恐怖頒獎典禮 (Patreon)
Published:
2021-01-18 01:49:23
Edited:
2021-01-18 01:49:42
Imported:
2021-07
Content
由小學開始,我係一個聽眾,聽流行曲聽電台聽訪問睇各台每年流行曲頒獎典禮,由以前細個係興趣到而家身為傳媒工作者係職業所需;所以琴晚無線勁歌金曲頒獎典禮我都需要去睇......只能用慘不忍睹來形容,除咗林家謙嗰段可以正常呼吸之外,其餘部份都完全係呼吸有害!希望無線記住,佢哋每年一度嘅唔係新人推銷巡禮,而係喺樂壇稍為有成就嘅歌手成績表!但係琴日出現九成九嘅歌手,我真係唔知佢係乜水,啲歌難聽到一個點!完全就好似而家我喺彌敦道行街,見到嗰啲模仿日本品牌嘅家品店,一眾所謂歌手完全係嗰款抄抄雜雜、諗住用外表聲線胡混過關,呃到啲師奶大媽入場購買貨色,而佢哋啲歌,就好似啲吉舖短租買瓷器碟嘅舖頭,冇設計冇內涵粗製濫造,最緊要cheap,你聽佢哋唱歌完全冇靈魂冇投入感、結歌曲旋律歌詞同編曲恐怖到一個點!勁歌金曲以前細個係名牌,宜家只不過係一個垃圾堆填區,同佢地有千絲萬縷關係嘅唱片公司希望短時間推幾個新人唱下電視劇集主題曲,喺網上隨便宣傳下成功就賣到少少錢,唔成功就掉落堆填區再搵另一個!當然彌敦道上邊嘅吉舖永遠可以短期租約,貨品一向都唔值錢,參與呢場平價推銷活動嘅所謂歌手,自己揣摩一下啦!