚（星期五）就係Tesla執位日子，加埋四巫結算日，大把化生食。而昨晚（星期四）Tesla創咗新高。呢啲我在新Facebook Post有講，不再重覆。

3. 另外，唔知前因後果仲想快手溫下書嘅。睇返舊文。兩篇專題，第一篇係Tesla入標普全攻略，第二篇特別講埋今晚嘅嘢。

4. 咁今篇講乜？講返，寫第二篇嗰時，講過以下嘅嘢

今次加入嘅Tesla，市值近6000億。剔除咗邊隻？反正你都唔會理，係一隻叫AIV 嘅公司，市值60億。好啦，簡單算術，咁剩返嗰5940億邊度嚟？就梗係要沽走其他公司啦。邊間？我都唔知，標普公司好似冇講啲比重變更。但正常地推論，應該就係每間跌少少出嚟，每間公司按比例咁比重跌啲。咁你話，500間好細影響？Yes and No．都話係史上最大嘅換馬，影響唔會細，760億，分佈去唔同公司，對於一啲成交唔多嘅公司都幾係嘢。 咁何謂「成交唔多」？就都要相對返市值。所以我會整個表，計返「成交／市值」細嘅公司，應該會異動。而如果因為指數調整呢啲公司忽然跌，就會係買入嘅機會。壞消息係呢個表要用Bloomberg整，而我身在台北，所以要等公司同事幫我整。過幾日再貼。

6. 而呢個表，我已經叫同事幫我整咗！大家畀啲掌聲佢。你在Attachment會搵到。我呢度cap 圖快手解。

7. 應該好簡單，就拎個標普500指數落嚟。哥林A係編號，B係公司名。C係30日平均成交，美金。D係市值，都係美金。C除以D 再乘 100，就係E

8. E呢個其實係「換手率」嘅概念，睇下一日間公司有幾多%嘅股本交易。數字越大代表越「當炒」，你見第二最大嘅，係AIV（呢隻會踢出指數！好似一個月跌咗八九成），12%，你可以當一日有12%嘅股本易咗手。另外仲有最勁嘅American Airline，United之類嘅航空股，仲有波音飛機。仲有郵輪股，全部近期狂炒嘅嘢。

9. 仲有你見到Tesla，「入咗標普指數咩？」。係未的。我放埋在呢度比較下，都係極熱炒嘅股票。你大約可以話，一日有3.9%嘅股本易咗手。幾咁勁。

10. 亦因為咁，我話其實今晚被動資金追入Tesla，未必真係好難消化。因為公司成交太大太大。但又有幾多係因為近期炒入指數近期先忽然有嘅成交？就唔知。所以，嚴格啲嚟講，應該用90日，或者未出入指數消息前嘅30日。但，是但啦。叫同事幫我做自己嘢（雖然佢地都會到學到嘢），仲咁多要求咩，做人唔好咁。

11. 另外，仲有真係要講嘅，應該用Free float market cap添。有啲股票係創辦人或大股東渣住（例如Elon Musk自己渣好多Tesla），咁嗰啲根本唔會在市場上trade，所以應該扣起的。但，請睇多次樓上第10段bold咗嗰句嘢。

12. 而反正，我最關心，唔係最「當炒」，而係最「唔當炒」嗰啲，即係哥林E入面，個數字最細嘅，就係下面呢堆公司。

13. 留意有堆公司我黃色咗。見到有乜特別？「都係出名嘅公司」（廢話，標普500），「個名特別長」。都係的，因為你見到有Class ABC之類。好多人都知畢菲特嘅巴郡（Berkshire Hathaway）有A股B股，Google都有ABC股。理論上，應該拍埋一齊計？但，重覆，睇多次第10段bold咗嘅字

14. 所以就係睇，剩返白色嗰堆嘢。

15. 「唔當炒」即係點？即係成交細，照計指數換馬，影響股價會比較大。而除咗Tesla新入外，其他照計全部都係沽盤。所以睇睇呢堆公司會唔會有啲異常嘅沽壓。有嘅，當然係買入嘅好機會。

16. 但，亦可能我諗多咗，可能乜事都冇。無論如何，睇下啫，又唔使錢。況且呢篇文都係Extra益你。

17. Linde（LIN）化工公司，做氣體嘅（我識！因為同大陸間盈德氣體2168當年有啲關係）。Globe Life當然係做人壽（我識！有個棒球場！）

18. 再下面有啲好出名嘅公司，Walmart，CBOE（芝加哥期權交易所），Pepsi， P&G，Johnson & Johnson，雅培藥廠Abbott，做醫療設備嘅Stryker （我識！因為有讀者做呢間公司！）等等

19. 今晚食下花生先。下面仲有後記，但唔關事的，趕時間可以唔睇

=================================

20. 後記：可以想像到，我畀公司炒咗，對我寫Patreon，最大不便係冇得用Bloomberg．我其實一早有諗呢個問題，幾時都有危機感。我甚至諗過不如在屋企整部（！！！！！）。知唔知幾錢？皮幾近兩皮港紙一個月啦。

21. 嗰時我係有諗過被炒就加價嘅（幾咁仆街），但諗住每人月費加1蚊美金咁。點解？800讀者，每人1蚊美金，大約6000港紙，係部機成本嘅三份一。然後呢？再有三份一，由將來讀者攤分。咁仲有三份一？我自己食

22. 不過思前想後，都係不值得，too much a luxury．直接啲講，就算賤到全部叫讀者夾返，我都覺得唔抵。反正唔會冇咗部機寫唔到文。我甚至一開頭已經同公司同事講，唔好以為老奉有 Bloomberg用，呢部機成兩格嘢，等於可以請多個人。公司如果話要減cost，咁你寧願減部機定減人？當然最後就why not both，冚球鏟啦。全部cut晒，租我地間房出去打乒乓波都得。

23. 但話說回頭，其實有啲平價版啲嘅東西，例如Fact Set之類？我會再去發堀下。都係投資（落你地呀！）嘅一部份。正如我訂呢樣嗰樣都唔少錢，但係用嚟畀我知得更多，然後寫文幫你地的。無論如何呢個Bloomberg大計（諗落都型，但亦係好浪費）早就胎死腹中，但同大家分享下。