短打影評 (Patreon)

在封戲院之前睇咗部份新戲，解封戲院之後又狂睇咗一些，趁聽日換畫，嚟個短打影評！

新異變人（垃圾得不能想像！真係同D級港產片有得揮！仲衰過Ben 10電影版)

爆怒時速(撞戲嚟講，冇諗過美國荷里活呢套真係差到咁恐怖，編劇寫得衰，又拍得唔好，連每個演員都Hea做！第一次覺得殺人犯同受害者都交唔到戲！）

憤路狂逃（相反荷蘭呢套比較好睇，編劇落咗功夫雖然撞戲，當然其實都可以改進少少殺人犯可以描寫多啲！）

幻愛（算幾好睇！當然都係消費精神病患，只係唔鍾意後邊編劇僭建嗰段心理學家守則）

金都（有啲失望，完全冇將金都歷史擺入去，而且話就係港產片，點解最尾係追求夢想返大陸？不解！）

超能復仇（科幻片嚟講，交到貨，舒舒服服睇場戲！）

吞上癮（近期最有驚喜嘅一套電影，心理描述同人性險惡描述得非常之好，以為會滿足全場嘅電影點知非常好睇！）

死因無可疑（當知道有電影工作者入場睇幾次，我忍唔住問咩事，原來當搞笑爛片睇！我諗係近20年最搞笑嘅爛港產片！當然電影公司好認真拍呢套戲！絕對可以同經典Cult爛片The Room媲美！中頭獎呀！）

叔．叔（好睇！寫實！對於我有啲沉重！）

居禮夫人：一代科研傳奇（一套idea幾好，但拍爛晒嘅電影，劇本衰、拍攝技巧又唔得、演員演技又真係仲衰過迪士尼！）

福島50死士（由於今年封關之前去過兩次福島核電廠事故地點，主觀覺得好好睇，但肯定香港人係唔會鍾意！完！）

孤城淚（有啲過譽！只不過係因為警暴問題引起香港人共鳴，以電影來講麻麻地！不過法國片係咁！）

生命之光（嘩！真係冇諗過一套末日災難片拍爛到如此境地！真係一個唔覺意會以為係一套亂倫戀童戲！差啲瞓着！）

嚇。房（有啲驚喜！以為係恐怖片，點知原來係一套科幻片，起承轉合紮實OK！）

無名勳章（OK好睇，預咗大美國主義㗎啦，但係唔核突囉，好過啲神級抗日電影！）

屍殺半島（冇一個身邊朋友認為好睇，但賣座呀你吹呀！但老實講我又唔覺得太差，你咪當飛車電影睇囉！不過啲喪屍化妝真係差到衰過平時萬聖節派對！）

完！聽日有個新一輪新戲上啦！