道指30000點！Tesla BlackRock再升。走漏美聯 1200。太陽能股—拜登Trade。樓市奇聞—荃灣樓兩房300萬搞掂 (Patreon)

道指30000點！

Tesla BlackRock再升

走漏美聯 1200

太陽能股—拜登Trade

樓市奇聞—荃灣樓兩房300萬搞掂

道指30000點！

噢耶，30000點，當然爽，Nasdaq都差不多破頂。但幾時都居安思危。唔係叫你而家沽晒佢（千萬千萬唔好），甚至唔使減持。而係時刻思考下，萬一逆轉時你又點？下星期即跌3000點嘅（10%好多咩？），心理或開支上受唔受得起？又或者，做乜之前唔坐貨？唔使孖展唔使槓杆（一向不建議），但老套都係要講，Stay invested。唔係話老人家「一早叫咗你 XXX」，而係認真諗下，之前等乜？

呢排趕在去台灣前同讀者食飯，都仲有啲讀者有舊大錢唔知買乜。見到高位要追當然有心理障礙，大跌時又唔敢買，絶對人之常情。點克服？其實並唔係咁易。實行上，就係合埋眼買落去，定咗日期就算，普普通通嘅咪分段，月供。簡簡單單，美股（可能買標普ETF好過純科技添）一半，中港可能四份一（但我係唔會只買美股的），剩返可能買領展823之類（買到樓嘅都係應該買），平安。

Tesla BlackRock再升

自high時間，Telsa又創新高，5000億市值了。Elon Musk甚至富貴過Bill Gates（雖然Microsoft市值仲係Tesla 3倍）

想帶出嘅係，埃汾係打倒昨日之我的。一向我都係質疑Tesla極貴。但When things change, I change my mind，投資嘅嘢要有個想法，但唔係辯論比賽，唔好太過執著．並唔係Tesla忽然平咗（幾時有平過？），或者賣車賣好咗（銷售增長都係15%左右）。而只係因為會入標普500指數，所以唔係叫你長渣，記住12月21號入，可能12月中就散水—當然如果咁堅一個月升一個開嘅，跌一半你都有錢賺，咁你一路放長就OK嘅。

喂，一時又話要有自己想法，一時又話唔好執著，咁即係點？你講晒啦 —係！咪叫你唔好執著！又執著啦！真的，同做人呀差不多，冇話鐵律，好多金句心法建議往往自相矛盾的。唯一嘅方法就係睇多啲學多啲，同埋自己落下場—當然控制好你嘅注碼。你應該只拎閒錢嚟投資，幾皮嘢開始都可以，閒錢都冇嘅，諗方法開源節流吧。

另外，Black Rock貝萊德亦係成日推嘅公司，亦創新高。舊經濟，悶嘢，剛做咗單收購，有機會再講。不過留意都開始引嚟政府注視，樹大實會招風，但應該仲有一浸吧。

其實而家呢啲位買個股嘅，可能係啲舊經濟，或者big tech（FAAMG）以外嘅科企會好啲，你見呢期我好少講 Facebook Amazon之類。反而ASML 之類都仲日日破位。

走漏美聯 1200

呢個唔係要攞威，係失威！慘呀。真係有讀者問過我，施政報告有冇乜可以炒，我好似都只係答佢「諗下」。但，早兩日（週末同星期一），媒體已經放晒風講會減辣，照計大把時間星期一買隻美聯的。慘。走漏晒。而家追就不了。但真係見到有機會買到的。亦所以，點解要睇唔同媒體嘅嘢—十幾年前炒中資股，我連大公文匯都睇的（後來有咗微信之類就爆料快過紅媒好多了）

太陽能股—拜登Trade

相反之下，太陽能股一路都有講。拜登Trade嘛，特朗普似乎接受現實（雖然口硬），叫官員安排交接，又炒多轉。我估差不多了，特別係你見炒到去啲二線（例如上面呢隻），應該尾聲了。

樓市奇聞—荃灣樓兩房300萬搞掂

好耐冇寫樓市，輕鬆啲，奇聞一則，當然更奇嘅都有，例如啲「冇契樓」。

講返呢單，300萬荃灣兩房，實用335尺，兩房，冇花假。咁當然唔會靚仔，舊嘢，50年，但未去到你想像中危樓咁。另外，原業主夠晒歷史感，浙江第一銀行，冇返咁上下年紀都唔知。但又冇你想像中咁耐，1995年買入，間銀行後來變咗永亨再變華僑永亨。銀行就135萬買，而家300萬賣出去，搞咁多年先一個開，乜都蝕晒。

睇返相，入面乜都冇，裝修都搞一輪，但我覺得無論係自住定租出去定賣，都係筍嘅。純分享，但呢啲盤應該唔係一般人執到。然後扯返到去，好似價值投資咁，好好好細心，都仲有機揀到啲好股票，但越嚟越難。過去N年「價值投資」大幅跑輸，不過物極必反，有機會再寫下。但人生有幾多個N年？捉唔到趨勢嘅，就不如都係還原基本步，每樣買啲。科企會買，但領展都照買（當然領展係咪「價值股」都係一個問題）。