今天庭上的沉重....... (Patreon)

話說今朝9:00我已經到達灣仔區域法院，因為要親身聽取一個朋友嘅判決！

經歷咗14個月嘅審訊，我由九龍城法院旁聽去到今日，有時會安慰佢哋父母，最終今日嘅判決雖然唔係最壞，但對我來講都係相對比較重！

呢個手足朋友當然係2019年社會運動中被逮捕，被控收藏危險品及危險藥物，但我幾肯定個危險藥物係黑警插裝㗎喎，但冇計啦依家就係政府大晒！，因為今日案件係三個手足一齊11點判決，所以9:00嚟到嘅時候，旁聽席嘅排隊已經有成幾十人，咁我同兩個朋友就無奈要用記者身份入庭，但庭內真係不知所謂到，首先法官前面隔晒膠板，檢控同辯方律師在一大塊膠板，個廣播器又細聲到無倫，我話俾你聽根本完全聽唔到佢哋講乜！我只係喺後尾判決隱約聽到其中一人判更生中心，另一個34個月，後來先知原來34個月係嗰位消防員，我朋友被判28個月，對我來講當然判得重！辯方律師後來同家長講，原來法官認為當事人喺集會現場着黑色衫係罪加一等嘅條件.....我屌佢老母，又話呢個鬼佬法官比較開明嘅，原來都係.....!

Btw一個小插曲，當辯方律師講緊嘢嘅時候，個檢控官個電話突然間大大聲播片，仲要撳唔熄，之後要過辯方律師幫佢撳停，個檢控官就向法官道歉話呢個係新嘅app唔識撳.....但上到法庭，刪除響鬧裝置係常識吧！🙄