ivanliresearch

招商局房託1503。LV告返Tiffany 轉頭。預告：平保可唔可以買起成間匯控？ (Patreon)

Published:

2020-09-29 17:52:56

Imported:

2021-07

Content

是日股仔：招商局房託（1503）

LVMH正式告返Tiffany轉頭

（預告）平保可唔可以買起成間匯控？

每日一圖　—法國人食飯最耐美國人最快。美國大選有人唔認輸，各種資產會點？以前總統死埋或者彈劾又會點？

Good read —十個最廢的財經口頭禪。點解世間再冇畢菲特。點解Spotify咁多古怪純音樂「藝人」

FB Post summary—十五歲有隻11萬嘅勞力士。仲要係自己買！（兩篇）。日本股市迷失三十年後返家鄉。

1. 又出咗週日號外，寫恒大，果然係冇事的。如果有空，又有啲過癮又多人關心嘅課題，又要多圖，又同金融有關嘅，我就會索性在呢度寫號外。好似恒大咁，當免費送畀你地。然後再貼上去Facebook呃下新讀者，係咪好有效？麻麻地，一次幾件咁，好過冇。但我唔算貪心。反正益開大家，就放埋上去，有新讀者就bonus。總好過就咁在Facebook寫

2. 同時戴定頭盔。搬咗Office，暫時對我生產力冇乜負面影響（主要係寫自己文嘅生產力！），甚至可能好咗。

3. 年尾埃汾要去一轉台北—係喎，去到隔離十四日，返嚟又隔十四日，有電腦用，照計寫文都唔會受影響。但他日如果真係通返關有得去旅行（我是樂觀的人），外遊時我估會有啲影響。所以趁而家可以Extra畀到大家就畀定啲先。「第時有一兩次做唔足都希望大家手下留情」

4. 以往收費專欄玩法？根本Homeblogger個收費專欄開始，我就冇去過旅行。咁我估如果真係去旅行，二四六當然繼續，但寫短啲咁咯。

5. 又，再提大家一次，星期四雖則紅日，但會有文的。等我同埃汾太食完結婚周年大餐（應該都係打邊爐）就寫！

是日股仔：招商局房託（1503）

6. 真係要利申，你見我好少寫啲咁細嘅公司仲咁詳細。但，絶無任何金錢或非金錢利益，我亦都唔識公司任何人，亦冇任何朋友渣咗。實情係我好似今日先知有呢隻嘢。所以唔係微訊女騙局。

7. 反正之前有人問我邊度搵靈感或點揀股，咁有好多方法。但好多時係……睇文章睇新聞睇到。

8. 例如今日，就係見到呢段咁嘅嘢。然後望下1503股價，以為大升，點知冇乜反應，升2%咁。

9. 明顯地，我係BUY呢種「注人母公司資產」嘅玩法。雖然玩咗冇三十年都廿年，但橋唔怕舊，市場受就得。甚至你可以懷疑因為「注人母公司資產」而炒起唔多make sense，我都覺。但，市場受。

10. 另一方面，亦係嗰句，「如果我錯呢？」。唔止睇upside，最好睇埋downside，相信呢隻嘢都好難跌得多，downside極細．而招商局，國企公司，出古惑嘅可能低啲—當然都係會出術，但唔係嗰種爆煲消失嘅公司。

11. 介紹返，1503，睇名都知，招商局旗下嘅REIT，香港上市的（廢話）。物業就全部在大陸，其實都唔係好多，可以睇中期報告。5個物業，全部在蛇口。應該有人知道埃汾N年前在招商銀行返過工，都去過總壇，蛇口南山，但以上五座嘢在邊我完全唔知，你可以去考察下。話寫字樓及零售物業各佔比70%及30%

12. 另外，都話招商局嘅嘢，但招商局入面N咁多東西，等於你話中信乜乜，都有好多嘢。所以睇埋，呢間1503，母公司係招商蛇口（001979），深圳上市公司，滬深300指數成份股。1200億人仔市值（重要的），不過股價表現就……．

13. 好啦，講返，呢隻1503，上市都未夠一年，舊年12月上市的。招股書在此，不過我估你唔會睇。股價就認真麻麻，3.42定價，一度跌到2蚊咁滯，其實而家都只係2.28。

14. 重點係，睇市值，26億港紙。母公司（招商蛇口啦，唔好講到招商局咁遠）1200億市值，資產唧死你都得。

15. 我預測埋個故事點玩，好大機會呢，就玩到50億市值樓上。點解係50億？聰明嘅你知道，因為50億市值先入到滬港通，北水可以買。但留意返，唔係一到50億就得，亦唔係佢季檢前你埋到去就得，要計12個月平均

16. 仲有另外，唔知有冇人留意到，但REIT係不能入滬港通嘅。你見領展823，1300億市值，恒指成份股，都冇入到滬港通。之但係，我覺得呢個東西不難克服，當然要佢地慢慢傾，但我估可見將來會傾得成嘅。到時多一個爆發點。

17. 最後，最重要嘅嘢，派息。唔熟嘅話你知，REIT基本上「可分派收入」要九成派出嚟，不能好似收租股（希慎信和之類咁）咁keep住唔派。所以差不多睇收幾多租，扣除開支，就係你收到嘅息。

18. 你見段新聞管理層話年度化有10厘息，都係真嘅。但，下年得唔得先架？

19. 上面呢個係Bloomberg分析員估嘅數。下年係0.23，人仔添喎（應該係）。股價係2.28港紙，下年11厘半添呀，而相當肯定派到。順手講埋，留意得兩個estimate，就係幫佢上嗰兩間。其中一間係星展，寫嗰個我當然識，但唔熟，近兩年冇講過嘢，只係食飯撞到say過Hi

20. 但，派息唔係睇一年，唔係睇兩年，係一連串嘛。呢個又係好多人嘅盲點。可惜將來嘅嘢，大家都唔知。不過至少，2021，2022年都會派到的。因為公司有分派承諾—但其實又係數字遊戲，唔夠咪借錢派咯，你公司唔會多咗價值。

21. 最新嘅分派，呢度，中期報告有。留意可分派收入，8200萬人仔。全部派晒的。仲有間嘢會派中期息，而好多大陸公司一年只係派一次息。你可以簡單地年度化，半年派8200萬人仔，全年咪差不多1.64億人仔，1.9億港紙。26億市值嘛，其實7厘息左右。當然你可以估下半年啲收入會唔會好啲，有可能的，上半年肺炎嘛。仲有，其實佢有「分派承諾」，所以全年應該唔止派1.9億港紙—但記住，其實冇乜意思，先洗未來錢之嘛，你公司真係搵到幾多錢先重要。

22. 結論？其實而家我都放心買，你就當佢7厘息啦下。當然，想穩陣啲睇埋全年業績先，睇下下半年啲租金點。但出嚟得都下年3/4 月。

LVMH正式告返Tiffany轉頭

23. 之前都寫過，LVMH彈弓手，話咗買Tiffany（舊年10月尾），兩星期前就反口話唔買了，法國政府都出埋。唔止，而家告返Tiffany轉頭，原告變被告係會發生的

24. 誰是誰非？真係唔知，你估我係法官咩。固然個潛台詞當然係買貴咗想壓價，咁有冇得咁，就上法庭先知。真實情況，當然唔係「簽咗約就一定要守合約精神」或者「一日未畀錢一日都可以反口」咁兩分咁簡單

25. LVMH主要一個論點，就係MAC，Material Adverse Change，話疫情之中Tiffany仲借多咗錢呀，閂舖呀，減budget呀，仲派息呀咁，就令到「呢間公司已經唔係最初我同意買嗰間」，咁都得？！

26. 我當然唔係律師，但感覺上似乎道理唔在LVMH嗰邊，覺得法國佬都係錢多，律師費唔多錢，壓低個收購價可以慳返幾十億都唔奇，搏得過。甚至可以兇到 Tiffany收順啲。我傾向覺得會買得成的，爭在係咪原價

平保可唔可以買起成間匯控？

28. Financial Time嘅內幕料，話「平保增持滙控屬財務因素 非政治考慮」，唔知呢，可能係，反正中途改變主意亦得。但想討論一個技術問題：

平保，可唔可以成間匯控買起？

29. 今日唔講，下次講，好可能係出篇號外。不過留意，以我以往嘅作風，你應該估到上面張圖係誤導你嘅。

30. 不妨諗下得，定唔得，同埋理據。

每日一圖　—法國人食飯最耐美國人最快。美國大選有人唔認輸，各種資產會點？以前總統死埋或者彈劾又會點？

31. 法國人食飯最耐，美國人最快—但其實我唔係好知點計，等上菜計唔計？食完飯傾到埋單又計唔計？西意法好耐，美國好快，唔太意外。但原來韓國耐過大陸耐過日本。其實呢個時間同乜有相關？可以研究下，會唔會係工時？定係食物嘅垃圾程度？

32. 美國大選有人唔認輸，各種資產會點？—雖則我估拜登會相當輕鬆勝出。但，「如果我錯呢？」。2000年布殊鬥戈爾都搞成個月，戈爾先肯認輸。咁其實都估到，當時股票當然香晒，small cap跌得最勁。有乜升？美債，同埋黃金。

33. 總統槍擊，彈劾，辭職，死埋又會點？—有歷史你睇，次次都史無前例。唔好講世界大戰咁誇，但JFK遇刺後，美股照升不誤。尼克遜辭職（留意佢其實冇畀人彈劾！未彈已經辭咗），都係跌一陣—當然，就從來冇試過有總統連任失敗而唔肯走。

Good read —十個最廢的財經口頭禪。點解世間再冇畢菲特。點解Spotify咁多古怪純音樂「藝人」

34. 又，除非另有注明，否則good read default係英文。雖然我啲讀者英文好似都OK，但唔咁OK嘅，更加要睇多啲。講真的，如果只能學一樣嘢，學好英文，幫到你搵工，投資，求偶。識嘅嘢都唔同。你唔使好叻，唔使講得好流利，理解到我平時貼嘅文已經好夠（都唔使全部，有啲會幾深，唔係英文深，係入面講嘅嘢，例如Aswath Damodaran啲文）

35. 十個最廢的財經口頭禪　—很正。包括「市場最憎不明朗因素」「業績遜於預期」，明顯地我都有講。你話廢，冇用又唔係，但投資嘅嘢，根本冇得跟rules，好多rules係矛盾的。但你慢慢理解就會功力升。有機會寫個post

36. 點解世間再冇畢菲特—應該話，點解其他人都好難好似佢以前咁，年年跑贏大市。係時代同環境多過人。所以真的，固然我明白自己揀股炒股投資係好過癮（否則我唔會寫文，你亦唔使睇文），但亦記住點都有返一定錢係買悶蛋ETF。

37. 點解Spotify咁多古怪純音樂「藝人」—好簡單，係game the system．SEO（Search engine optimization），stream bait。你地搵咩Relax，Therapy，Natural Sound，佢地咪去迎合你。Spam你，因為串流觀眾多就收到錢。有錢就有人出古惑。