電影「新聞守護者」影評 (Patreon)

當日我就係着住一件「指鹿為馬嘅黑色T恤」去睇「新聞守護者」呢套電影優先場！我認為經歷咗香港一年半嘅暴政惡法，呢套係我覺得今年香港人應該每一個人都要入場睇嘅電影！電影講述一件真人真事，一個真實人物Mr.Jones一位30年代初年輕嘅英國威爾斯記者！當年唔單止捷足先登訪問希特拉，返嚟仲作為智囊，話比英國政府聽希特拉絕對有侵佔其他歐洲國家嘅野心，但係比當時所有政客同政府人員嘲笑！

跟住佢開始調查發覺當時蘇聯啱啱成立十幾年，官方嘅經濟數據有嚴重問題，佢懷疑全部都係造假，結果決心用獨自嘅力量親身去到莫斯科調查真相，喺特工同政治環境阻撓嘅情況下，佢無意中去到烏克蘭揭發當時發生嘅嚴重大饑荒！佢用性命維護新聞返到英國最終揭開蘇聯經濟改革嘅真相，但係比當時全球商界、政客以及腐化左嘅紐約時報普立茲獎記者話佢講大話，話佢誣蔑蘇聯，但係我哋依家暫喺歷史後人觀看，佢當時唔單止所報道嘅一切都係真實，仲要係第一個揭穿蘇聯真相揭露大饑荒嘅記者！

電影仲要加插「動物農莊」反共作家嘅心路歷程！整套電影由一開始到最終一幕，都係充滿反共嘅意識形態同論述！

真心覺得，電影公司老闆肯出錢出力買呢條片返嚟，係呢個年代冒一個嚴重政治風險！我親身同電影公司老闆傾過計，佢就係好希望呢套電影能夠比香港人睇得到！坦白講，一年後？一個月後？呢種電影喺香港上到戲院都可能冇乜可能，甚至購買及播放呢類電影都可能違反國安法！趁大家仲有機會入戲院睇一套威尼斯攞獎嘅反共電影，就珍惜入場機會啦，尤其是學生，同埋有子女嘅家長，我都講多次，呢套係我覺得今年所有香港人都應該入場睇嘅一套電影：「新聞守護者」

順帶一提，電影中男主角真實人物Mr Jones後來去到中國內蒙古被綁架及殺害！人生好短，但堅持為正義而戰而發聲！