《孤雁和你飛》影評 (Patreon)
Published:
2020-09-25 06:45:05
Edited:
2020-09-25 06:54:14
Imported:
2021-07
Content
早個星期,電影公司問我有冇興趣睇呢套法國電影《孤雁和你飛》?我諗咗一陣,首先我其實對於雀嘅電影係冇興趣;第二對法國片始終都有啲避忌(長氣沉悶),但我都係決定帶埋朋友一齊入場欣賞下!心態係,一來我知道係一個真人真事改編嘅故事,我睇新聞都不知講過幾多次一個男人為咗帶領候鳥懂得遷徙,以輕盈航機扮作母親帶領牠們,二來我想睇吓新聞兩段寫完嘅故事,點拍一套兩個鐘嘅電影?!心態就係想睇你點死!
點知點知點知,往往呢啲電影先帶到俾人驚喜!拍部雀嘅新聞性電影,意外地感覺好好睇!
當中有幾個難得之處,整套電影實地喺歐洲拍攝,每個畫面都相當靚,完全係覺得導演有心捕捉最靚嘅歐洲鏡頭,睇風景都已經值回票價!
個劇本寫得好紮實,溫情友情起承轉合、故事性戲劇性全部寫到恰到好處,並無矯揉造作,亦冇不合情理的橋段!
而我覺得成套電影由男女主角到小朋友主角到所有角色,其實可以用醜樣嚟形容,但個個都做得好好先至係關鍵!嗱!識法文嘅唔好話返比啲法國演員聽我咁講!
人人都話動物同細路仔係最難拍戲,呢套兩樣有齊,但係拍得非常之好!當然啦,以香港人性格,要佢睇呢種類型嘅電影都係比較難!但真係可以心靈解放兩個鐘,試吓入場!