關於一段顏卓靈鮮為人知的故事 (Patreon)

話說尋日上天地出版社拜年派利是，同啲同事吹水期間，講起「狂舞派3」，我就講起顏卓靈真係做得好好，點知我嘅負責編輯小輝突然間講咗一件令我覺得幾震撼嘅事！佢話：「你知唔知佢嚟過天地做我個同事㗎？」我話唔知喎，有件咁嘅事！之後在場嘅天地同事就你一言我一語回顧當日顏小姐返工嘅情況⋯⋯

原來幾年前顏卓靈因為要拍一套台灣嘅電影，好似叫做乜乜乜鬼咖啡室，由於電影裏面佢要飾演一位出版社嘅編輯，電影公司就真係同天地商量完，安排佢真實地返咗兩日工，根據天地同事嘅說法佢係認真地去同啲作者對稿，係認認真真冇錢咁工作，就係想了解角色本身嘅處境！個個都大贊佢專業，但當我問到佢其實有冇對我啲稿呢？就冇人記得！😅

而且顏小姐第二日中午同大家一齊去辦公室附近一間韓國餐廳食飯，食完佢仲走咗去買單！而放工嘅時候，佢為咗真實了解編輯放工嘅情況，真係同大家一齊搭地鐵，送到編輯返大埔，一啲架子都冇，一啲明星派頭都冇，兩日認真工作冇保母冇助手真係全部自己學習乜嘢係一位編輯！呢件事令我覺得對佢更加有好感！但最可惜嘅係，當日佢喺天地工作，我冇機會撞到佢添！🤪